នាវាទ័ពជើងទឹកអូស្រ្តាលី ចូលសំចតនៅកំពង់ផែស្វយ័តក្រុងព្រះសីហនុ ដើម្បីទស្សនកិច្ចនៅកម្ពុជា

នៅថ្ងៃទី០២ ខែកញ្ញា ឆ្នាំ២០២៤នេះ នាវាចម្បាំងកងទ័ពជើងទឹកអូស្រ្តាលីចំនួន១គ្រឿង បានចូលសំចតនៅកំពង់ផែស្វយ័តក្រុងព្រះសីហនុ ដើម្បីបំពេញទស្សនិកិច្ចនៅកម្ពុជា។

ស្វាគមន៍វត្តមានការមកដល់នាវាកងទ័ពជើងទឹកអូស្ត្រាលី នៅព្រឹកថ្ងៃនេះ មានវត្តមានទទួលដោយតំណាងបញ្ជាការដ្ឋានកងទ័ពជើងទឹកកម្ពុជា ព្រមទាំងតំណាងរដ្ឋបាលខេត្ត និងមន្ត្រីកងរាជអាវុធហត្ថខេត្តព្រះសីហនុ។

នាវាកងទ័ពជើងទឹកអូស្ត្រាលី១គ្រឿងនេះ មានឈ្មោះ PERTH_ FFH 157 (Anzac Class FFH)បណ្តោយប្រវែង ១១៨ម៉ែត្រ ទទឹងប្រវែង ១៤,៨ម៉ែត្រ ជម្រៅទឹកប្រវែង ៦,៤ម៉ែត្រ ទម្ងន់ផ្ទុក ៣,៩០០តោន និងមានឧទ្ធម្ភាគចក្រ MH60-Rabbit Seahawk ដែលមានមេបញ្ជារហោះហើរ លោកវរនាវីត្រី Patrick Mc Guire។

នាវាអូស្រ្តាលីនេះ មាននាវិកសរុបចំនួន ១៩០នាក់ (នាយនាវី៣២នាក់) ដឹកនាំដោយលោកវរនាវីទោ  BEN DALTON មេបញ្ជាការនាវា ហើយនាវានឹងនៅបំពេញទស្សនកិច្ចរហូតដល់ថ្ងៃទី៤ ខែកញ្ញា ឆ្នាំ២០២៤៕