អ្នកនាំពាក្យ៖ ករណីចរាចរណ៍បង្កឡើងដោយឈ្មោះ ព្រហ្ម វិចិត្រសុសក្តា គឺរដ្ឋមន្ត្រីយុត្តិធម៌ ណែនាំឱ្យស្រាវជ្រាវយ៉ាងហ្មត់ចត់បំផុត

ករណីគ្រោះថ្នាក់ចរចរណ៍បង្កឡើងដោយឈ្មោះ ព្រហ្ម វិចិត្រសុសក្តា ហើយបានធ្វើឱ្យបុរសម្នាក់បាត់បង់ជីវិតនោះ ត្រូវបានលោកឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ណែនាំឱ្យព្រះរាជអាជ្ញាពិនិត្យ ស្រាវជ្រាវយ៉ាងហ្មត់ចត់បំផុត ដើម្បីដោះស្រាយទៅតាមនីតិវិធីច្បាប់ជាធរមាន។ នេះបើការអះអាងរបស់អ្នកនាំពាក្យក្រសួងយុត្តិធម៌ លោក ជិន ម៉ាលីន នៅព្រឹកថ្ងៃទី១៩ ខែធ្នូ ឆ្នាំ២០២៣នេះ។

នាពេលថ្មីៗកន្លងទៅនេះ មានករណីគ្រោះថ្នាក់ចរាចរណ៍ដែលបង្កឡើងដោយរថយន្ត​១គ្រឿង ម៉ាក Jeep overland ពាក់​ស្លាក​លេខ ភ្នំពេញ​ 2CB-9963 បានបើកបុក​ជនរងគ្រោះ​ជាបុរសម្នាក់ដែលជិះម៉ូតូ ​បណ្ដាលឱ្យ​ស្លាប់​ នៅ​ចំណុចខណ្ឌ​ទួលគោក​ កាល​ពី​យប់​ថ្ងៃ​ទី​១៤​ ខែ​ធ្នូ​ ឆ្នាំ​២០២៣​។ បើតាមប្រភពសមត្ថកិច្ច ម្ចាស់​រថយន្ត​ឈ្មោះ​ សុខ​ លីណា​ និង​អ្នក​បើកបររថយន្ត​ពេលនោះ ត្រូវបាន​គេ​សង្ស័យថា​ ជា​កូនប្រុស​របស់លោកស្រី​ សុខ​ លីណា​ ដែល​មានឈ្មោះ​ ព្រហ្ម​ វិចិត្រ​សុសក្ដា​។ ក្រោយការកើតហេតុនេះ គ្រួសារជនបង្កបានទៅចូលបុណ្យសពជនរងគ្រោះថវិកាមួយចំនួន ដើម្បីសម្របសម្រួលឱ្យដកពាក្យបណ្ដឹងនេះវិញ ប៉ុន្តែយ៉ាងណា គ្រួសារជនរងគ្រោះ មិនយល់ព្រមដកពាក្យបណ្ដឹងឡើយ ដោយបានស្នើឱ្យមានការអនុវត្តតាមនីតិវិធីច្បាប់។

ចំពោះករណីគ្រោះថ្នាក់ចរាចរណ៍នេះ ត្រូវបានលោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បញ្ជាក់ឱ្យដឹងនៅបណ្ដាញសង្គមហ្វេសប៊ុករបស់លោក ដូច្នេះថា៖ «ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ បានណែនាំឱ្យព្រះរាជអាជ្ញារាជធានីភ្នំពេញ ធ្វើការពិនិត្យ ស្រាវជ្រាវ និងធ្វើការដោះស្រាយឱ្យបានត្រឹមត្រូវ និងម៉ឹងម៉ាត់តាមផ្លូវច្បាប់»៕