សង្ស័យភ្លើងប្រចណ្ឌ បុរសជាប្ដីចាក់ប្រពន្ធខ្លួនឯងបណ្ដាលឲ្យស្លាប់ ពេលបញ្ជូនដល់មន្ទីរពេទ្យ

បុរសជាប្ដី​ បានយកកាំបិតចុងស្រួច ចាក់ប្រពន្ធខ្លួនឯងបណ្ដាលឲ្យរងរបួសធ្ងន់ធ្ងរ និងបានស្លាប់ពេលបញ្ជូនដល់មន្ទីរពេទ្យ​ ដោយការសន្និដ្ឋានជំហានដំបូងមកពីភ្លើងប្រចណ្ឌ។ ករណីកើតឡើងនៅភូមិព្រែកតាគង់ ៣ សង្កាត់ចាក់អង្រែលើ ខណ្ឌមានជ័យ​ រាជធានីភ្នំពេញ។

​ប្រភពព័ត៌មានពីប្រជាពលរដ្ឋ បានឲ្យដឹងថា ហេតុការណ៍នេះ ​បានកើតឡើងនៅវេលាម៉ោងប្រមាណ ១១យប់​ ថ្ងៃទី ១៦​ ខែសីហា​ ឆ្នាំ ​២០២៣​​ ខណៈពេលដែលប្ដីបានចាក់ប្រពន្ធបណ្ដាលឲ្យរងរបួសធ្ងន់ធ្ងរ ​រួចជនបង្កក៏នាំយកកូនប្រុសម្នាក់​ អាយុ ៦ឆ្នាំ​ទៅជាមួយ និងបានគេចខ្លួនបាត់ស្រមោល។

រីឯស្ត្រីរងគ្រោះ ត្រូវបានប្រជាពលរដ្ឋរស់នៅជិតខាង ដឹកយកទៅសង្គ្រោះនៅមន្ទីរពហុព្យាបាល​ មេឌ​ ១១៥​ ជាប់ផ្លូវជាតិ លេខ ២​ ក្នុងសង្កាត់ចាក់អង្រែលើ ខណ្ឌមានជ័យ​ រាជធានីភ្នំពេញ​ទាំងយប់​ តែអកុសលស្ត្រីរូបនោះ បានស្លាប់បាត់ទៅហើយ។  

ជនដៃដល់ ​និងស្ត្រីរងគ្រោះ​ ជាជនជាតិវៀតណាមដូចគ្នា​ និងមានកូនប្រុស-ស្រី ២នាក់ រស់នៅទីតាំងកើតហេតុខាងលើ ។ ក្រោយទទួលបានព័ត៌មាននេះ សមត្ថកិច្ចជំនាញ​បានចុះមកពិនិត្យ ​និងធ្វើកោសល្យវិច័យសពស្ត្រីរងគ្រោះដល់មន្ទីរពេទ្យ​ និងធ្វើការស្រាវជ្រាវរកជនដៃដល់ដែលជាប្ដី​ យកមកផ្ដន្ទាទោសតាមច្បាប់​៕

អត្ថបទ៖ សុខា