ព័ត៌មានជាតិ

វត្តមានអង្ករកម្ពុជានៅលើទីផ្សារឥណ្ឌូណេស៊ី នឹងក្លាយជាសក្ខីភាពថ្មីមួយទៀត

បានផុស

២ years មុន

នៅ

ថ្ងៃពុធ ១៦ សីហា ២០២៣

ដោយ

វត្តមានអង្កររបស់ប្រទេសកម្ពុជានៅលើទីផ្សារប្រទេសឥណ្ឌូណេស៊ី នឹងក្លាយទៅជាសក្ខីភាពថ្មីមួយទៀត។ នេះជាការលើកឡើងរបស់លោក Pahala Nugraha Mansury អនុរដ្ឋមន្ត្រី ក្រសួងការបរទេសឥណ្ឌូណេស៊ី ក្នុងជំនួបជាមួយ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នាថ្ងៃទី១៥ ខែសីហា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក Pahala Nugraha Mansury ដើម្បីធានាបានសន្តិសុខស្បៀងសម្រាប់ប្រទេសឥណ្ឌូណេស៊ី វាចាំបាច់ណាស់នៅក្នុងការស្វែងរកទីផ្សារអង្ករបន្ថែមពីប្រទេសផ្សេងៗ ដែលក្នុងនោះក៏មានកម្ពុជាផងដែរ។

អនុរដ្ឋមន្ត្រីក្រសួងការបរទេសឥណ្ឌូណេស៊ី បានសង្កត់ធ្ងន់ថា «វត្តមានអង្កររបស់កម្ពុជានៅលើទីផ្សារឥណ្ឌូណេស៊ី នឹងក្លាយជាសក្ខីភាពថ្មីមួយទៀត ក្នុងការបញ្ជាក់អំពីកិច្ចសហប្រតិបត្តិការរវាងប្រទេសទាំងពីរនៅក្នុងវិស័យពាណិជ្ជកម្ម។ ខណៈកម្ពុជាមានអង្ករដែលមានគុណភាពល្អ ជាពិសេសមានការទទួលស្គាល់និងនាំចូលដោយប្រទេសជាសមាជិកអាស៊ានចំនួន ៨ ក្នុងចំណោមសមាជិកទាំង ១០ប្រទេស»។

ជាការឆ្លើយតបទៅកាន់អនុរដ្ឋមន្ត្រីក្រសួងការបរទេសឥណ្ឌូណេស៊ី លោក ឌិត ទីណា ក៏បានបញ្ជាក់ពីគោលជំហររបស់កម្ពុជាក្នុងការជួយដល់មិត្តដែលកំពុងមានតម្រូវការ ស្របតាមប្រសាសន៍ណែនាំដ៏ខ្ពង់ខ្ពស់របស់សម្ដេចតេជោនាយករដ្ឋមន្ត្រី ហ៊ុន សែន។ ក្រសួងកសិកម្មកម្ពុជានឹងជួយសម្រួលដល់ការនាំចេញអង្កដើម្បីទ្រទ្រង់ដល់សន្តិសុខស្បៀងសម្រាប់ប្រទេសឥណ្ឌូណេស៊ីជាមិត្តផងដែរ។ ប៉ុន្តែការងារនេះក៏នឹងមានការសហការគាំទ្រពីវិស័យឯកជនកម្ពុជាដែលមានសហព័ន្ធស្រូវអង្ករជាតួអង្គសំខាន់។

លោក ឌិត ទីណា ក៏បានអះអាងដែរថា «កម្ពុជាបើកចំហទ្វារជានិច្ច សម្រាប់ឥណ្ឌូណេស៊ី ក្នុងការវិនិយោគក្នុងខ្សែច្រវាក់នៃវិស័យកសិកម្មរបស់កម្ពុជា និងជួយជ្រោមជ្រែងឱ្យដំណើរការនាំចេញអង្ករកម្ពុជាទៅកាន់ទីផ្សារឥណ្ឌូណេស៊ីអាចប្រព្រឹត្តទៅកាន់តែរលូន និងមានប្រសិទ្ធភាពខ្ពស់»។

បន្ថែមពីនេះ កិច្ចពិភាក្សាក៏បានផ្តោតទៅលើការចាប់អារម្មណ៍របស់ភាគីឥណ្ឌូណេស៊ីក្នុងការវិនិយោគក្នុងផ្នែកខ្លះនៃខ្សែច្រវាក់តម្លៃនៃវិស័យកសិកម្ម ដែលមានដូចជា រោងម៉ាស៊ីនកិនស្រូវ ឃ្លាំងស្តុក ឬហេដ្ឋារចនាសម្ព័ន្ធ ឡូជីស្ទីក។ ហើយភាគីឥណ្ឌូណេស៊ីក៏ចាប់អារម្មណ៍ក្នុងការវិនិយោគផ្គត់ផ្គង់ជីអ៊ុយរ៉េ មកកម្ពុជាផងដែរ៕