ព័ត៌មានអន្ដរជាតិ

ភ្លើងឆេះព្រៃដ៏ធំបំផុតនៅបារាំង ត្រូវគ្រប់គ្រងបានហើយ ក្រោយលេបត្របាក់ផ្ទៃដីជាង ១៦ ០០០ហិកតា

បានផុស

១០ ខែ មុន

នៅ

ថ្ងៃសុក្រ ៨ សីហា ២០២៥

ដោយ

Chheang

ភ្លើងឆេះព្រៃដ៏ធំបំផុតគិតចាប់តាំងពីឆ្នាំ១៩៤៩ ដែលបានលេបត្របាក់ភូមិ និងព្រៃឈើនៅភាគខាងត្បូងប្រទេសបារាំងក្នុងសប្តាហ៍នេះ ឥឡូវត្រូវគ្រប់គ្រងបានហើយ។ នេះបើយោងតាមការបញ្ជាក់ពីអាជ្ញាធរក្នុងតំបន់កាលពីថ្ងៃព្រហស្បតិ៍ទី៧ខែសីហាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីថ្ងៃអង្គារមក ភ្លើងឆេះយ៉ាងសន្ធោសន្ធៅបានលេបត្របាក់ផ្ទៃដីជាង ១៦ ០០០ហិកតា ដែលស្មើនឹងជិត ១,៥ដងនៃទំហំទីក្រុងប៉ារីស។ អគ្គិភ័យនេះ បានបំផ្លាញផ្ទះសម្បែង និងដីស្រែចម្ការ នៅជិតឆ្នេរសមុទ្រមេឌីទែរ៉ាណេ និងព្រំដែនប្រទេសអេស្ប៉ាញ។ ប្រព័ន្ធផ្សព្វផ្សាយបារាំង បានប៉ាន់ប្រមាណថា ផ្ទៃដីដែលរងផលប៉ះពាល់សរុបអាចមានដល់ទៅ ១៧ ០០០ហិកតាឯណោះ។

យ៉ាងហោចណាស់ មនុស្សម្នាក់បានស្លាប់ និង ១៨នាក់ផ្សេងទៀតបានរងរបួស ក្នុងនោះមានអ្នកពន្លត់អគ្គីភ័យ ១៦នាក់។ ភ្លើងបានបំផ្លាញផ្ទះចំនួន៣៦ខ្នង និង ខូចខាត២០ខ្នងបន្ថែមទៀត ខណៈបង្ខំឲ្យមានការជម្លៀសប្រជាជន និងភ្ញៀវទេសចរប្រមាណ ២ ០០០នាក់។

មនុស្ស ១ ៥០០គ្រួសារនៅតែគ្មានអគ្គិសនីប្រើប្រាស់ គិតត្រឹមល្ងាចថ្ងៃព្រហស្បតិ៍។ ប្រជាពលរដ្ឋមិនទាន់ត្រូវបានអនុញ្ញាតឲ្យត្រឡប់ទៅផ្ទះសម្បែងពួកគេវិញនៅឡើយទេ ខណៈផ្លូវធ្វើដំណើរត្រូវបានបិទដោយសារដើមឈើ និងបង្គោលភ្លើងដួលរលំ។

រដ្ឋមន្ត្រីក្រសួងបរិស្ថាន Agnès Pannier-Runacher ចាត់ទុកហេតុការណ៍នេះថាជា «គ្រោះមហន្តរាយដែលជំរុញដោយកត្តាអាកាសធាតុ»។ ថ្លែងទៅកាន់វិទ្យុ France Info លោកស្រីបាននិយាយថា ភ្លើងឆេះគឺជាលទ្ធផលផ្ទាល់នៃគ្រោះរាំងស្ងួតដែលកាន់តែអាក្រក់ និងការកើនឡើងសីតុណ្ហភាពនៅក្នុងតំបន់៕