សន្តិសុខសង្គម

ម្ចាស់ហាង «ជាងវ៉ា ខ្ទមចាស់ចាំស្នេហ៍» កើតចិត្តប្រចណ្ឌ កាប់ប្រពន្ធរបួសធ្ងន់

បានផុស

២ years មុន

នៅ

ថ្ងៃចន្ទ ៤ វិច្ឆិកា ២០២៤

ដោយ

ម្ចាស់ហាងផឹកស៊ី យីហោ «ជាងវ៉ា ខ្ទមចាស់ចាំស្នេហ៍» នៅម្ដុំដីវាល ខាងលិចរបងរោងចក្រ កាណាឌីយ៉ា កើតចិត្តប្រច័ណ្ឌប្រពន្ធ និងភ្ញៀវ បានទាញកាំបិតកាប់ប្រពន្ធមួយកាំបិត ចំដើមដៃឆ្វេង បណ្ដាលឲ្យរងរបួសធ្ងន់ ត្រូវបានបញ្ជូនតាមម៉ូតូកង់បីដឹកយកទៅសង្គ្រោះបន្ទាន់ និងមានសមត្ថកិច្ចចុះអន្តរាគមន៍ឃាត់ជនដៃដល់ជាប្ដីភ្លាមៗ ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៨ និង ៤០ នាទីយប់ ថ្ងៃទី ៣ ខែវិច្ឆិកា ឆ្នាំ ២០២៤ នៅម្ដុំលក់ទឹកត្នោតជូរ ស្ថិតតាមបណ្ដោយផ្លូវបេតុងមួយកន្លែង ភូមិត្រពាំងថ្លឹង ២ សង្កាត់ចោមចៅទី ១ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបាននិយាយប្រាប់ថា មុនកើតហេតុមានភ្ញៀវមកផឹកស៊ីនៅហាងយីហោ «ជាងវ៉ា ខ្ទមចាស់ចាំស្នេហ៍» ដែលមានម្ចាស់ ២ នាក់ ជាប្ដីប្រពន្ធខាងលើ។ ក្នុងនោះ បុរសជាប្ដី ឃើញប្រពន្ធខ្លួននិយាយលេងសើចជាមួយភ្ញៀវផ្អែមល្ហែមពេក ក៏ស្ទុះយកកាំបិតកាប់លើជនរងគ្រោះជាប្រពន្ធ បណ្ដាលឲ្យរងរបួសធ្ងន់ រយះដើមដៃខាងឆ្វេង ហើយភ្លាមៗ ត្រូវបញ្ជូនតាមម៉ូតូកង់បីដឹកយកទៅសង្គ្រោះបន្ទាន់។

ក្រោយកើតហេតុ ជនបង្កជាប្ដី ត្រូវបានកម្លាំងសមត្ថកិច្ចប៉ុស្តិ៍ សហការជាមួយកម្លាំងខណ្ឌពោធិ៍សែនជ័យ ចុះអន្តរាគមន៍ឃាត់ខ្លួនយកទៅសួរនាំនៅប៉ុស្តិ៍នគរបាលរដ្ឋបាលចោមចៅទី ១ ដើម្បីកសាងសំណុំរឿងបញ្ជូនទៅផ្នែកជំនាញព្រហ្មទណ្ឌខណ្ឌពោធិ៍សែនជ័យ ចាត់ការតាមនីតិវិធីបន្ត៕

អត្ថបទ ៖ សំណាង