ប៉ូលិស ថៃ រឹបអូសវត្ថុតាងជាគ្រាប់ និងកាំភ្លើងពីផ្ទះក្មេងប្រុសដែលបាញ់​ប្រហារនៅផ្សារទំនើបកណ្ដាលក្រុងបាងកក

ប៉ូលិសថៃ​នៅថ្ងៃពុធនេះបានបើកប្រតិបត្តិ​ការ​ឆែកឆេរ​ផ្ទះ​ជន​សង្ស័យ​អាយុ ​១៤ ​ឆ្នាំ​ដែល​ជាប់​ពាក់ព័ន្ធ​នឹង​ករណី​បាញ់​ប្រហារ​នៅផ្សារទំនើប​ Siam Paragon កណ្ដាលទីក្រុងបាងកកកាល​ពី​ថ្ងៃ​ទី​៣ ខែតុលា ហើយបានរក​ឃើញ​កាំភ្លើង​ខ្យល់ប្រើហ្គាសកម្លាំងខ្លាំងដាក់គ្រាប់ជ័រ​មួយ​ដើម និង​គ្រាប់​កាំភ្លើងយ៉ាង​ច្រើនសន្ធឹកសន្ធាប់ផងដែរ ។

ទន្ទឹមនោះ វត្ថុតាងដែលប៉ូលិសឆែកឆេររកឃើញនៅក្នុងផ្ទះល្វែងកម្ពស់ ២ ជាន់កន្លះដែលមានទីតាំង​ស្ថិត​ក្នុង​ផ្លូវ Soi Phetkasem 88/1 សង្កាត់ Bang Khae Nuea ខណ្ឌ Bang Khae កណ្ដាលទីក្រុង​បាងកកមានដូចជា៖

-ប្រអប់សំបក​គ្រាប់កាំភ្លើងទំហំ .២២ ​ចំនួន​ ៧ ប្រអប់

-គ្រាប់កាំភ្លើងទំហំ ៥.៥៦ ចំនួន ៣ គ្រាប់

-គ្រាប់កាំភ្លើងទំហំ .៤៥ ចំនួន ១ គ្រាប់

-ប្រអប់សំបក​គ្រាប់​កាំភ្លើងខ្លីចំនួន ៥ ប្រអប់

​-ប្រអប់សំបក​គ្រាប់​កាំភ្លើងទំហំ .៣៥៧ ចំនួន ២ ប្រអប់

-ប្រអប់សំបក​គ្រាប់​កាំភ្លើង​ទំហំ ៩ ​មិល្លី​ម៉ែត្រ​ ១ ប្រអប់

-គ្រាប់កាំភ្លើងពិតទំហំ ៩ មិល្លីម៉ែត្រចំនួន ៤៩ គ្រាប់

-កាំភ្លើងខ្លីប្រើកម្លាំងហ្គាសដាក់គ្រាប់ជ័រឈ្មោះ BB Gun ពណ៌ទឹកប្រាក់ចំនួន ១ ដើម

-បង់ដាក់គ្រាប់កាំភ្លើងខ្លីប្រើកម្លាំងហ្គាស ពណ៌ខ្មៅ ចំនួន ១

-សន្លឹកក្រដាសផ្ទាំងស៊ីបសម្រាប់បាញ់ចំនួន ១ សន្លឹក

គួរបញ្ជាក់ថា ក្នុងហេតុការណ៍បាញ់ប្រហារនោះ មានជនបរទេស ២ នាក់បានបាត់បង់ជីវិត ដោយម្នាក់ជាជនជាតិចិន និងម្នាក់ទៀតជាពលករមីយ៉ាន់ម៉ា ខណៈមនុស្ស ៥ នាក់រងរបួសផងដែរ ហើយបើតាមចម្លើយសារភាពរបស់ជនសង្ស័យវ័យ ១៤ ឆ្នាំដែលបើកការបាញ់ប្រហារកាលពីល្ងាចថ្ងៃអង្គារ ទី៣ ខែតុលា គឺដោយសារតែរូបគេ​គិត​ថា ​មាន​អ្នកចង់លបវាយប្រហារមកលើខ្លួន ដូច្នេះក៏​​ដក​កាំភ្លើង​ខ្លី​ Glock ស្វ័យប្រវត្តិ ៩ មិល្លីម៉ែត្រ បាញ់យកតែម្តង ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ ចម្លើយសារភាពរបស់ក្មេងប្រុស ដែលបាញ់ប្រហារនៅផ្សារទំនើប Siam Paragon កណ្តាលក្រុងបាងកក