Update៖ អគ្គិភ័យដែលឆេះផ្ទះពលរដ្ឋនៅបុរីពិភពថ្មីគួស្រូវ៣ ឆេះខូចខាតពីរបន្ទប់ និងសម្ភារមួយចំនួន

ករណីអគ្គិភ័យដែលឆាបឆេះផ្ទះប្រជាពលរដ្ឋមួយកន្លែងនៅក្នុងបុរីពីភពថ្មីគួស្រូវ៣ ក្នុងមូលដ្ឋានខណ្ឌដង្កោ កាលពីរសៀលថ្ងៃទី៥ធ្នូ បណ្ដាលឲ្យខូចខាតបន្ទ​ប់គេង​ចំនួន២ ទំហំ​ ៣ម៉ែត្រ​ គុណ​ ៤ម៉ែត្រ និងសម្ភារមួយចំនួន។ នេះបើតាមរបាយការណ៍របស់ការិយាល័យនគរបាលបង្ការពន្លត់អគ្គិភ័យ​ និងសង្គ្រោះ​ នៃស្នងការដ្ឋាននគរបាលរាជធានីភ្នំពេញ។

ក្នុងរបាកការណ៍បញ្ជាក់ថា ករណីនេះ គឺផ្ដើមចេញពីការឆ្លងចរន្តអគ្គិសនី ដោយប្រើប្រាស់រថយន្តពន្លត់អគ្គិភ័យចំនួន០៥គ្រឿង ក្នុងនោះរួមមាន រថយន្តពន្លត់អគ្គិភ័យរបស់ការិយាល័យរាជធានីភ្នំពេញ ចំនួន០២គ្រឿង ប្រើប្រាស់ទឹកអស់០២ឡាន ស្មើនឹង០៨ម៉ែត្រគូប​​ រថយន្តជំនួយមកពីក្រុមហ៊ុន​ ស្រាបៀរកម្ពុជា ចំនួន០១គ្រឿង​ ប្រើប្រាស់ទឹកអស់​០១ឡាន​ ស្មើនឹង០៦ម៉ែត្រគូប​ និងរថយន្តបុរីពិភពថ្មី​ ចំនួន០២គ្រឿង​ ប្រើប្រាស់ទឹកអស់០២ឡាន​ ស្មើនឹង០៨​ម៉ែត្រគូប។

ក្នុងប្រតិបត្តិការជួយអន្តរាគមន៍ លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានដឹកនាំបញ្ជាផ្ទាល់ដល់​កងម្លាំងពន្លត់អគ្គិភ័យដែលប្រចាំការនៅគោលដៅ​ ដើម្បីចេញទៅជួយអន្តរាគមន៍បាញ់ទឹកពន្លត់ឲ្យទាន់ពេលវេលាកុំឲ្យមានការឆាបឆេះបន្តដល់ផ្ទះប្រជាពលរដ្ឋដែលនៅក្បែរនោះ។

គួររំលឹកថា ករណីអគ្គិភ័យនេះបានកើតឡើងកាលពីវេលាម៉ោង៣និង៣០នាទីរសៀល ថ្ងៃទី០៥​ ខែធ្នូ​ ឆ្នាំ២០២៣ ដែលស្ថិតនៅចំណុចបុរីពិភពថ្មី​ គួស្រូវ៣​ ផ្ទះលេខ១៣ ផ្លូវលេខ១៩​ ភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ ដោយក្នុងហេតុការណ៍នៃអគ្គិភ័យនេះ មិនបណ្ដាលឲ្យមានអ្នករងរបួស ឬបាត់បង់អាយុជីវិតនោះទេ៕

អត្ថបទ៖ សុខុម