ពេជ្រ ចរណៃ សន្យាធ្វើតាមបណ្តាំលោកគ្រូ សាន គឹមស៊ាន ដើម្បីថែរក្សាអភិរក្សក្បាច់គុនល្បុក្កតោខ្មែរ

ស្របពេលដែលកំពុងចូលរួមកាន់មរណទុក្ខ ក្រុមគ្រួសារលោកព្រឹទ្ធាចារ្យក្រមាមាស កញ្ញា ពេជ្រ ចរណៃ តារាសម្តែង និងជាសិស្សព្រឹទ្ធាចារ្យគុនល្បុក្កតោខ្មែររូបនេះ បង្ហាញឆន្ទៈដោយមានមហាជនជាសាក្សីថា ខ្លួននឹងធ្វើតាមបណ្តាំលោកគ្រូតា សាន គឹមស៊ាន ដើម្បីថែរក្សាអភិរក្សក្បាច់គុនល្បុក្កតោខ្មែរ។

តាមរៀបរាប់ទាំងទឹកភ្នែកពេលទៅគោរពវិញ្ញាណក្ខន្ធព្រឹទ្ធាចារ្យក្រមាមាស សាន គឹមស៊ាន  តារាស្រីកញ្ញាពេជ្រ ចរណៃ បានឲ្យថាលោកគ្រូតាដែលខ្លួនគោរពស្រលាញ់ទុកដូចជាឪពុកពេលនេះបានលាទៅរហូតគ្មានថ្ងៃវិលវិញទេហើយបេះដូងនាងពេលនេះដូចគេពុះបែកជាពីរ នាងឈឺចុកចាប់ណាស់។

កញ្ញា ពេជ្រ ចរណៃ បញ្ជាក់ថា “បណ្ដាំរបស់លោកគ្រូតាកូននឹងធ្វើឱ្យបានសម្រេចមិនឱ្យទំនុកចិត្ត និងក្តីសង្ឃឹមលោកគ្រូតាខកបំណងឡើយ សូមលោកគ្រូតាកុំបារម្ភ កុំខ្វាយខ្វល់ច្រើន សូមលោកគ្រូតាអញ្ជើញសម្រាកនៅឋានសួគ៌បរមសុខហើយសម្លឹងមើលមកកូនដោយស្នាមញញឹម កូននឹងធ្វើឱ្យលោកគ្រូតាមានស្នាមញញឹម ទុកតម្កល់ជាអមតៈសម្រាប់ប្រទេសជាតិយើងរហូតទៅ”។

តារាសម្តែង ពេជ្រ ចរណៃ បន្ថែមទៀតថា “សូមកុសលផលបុណ្យដែលនាងបានធ្វើទាំងប៉ុន្មានសូមឧទ្ទិសជូ លោកគ្រូតា សាន គឹមស៊ាន ឱ្យបានសេចក្តីសុខជានិច្ចនិរន្តរ៍សូមលោកគ្រូតាអនុមោទនាទទួលយកផងចុះ”។

មហាជនអ្នកគាំទ្រពិសេសសិស្សគុន បានបង្ហាញអារម្មណ៍ក្តុកក្តួលនិងសោកស្តាយជាខ្លាំងបន្ទាប់ពីទទួលដំណឹងមរណភាពរបស់លោកគ្រូព្រឹទ្ធាចារ្យក្រមាមាស សាន គឹមស៊ាន ដែលជាព្រឹទ្ធាចារ្យផ្នែកវិស័យគុនល្បុក្កតោខ្មែរដ៏ល្បីឈ្មោះក្នុងកាចូលរួមថែរក្សា និងអភិរក្សមួយវិស័យមួយនេះ។

សូមបញ្ជាក់ដែរថា មុនពេលចែកឋានលោកគ្រូព្រឹទ្ធាចារ្យក្រម៉ាមាស សាន គឹមស៊ាន តាមរយ:កិច្ចសម្ភាសធ្លាប់បានអំពាវនាវ និងបំផុសដាស់តឿនជាថ្មីដល់កូនខ្មែរគ្រប់រូបត្រូវចូលរួមស្មារតី ដើម្បីថែរក្សាអភិរក្សនូវក្បាច់គុនបុរាណល្បុក្កតោខ្មែរឲ្យកាន់តែមានភាពរីកចម្រើន និងល្បីរីកសុះសាយបន្ថែមទៀតដល់ពិភពលោក៕ ចាន់រ៉ា