ព័ត៌មានអន្ដរជាតិ

តុលាការ ថៃ សម្រេចចោទប្រកាន់លោក ថាក់ស៊ីន ពីបទប្រមាថព្រះមហាក្សត្រ

បានផុស

២ years មុន

នៅ

ថ្ងៃពុធ ២៩ ឧសភា ២០២៤

ដោយ

Chheang

អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា ត្រូវបានតុលាការចោទប្រកាន់ពីបទប្រមាថព្រះមហាក្សត្រ ពាក់ព័ន្ធនឹងប្រសាសន៍របស់លោកកាលពីជិត១ទសវត្សមុន។ នេះបើយោងតាមការប្រកាសរបស់អាជ្ញាធរថៃ នៅថ្ងៃទី២៩ ខែឧសភា ឆ្នាំ២០២៤ នេះ ដែលចេញផ្សាយដោយសារព័ត៌មាន CNN។

លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ (រូបភាព៖ AFP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សំណុំរឿង ដែលប្ដឹងដោយប៉ូលិសថៃ បានចោទប្រកាន់លោក ថាក់ស៊ីន ថាបានបំពានច្បាប់ប្រមាថព្រះមហាក្សត្រ អំឡុងពេលធ្វើបទសម្ភាសន៍មួយរបស់លោកកាលពីឆ្នាំ២០១៥ ទៅកាន់កាសែតកូរ៉េខាងត្បូង Chosun Ilbo។

លោក Prayuth Bejraguna អ្នកនាំពាក្យអគ្គព្រះរាជអាជ្ញា បាននិយាយថា “តុលាការបានសម្រេចចោទប្រកាន់លោក ថាក់ស៊ីន លើបណ្ដឹងទាំងអស់” ហើយលោក ថាក់ស៊ីន នឹងត្រូវបង្ហាញមុខចំពោះការិយាល័យអគ្គមេធាវីនៅថ្ងៃទី១៨ ខែមិថុនាខាងមុខ មុនការនាំខ្លួនបន្តទៅកាន់តុលាការ។

អ្នកនាំពាក្យរូបនេះ បន្តថា លោក ថាក់ស៊ីន មិនបានបង្ហាញខ្លួននោះទេនៅក្នុងសវនាការនាថ្ងៃពុធនេះ ដោយសារតែឆ្លងជំងឺកូវីដ១៩។

អតីតនាយករដ្ឋមន្ត្រីថៃរូបនេះ បានបដិសេធនូវរាល់ការចោទប្រកាន់ទាំងឡាយ ហើយបានធ្វើសច្ចាប្រណិធានម្ដងហើយម្ដងទៀតនូវភក្ដីភាពចំពោះរាជានិយម។

សូមបញ្ជាក់ថា លោក ថាក់ស៊ីន បានកាន់តំណែងជាមេដឹកនាំប្រទេសថៃ កាលពីឆ្នាំ២០០១ រហូតដល់ការផ្ដួលរលំដោយរដ្ឋប្រហារយោធាឆ្នាំ២០០៦។ លោកបានត្រឡប់ចូលប្រទេសថៃវិញ កាលពីខែសីហា ឆ្នាំមុន ពោលគឺរយៈពេល១៥ឆ្នាំក្រោយនិរទេសខ្លួននៅបរទេស។ លោក ថាក់ស៊ីន ត្រូវបានចាប់ខ្លួនចូលពន្ធនាគារ បន្ទាប់ពីការវិលត្រឡប់មកវិញ។ យ៉ាងណាមិញ អ្នកជំនាញមួយចំនួន ជឿជាក់ថា លោកបានចរចារួចមកហើយជាមួយរដ្ឋាភិបាលក្នុងការធ្វើមាតុភូមិនិវត្តន៍នេះ។ លោកត្រូវបានកាត់ទោសឲ្យជាប់ពន្ធនាគារ ៨ឆ្នាំ តែត្រូវបន្ថយមកត្រឹម១ឆ្នាំវិញ។ នៅក្នុងខែកុម្ភៈ ឆ្នាំ២០២៤ លោកក៏ត្រូវបានដោះលែងឲ្យនៅក្រៅឃុំ។

ប្រទេសថៃ មានច្បាប់តឹងរ៉ឹងចំពោះការប្រមាថខ្សែរាជវង្ស ដែលទោសធ្ងន់បំផុតអាចត្រូវជាប់ពន្ធនាគាររយៈពេល ១៥ឆ្នាំឯណោះនៅក្នុង១បណ្ដឹង។ បើតាមក្រុមមេធាវីថៃដើម្បីសិទ្ធិមនុស្ស បានឲ្យដឹងថា គិតចាប់តាំងពីបាតុកម្មយុវជនប្រឆាំងរដ្ឋាភិបាល ឆ្នាំ២០២០ និងឆ្នាំ២០២១ មានមនុស្សជាង២១០នាក់ហើយ ដែលត្រូវចោទប្រកាន់ពីបទប្រមាថព្រះមហាក្សត្រ៕

ដោយ៖ ឈាង

អានបន្ថែម៖ លោក ថាក់ស៊ីន ស្នើលើកពេលបទចោទប្រកាន់ប្រមាថព្រះមហាក្សត្រ ដោយសារតែឆ្លងកូវីដ

Related Topics:ប្រទេសថៃ