ការសម្តែងគុនល្បុក្កតោ ក្នុងមហោស្រពភាពយន្តអាសុីពិភពលោក ទទួលបានស្ងើចសរសើរ មានអ្នកសួរនាំច្រើន

គួរជាទីមោទនៈណាស់ នៅពេលដែលទទួលបានឱកាស តំណាងក្បាច់គុនល្បុក្កតោខ្មែរ ឡើងសម្តែងលើឆាកអន្តរជាតិ ដើម្បីជាការអបអរសាទរចំពោះភាពយន្តខ្មែររឿង គុនល្បុក្កតោរស់ឡើងវិញ (Surviving Bokator) និងជាការរួមចំណែកមួយផ្សព្វផ្សាយគុនបុរាណខ្មែរ ទៅកាន់ពិភពលោកផង ហើយអ្វីដែលកាន់តែរំភើបទៀតនោះ គឺទទួលបានកោតសរសើរ និងមានអ្នកសួរនាំពីគុនល្បុក្កតោ។​
នេះបើតាមបទសម្ភាស ដែលលោក គីម សំបូរ គ្រូគុនចម្រុះខ្មែរនៅអាមេរិក បានបញ្ជាក់ប្រាប់កម្ពុជាថ្មី។​

ក្នុងឱកាសមហោស្រពភាពយន្តអាស៊ីពិភពលោក លើកទី៩ ដែលប្រព្រឹត្តិទៅចាប់ពីថ្ងៃទី០៨ ដល់ថ្ងៃទី១៧ ខែវិច្ឆិកា លោក គីម សំបូរ និងប្អូនប្រុស ត្រូវបានអញ្ជើញឱ្យចូលរួមសម្តែងក្បាច់គុនល្បុក្កតោ ដើម្បី​អបអរសាទរភាពយន្ត Surviving Bokator នៅថ្ងៃ១២ ខែវិច្ឆិកា ឆ្នាំ២០២៣ ដោយមានការចូលរួម ពីតារាហូលីវូដល្បីៗជាច្រើន មកតំណាងគុនប្រចាំប្រទេសរបស់ខ្លួន។​

លោក គីម សំបូរ បានរៀបរាប់ថា ចំពោះព័ត៌មានលម្អិតទាក់ទងនឹងកម្មវិធីនេះ លោកមិនអាចបញ្ជាក់បានទេ ប៉ុន្តែអ្វីដែលលោកអាចបញ្ជាក់បាន គឺអ្នកដែលចូលរួមកម្មវិធីនោះ មិនថាជនបរទេស ឬជនជាតិអាសុី គឺចាប់អារម្មណ៍ចំពោះការបង្ហាញ​ក្បាច់គុនរបស់លោក និងប្អូនប្រុស ហើយមានមតិសរសើរជាច្រើនមកកាន់លោក ខ្លះក៏ថា ពួកគេមិនធ្លាប់បានឃើញ ក្បាច់គុនអស្ចារ្យអ៊ីចឹងពីមុនទេ ​និងបានសួរលោកខ្លះៗ ពីគុនល្បុក្កតោទៀតផង។ ដែលនេះ សបញ្ជាក់បានថា គុនបុរាណខ្មែរមួយនេះ ទទួលបានការចាប់អារម្មណ៍ខ្លាំង។​

គួររំលឹកថា លោក គីម សំបូរ ជាកូនខ្មែររស់នៅអាមេរិកមួយរូប ដែលជាអ្នករួមចំណែកយ៉ាងផុសផុលបំផុត ជាមួយការផ្សព្វផ្សាយគុនបុរាណខ្មែរ នៅទឹកដីអាមេរិក។ មុនក្លាយជាគ្រូគុនចម្រុះនៅរដ្ឋ Utah លោកបានចំណាយពេលវេលាទៅមកកម្ពុជាជាច្រើនលើក រហូតបញ្ចប់ការសិក្សាគុ​នល្បុក្កតោដោយជោគជ័យ។

លោកក៏ត្រូវបានគេស្គាល់ថា ជាអ្នកសកម្មភាពក្នុងការផ្សព្វផ្សាយក្បាច់គុនអត្តសញ្ញាណកម្ពុជា ទៅកាន់ពិភពលោក ដូចជាការបញ្ចូលក្បាច់គុនខ្មែរ ក្នុងភាពយន្ត Power Ranger version ថ្មី របស់អាមេរិក ការសម្តែងក្បាច់គុនខ្មែរ ក្នុងឱកាសកម្មវិធីធំៗ របស់ជនជាតិខ្មែររស់នៅអាមេរិក ក៏ដូចជាការប្រើឱកាសជាគ្រូគុនចម្រុះនៅទីនោះ ដើម្បីផ្សព្វផ្សាយ៕