យោធា ថៃ ចាប់បានទំនិញគេចពន្ធជាច្រើនឆ្លងតាមច្រករបៀង

កម្លាំងយោធាថៃចាប់បានទំនិញគេចពន្ធជាច្រើនដែលនាំឆ្លងដែនតាមច្រករបៀងចូលមកក្នុងទឹកដីនៃប្រទេសថៃ ហើយបានប្រគល់ទំនិញទាំងនោះទៅឲ្យអង្គភាពគយប្រចាំស្រុកអារញ្ញប្រាថេត ចំណែកឯអ្នកនាំទំនិញបានរត់ឆ្លងដែនចូលមកកម្ពុជាគ្មានសល់ ។

យោងតាមការផ្សាយរបស់គេហទំព័រថៃបានបញ្ជាក់ថា នៅព្រលប់ថ្ងៃទី១៤ ខែឧសភា ឆ្នាំ២០២៤ កម្លាំងយោធាឈុតខ្មៅការពារព្រំដែនលេខ ១២ បានធ្វើការល្បាតតាមខ្សែបន្ទាត់ព្រំដែន ថៃ-កម្ពុជា ដើម្បីទប់ស្កាត់បទល្មើសគ្រប់ប្រភេទ ។

លុះទៅដល់ចំណុចភូមិដុងងូ ឃុំប៉ារ៉ៃ ស្រុកអារញ្ញប្រថេត ខេត្តស្រះកែវ ក៏បានប្រទះឃើញមនុស្សមួយក្រុមមានគ្នាចំនួន ៦ នាក់កំពុងធ្វើសកម្មភាពលីជញ្ជូនទំនិញឆ្លងដែនពីខាងកម្ពុជាចូលទៅក្នុងទឹកដីថៃ ទើបសមត្ថកិច្ចឈានដល់ការត្រួតពិនិត្យ ។ ប៉ុន្តែនៅពេលដែលឃើញកម្លាំងយោធាថៃភ្លាមមនុស្សទាំង ៦ នាក់ បានទម្លាក់ទំនិញចោលហើយរត់ត្រឡប់ក្រោយឆ្លងដែនចូលមកក្នុងទឹកដីកម្ពុជាបាត់គ្មានសល់ ។

ចំណែកវត្ថុតាងដែលបន្សល់នៅកន្លែងកើតហេតុគឺមានការុងព៌ណខៀវចំនួន ៦ នៅក្នុងនោះមាន ស្បែកជើងប៉ាតាចំនួន ១៥០ គូ និងខោអាវឈុតកីឡា ចំនួន ១៤៥ កំប្លេ ដែលទាំងនេះគឺជាទំនិញមិនបានបង់ពន្ធឲ្យបានត្រឹមត្រូវនោះទេ ទើបកម្លាំងយោធាថៃបានដកហូត និងប្រគល់ឲ្យអង្គភាពគយប្រចាំស្រុកអារញ្ញប្រថេត ដើម្បីរក្សាទុកធ្វើជាព័ស្តុតាង និងអនុវត្តទៅតាមផ្លូវច្បាប់ ។

បើតាមប្រភពច្បាស់ការមួយដែលផ្ដល់ពីក្នុងផ្សាររោងក្លឿបានបញ្ជាក់ថា នៅក្នុងទឹកដីថៃត្រង់ចំណុចឃុំប៉ារ៉ៃ ពិតជាមានឃ្លាំងសម្រាប់ស្តុកទំនិញរបស់ថៃស្របច្បាប់ប្រាកដមែន ឯការនាំទំនិញឆ្លងដែនគឺវាកៀកជាមួយនឹងអូរព្រំដែន ដូច្នេះការនាំទំនិញគេចពន្ធរត់តែបន្តិចគឺអាចទៅដល់ឃ្លាំងស្តុកទំនិញនោះជាមិនខាន ប៉ុន្តែជាចៃដន្យលើកនេះត្រូវយោធាថៃស្ទាក់ចាប់បាន ៕

អត្ថបទ ៖ សោ និយមរ័ត្ន