ឧក្រិដ្ឋជនអន្តរជាតិ ជាប់ក្នុងបញ្ជីខ្មៅរបស់ប៉ូលិស Interpol ត្រូវចាប់បាននៅ ថៃ

ឧក្រិដ្ឋជនអន្តរជាតិ ២នាក់ទៀត ដែលមានម្នាក់ ជាប់ក្នុងបញ្ជីខ្មៅរបស់ប៉ូលិស Interpol ត្រូវបានចាប់ខ្លួននៅប្រទេសថៃ ក្រោយសំងំលាក់ខ្លួនមួយរយៈ ក្នុងទីក្រុងបាងកក។

តាមការផ្សាយរបស់ Bangkok Post នៅថ្ងៃព្រហស្បតិ៍ ទី២៥ ខែមិថុនា ឆ្នាំ២០២៦ អ្នកទាំងពីរ សុទ្ធសឹងជាជនជាតិបារាំង ដោយម្នាក់មានឈ្មោះ Abdulrahim អាយុ ៣៥ឆ្នាំ និងម្នាក់ទៀតឈ្មោះ Mustafa អាយុ ៣៣ឆ្នាំ។

ក្នុងចំណោមអ្នកទាំងពីរ, ម្នាក់ឈ្មោះ Abdulrahim បានជាប់បញ្ជីខ្មៅរបស់ប៉ូលិសអន្តរជាតិ ដោយសារពាក់ព័ន្ធជាមួយក្រុមឧក្រិដ្ឋកម្មឆ្លងដែន ជួញដូរគ្រឿងញៀន និងលាងលុយកខ្វក់។ ពួកគេទាំងពីរ ក៏ស្ថិតក្នុងដីកាចាប់ខ្លួន របស់អាជ្ញាធរបារាំងផងដែរ។

កាលពីប៉ុន្មានថ្ងៃមុន ជនជាតិបារាំងដូចគ្នានេះ ដែលជាមេ Scammer នៅពីក្រោយបណ្តាញឆបោកតាមអនឡាញ បោកប្រាស់មនុស្សជិត ១ ០០០នាក់ បានលុយរាប់ពាន់លានបាត ត្រូវបានចាប់ខ្លួនក្នុងខេត្ត Phetchaburi។

រូបគេមានឈ្មោះ Dogan ជាមេក្រុមវិនិយោគបោកប្រាស់បែប Ponzi ឬគេស្គាល់ថា ជាប្រព័ន្ធស្រូបទាញលុយពីអ្នកថ្មី ឲ្យអ្នកចាស់ ជាប់បណ្តាញ ជាមួយក្រុមបងធំ មានមូលដ្ឋាននៅ ប្រទេសអាមីរ៉ាត់អារ៉ាប់រួម។

ឧក្រិដ្ឋជនវ័យ ៣៨ឆ្នាំរូបនេះ ត្រូវបានចាប់ខ្លួនក្នុងវីឡាមួយ ក្រោយជាប់សង្ស័យបោកមនុស្ស ជាង ៩០០នាក់ បានប្រាក់ប្រហែល ៧.៥ពាន់លានបាត ហើយឈ្មោះរបស់គេ ក៏ស្ថិតក្នុងបញ្ជីតាមចាប់ខ្លួនរបស់ប៉ូលិសអន្តរជាតិ (Interpol) ផងដែរ។

កាលពីថ្ងៃអង្គារ ប៉ូលិសថៃ បានទម្លាយតួលេខមិននឹកស្មានដល់ ដែលបង្ហាញថា ថៃ ចាប់បាន Scammer រហូតដល់ទៅជិត ៣០ ០០០នាក់ និងបង្ក្រាបលើក្រុមហ៊ុន ដែលជាប់ពាក់ព័ន្ធនឹងការឆបោក ចំនួន ១ ៤៥០ក្រុមហ៊ុន ក្នុងរយៈពេល ត្រឹម ៩ខែ។

ស្របពេលជាមួយគ្នានោះ ប៉ូលិសថៃ ក៏រឹបអូសបាន ទ្រព្យសម្បត្តិ និងលុយដែលជាប់ពាក់ព័ន្ធជាមួយ Scam ប្រហែល ២៤ពាន់លានបាត ផងដែរ៕

អត្ថបទ៖ សុវណ្ណ