ព័ត៌មានអន្ដរជាតិ

អ្នកស្លាប់កើនដល់ ៦នាក់ ព្រោះភ្លើងឆេះព្រៃនៅអេស្ប៉ាញ និងព័រទុយហ្គាល់

បានផុស

១០ ខែ មុន

នៅ

ថ្ងៃអង្គារ ១៩ សីហា ២០២៥

ដោយ

Chheang

យ៉ាងហោចណាស់មនុស្ស ៦នាក់បានបាត់បង់ជីវិតនៅក្នុងហេតុការណ៍ភ្លើងឆេះព្រៃដ៏សន្ធោរសន្ធៅ ដែលកំពុងរាលដាលពាសពេញប្រទេសអេស្ប៉ាញ និងប្រទេសព័រទុយហ្គាល់។ នេះបើយោងតាមការចុះផ្សាយរបស់ NZ Herald នាថ្ងៃទី១៩ខែសីហាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅប្រទេសអេស្ប៉ាញ មានអ្នកស្លាប់ចំនួន៤នាក់ ក្នុងនោះមានអ្នកពន្លត់អគ្គិភ័យ៣នាក់ និងពលរដ្ឋម្នាក់ ខណៈនៅប្រទេសព័រទុយហ្គាល់បានរាយការណ៍ថាមានអ្នកស្លាប់ចំនួន២នាក់ ក្នុងនោះមានអ្នកពន្លត់អគ្គិភ័យម្នាក់ និងអតីតអភិបាលក្រុងម្នាក់។

ការស្លាប់នេះ បានកើតឡើងនៅពេលដែលភ្លើងឆេះព្រៃធំជាង២០ កំពុងលេបត្របាក់នៅទូទាំងភាគខាងលិចប្រទេសអេស្ប៉ាញ ដែលបំផ្លាញផ្ទៃដីអស់ប្រមាណ ៣៤៣ ០០០ហិកតានៅឆ្នាំនេះ ដែលលើសពីកំណត់ត្រាលើកមុនកាលពីឆ្នាំ២០២១។ ព័រទុយហ្គាល់ដែលជាប្រទេសមានព្រំប្រទល់ជាប់អេស្ប៉ាញ ក៏រងការបំផ្លិចបំផ្លាញផ្ទៃដីអស់ចំនួន ២១៦ ០០០ហិកតាផងដែរ។

អ្នករស់រានមានជីវិតជនជាតិអេស្ប៉ាញម្នាក់ បានប្រាប់អ្នកយកព័ត៌មានដោយពណ៌នាអំពីអណ្តាតភ្លើងដែលរំកិលយ៉ាងលឿន«ដូចជាខ្យល់ព្យុះ» ឆ្លងកាត់សហគមន៍របស់គាត់ថា «ភ្លើងទាំងនេះគឺដូចជាគ្រាប់បែកអ៊ីចឹង»។ ជាមួយនឹងការជម្លៀសខ្លួនមនុស្សរាប់ម៉ឺននាក់ និងផ្សែងក្រាស់ដែលអាចមើលឃើញពីលំហ ក្រុមមន្ត្រីបានព្រមានថា វិបត្តិភ្លើងឆេះព្រៃនេះនឹងនៅតែបន្តកើតមាន បើទោះជាមានការព្យាករពីសីតុណ្ហភាពចុះត្រជាក់ខ្លះក៏ដោយ។

បច្ចុប្បន្ន យន្តហោះពន្លត់អគ្គិភ័យមកពីប្រទេសបារាំង អ៊ីតាលី ស្លូវ៉ាគី និងហូឡង់ កំពុងជួយអេស្ប៉ាញ ខណៈព័រទុយហ្គាល់វិញទទួលបានការគាំទ្រពីស៊ុយអែត និងម៉ារ៉ុក។

សូមជម្រាបថា តំបន់អឺរ៉ុបខាងត្បូងកំពុងប្រឈមមុខនឹងរដូវកាលភ្លើងឆេះព្រៃដ៏អាក្រក់បំផុតរបស់ខ្លួនក្នុងរយៈពេល ២ទសវត្សរ៍កន្លងមកនេះ ដោយអេស្ប៉ាញស្ថិតក្នុងចំណោមប្រទេសដែលរងផលប៉ះពាល់ខ្លាំងជាងគេ។ អ្នកវិទ្យាសាស្ត្រអាកាសធាតុព្រមានថា ការកើនឡើងសីតុណ្ហភាពសកលកំពុងធ្វើឲ្យលក្ខខណ្ឌអាកាសធាតុកាន់តែធ្ងន់ធ្ងរ ភ្លើងកាន់តែអាក្រក់ គ្រោះរាំងស្ងួត និងរលកកម្ដៅ៕