ថៃ បើកទ្វារទំនប់ ចៅប្រាយ៉ា និងព្រមានអំពីការកើនឡើងនៃកម្ពស់ទឹកទន្លេ មេគង្គ

ខេត្តអយុធ្យា កំពុងត្រៀមខ្លួនទប់ទល់នឹងទឹកជំនន់ បន្ទាប់ពីការបើកទ្វារទំនប់ ចៅប្រាយ៉ា ដោយបញ្ចេញទឹកចំនួន ១២០០ម៉ែត្រគូបក្នុងមួយវិនាទី ដែលធ្វើឲ្យប៉ះពាល់ដល់តំបន់ជាច្រើនរបស់ខេត្តមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លៀងធ្លាក់ជាបន្តបន្ទាប់ក្នុងរយៈពេលប៉ុន្មានថ្ងៃកន្លងមក នៅតំបន់ជាច្រើននៃប្រទេសថៃ បានធ្វើឲ្យកម្រិតទឹកនៅទំនប់វារីអគ្គិសនីនានា កើនឡើង ខណៈមានទំនប់ភាគច្រើន បានចាប់ផ្តើមបញ្ចេញទឹករួចទៅហើយ។

កាលពីថ្ងៃចន្ទទី២ខែតុលា ទំនប់ ចៅប្រាយ៉ា បានចាប់ផ្តើមបញ្ចេញទឹកក្នុងអត្រា ១០៤៩ ម៉ែត្រគូបក្នុងមួយវិនាទី ហើយបានបង្កើនលំហូរទឹកដល់ ១២០០ ម៉ែត្រគូបក្នុងមួយវិនាទីនៅពេលល្ងាច។ ប្រការ​នេះ ​បានបង្កផល​ប៉ះពាល់​ដល់​ប្រជាពលរដ្ឋ​នៅ​ស្រុក Sena ដែល​ជា​តំបន់​ទំនាប​បំផុត​ក្នុង​ខេត្ត​អយុធ្យា។

អភិបាលខេត្តអយុធ្យា លោក Niwat Rungsakorn និយាយថា ខេត្តបានប្រាប់គ្រប់ស្រុក និងភ្នាក់ងារខេត្តទាំងអស់ ត្រូវតាមដានស្ថានភាពទឹកឲ្យបានដិតដល់ជាទីបំផុត។ នេះរួមបញ្ចូលទាំងការត្រួតពិនិត្យស្ថានភាពទឹកនៅតំបន់កណ្តាលនៃខេត្ត និងនៅទីតាំងប្រវត្តិសាស្ត្រសំខាន់ៗ ដើម្បីទប់ស្កាត់ផលប៉ះពាល់រីករាលដាលផងដែរ។

ជាមួយគ្នានេះ វិទ្យាស្ថានធារាសាស្ត្រ បានចេញសេចក្តីជូនដំណឹង ដល់ប្រជាពលរដ្ឋនៅតំបន់ភាគឦសាន ឲ្យមានការប្រុងប្រយ័ត្ន ខណៈកម្ពស់ទឹកក្នុងទន្លេ Chi កំពុងតែហក់ឡើង និងខិតជិតដល់ចំណុចប្រកាសអាសន្ន។ មិនត្រឹមប៉ុណ្ណឹង ថៃក៏បានព្រមានអំពីការកើនឡើងនៃកម្ពស់ទឹកទន្លេ ក្នុងខេត្ត Ubon Ratchathani និងទន្លេមេគង្គផងដែរ៕

ប្រែសម្រួល៖ Vann Vann

ប្រភព៖ Nation

ចុចអាន៖ ថៃ នឹងមានភ្លៀងធ្លាក់ខ្លាំងពេញមួយសប្តាហ៍ ខណៈ ខេត្តជាច្រើន ប្រឈមទឹកជំនន់