​មនុស្ស ១១ នាក់ ជាប់ពន្ធនាគារ ដោយសារល្មើសច្បាប់នេសាទ នៅខេត្តស្ទឹងត្រែង

នៅក្នុងរយៈពេលពេញមួយឆ្នាំ ២០២៣ ចាប់ពីខែមករា រហូតដល់ខែធ្នូ មានបទល្មើសនេសាទកើតឡើងចំនួន ១២២ ករណី នៅក្នុងខេត្តស្ទឹងត្រែង និងមនុស្ស ១១ នាក់ ត្រូវបានបញ្ជូនទៅតុលាការ និងសម្រេចឱ្យជាប់ពន្ធនាគារ។

លោក ស្រី សំវិចិត្រ នាយខណ្ឌរដ្ឋបាលជលផលខេត្តបានបញ្ជាក់ថា ​ចាប់ពីដើមឆ្នាំ ២០២៣ រហូត​ចុងឆ្នាំ ២០២៣ នេះ សមត្ថកិច្ចចម្រុះនៅតាមដងទន្លេមេគង្គលើបានបើកយុទ្ធនា​ការបង្ក្រាប​បទល្មើស​ជលផលបានចំនួន ១២២ ករណី និងបញ្ជូនជនសង្ស័យចំនួន ១១ នាក់ ដាក់ពន្ធនាគារ ដែលមាន ៣ នាក់បទល្មើសឆក់ និង៨នាក់ ស្មើសច្បាប់នេសាទនៅក្នុងអន្លង់អភិរក្ស ៩៦ នាក់ ធ្វើកិច្ចសន្យា អប់រំ និង​ផ្សព្វផ្សាយ ២៦២នាក់។ វត្ថុតាងបទល្មើសរួមមាន៖

-ដកហូតមងប្រវែង ៦៦.១៤២ម៉ែត្រ និងសន្ទូចរនង ៣០.០៤៣ផ្លែ

-ស្បៃមុងប្រវែង ២៧៤០ម៉ែត្រ បង្គោល ១.៥០០ដើម និងរបាំងព្រួល ២៥០ម៉ែត្រ

-ឧបករណ៍ដាយ ៣មាត់ ប្រវែង ៣៣ម៉ែត្រ

-ដកហូត ទូកម៉ាស៊ីនចំនួន ០ ៨គ្រឿង, អាគុយ ០៩គ្រឿង, ក្បាលឆក់ ០៦គ្រឿង, ដងឆក់ចំនួន ០២គូ និងថ្នងដងត្រី ០៤គ្រឿង។

លោកនាយខណ្ឌសំណូមពរទៅអ្នកនេសាទទាំងអស់ត្រូវភ្ញាក់រឭកគោរពច្បាប់ និងស្រឡាញ់ធនធានជលផលរបស់យើងទាំងអស់គ្នា ដូច្នេះសំណូមពរឲ្យបងប្អូនប្រជាអ្នកនេសាទក៏ដូចជាប្រជា​ពលរដ្ឋ​នៅក្នុងតំបន់ អភិរក្សទាំងអស់ចូលរួមថែ​រក្សា​ការពារ នេសាទដោយឧបករណ៍ស្របច្បាប់ជួយ​ក្នុង​ការអភិរក្ស និងក្នុងការទប់ស្កាត់បង្ក្រាបបទល្មើសផ្សេងៗ   ហើយ​​​ក៏សូមចូលរួមការពារប្រភេទត្រី កំពុងរងគ្រោះ មានដូចជា ត្រីរាជ ត្រីត្រសក់ ត្រីគល់រាំង ត្រីក្របី ត្រីផ្ទក់ ជាដើម ដើម្បីទុកឲ្យកូន​ចៅជំនាន់ក្រោយបានស្គាល់បន្តទៀត។

​លោក ម៉ា សុខៈ ប្រធានសបគមន៍នេសាទភូមិកាំងដីស សង្កាត់ព្រះបាទ បានបញ្ជាក់ថា៖ នៅតាមអន្លុងអភិរក្សត្រីមេពូជ និងតំបន់រណបតាមដងទន្លេមេគង្គលើ មន្ត្រីជំនាញ ​និងប្រជា​សហ​គមន៍​នេសាទបានធ្វើសកម្មភាពចុះទប់ស្កាត់ និងបង្រ្កាប បទល្មើសទទួលបានលទ្ធផល​ល្អជាង​ឆ្នាំ២០២២ ហើយអ្នកនេសាទភាគច្រើនពួកគាត់បានចូល​រួមគោរពច្បាប់ជលផល​បានខ្ជាប់ខ្ជួន​ផងដែរ។

​លោកបន្តថា៖ នៅទន្លេមេគង្គលើខេត្តស្ទឹងត្រែងសម្បូរ ត្រីមេពូជធំៗដែលមានទម្ងន់ចាប់ពី ៣ គីឡូ​រហូត ដល់៥ គីឡូ និងត្រីប្រភេទ ខ្លះទៀត មួយក្បាលមានទម្ងន់ជាង ១០ ទៅ ២០ គីឡូក្រាម​ក៏មានដែរ ហើយត្រីប្រភេទទាំងនេះ កំពុងត្រូវប៉ាន់ សម្រាប់ឈ្មួញលក់នៅផ្សារសាមគ្គីស្ទឹងត្រែង និងលក់បន្តទៅកាន់ទីផ្សារក្រៅខេត្តបន្ថែមទៀត។

​លោក ប៊ុន ស៊ីណា ប្រជាពលរដ្ឋ នៅភូមិកោះកីបានគាំទ្រចំពោះការគិតគូពីការអភិរក្សធនធាន​នេះ ព្រោះខេត្តស្ទឹងត្រែងមានប្រភេទត្រីប៉ាសេអ៊ី កំពុងមានឈ្មោះបោះសំឡេងល្បីនៅក្នុងប្រទេស​កម្ពុជាដូចនេះបើបានអាជ្ញាធរមូលដ្ឋាន កងកម្លាំងទាំងបីប្រភេទ ពិសេសប៉ុស្តិ៍នគរបាលរដ្ឋបាល នៅតាមចំណុចទីតាំងអន្លុងអភិរក្សនីមួយៗ ជួយទប់ស្កាត់បន្ថែម នោះពិតជាអនុវត្ត​ទៅ កាន់តែមាន​ប្រសិទ្ធភាព។

​សូមបញ្ជាក់ថា៖ ផលត្រីនៅខេត្តស្ទឹងត្រែងឆ្នាំ២០២៣នេះចាប់បាន ៤.២០៦ តោន កើនលើសឆ្នាំ២០២២​ ជាង១០០​តោន​កើនឡើង ២,៦១% ទោះបីថា មានប្រភេទត្រីមួយចំនួនកំពុងរងគ្រោះមានដូចជា ត្រីត្រសក់ ត្រីក្រាយ ត្រីខ្យា ត្រីរមាស ត្រីផ្ទក់ ត្រីក្រពាត់ ត្រីត្រចៀកដំរី ត្រីខ្លា និងត្រីក្របី យ៉ាងណាក៏ដោយ៕

អត្ថបទ៖ ងិនលីម