ផ្លូវចូលវត្តធុតង្គចំការដូង កំពុងខូចខាតខ្លាំង

កំណាត់ផ្លូវចូលទៅកាន់វត្តធុតង្គចំការដូង ក្នុងភូមិខ្វា សង្កាត់ដង្កោ ខណ្ឌដង្កោ ប្រវែងជាង ២០០ម៉ែត្រ កំពុងរងការខូចខាតខ្លាំងដោយទឹកភ្លៀង ប្រជាពលរដ្ឋស្នើសុំអាជ្ញាធរជួយជួសជុលព្រោះជង្ហុកដក់ទឹកលិចខូចអស់ហើយ ដែលងាយនឹងគ្រោះថ្នាក់ចំពោះអ្នកដំណើរនូវពេលណាមួយ។

តាមការបញ្ជាក់ពីអ្នកស្រី សា រឹម ជាពលរដ្ឋរស់នៅបណ្ដោយផ្លូវនេះបានប្រាប់អោយដឹងថា ចំពោះផ្លូវនេះធ្លាប់ត្រូវបានគេជួសជុលចាក់បេតុងគ្មានសរសៃដែកដែរ កាលពីប៉ុន្មានឆ្នាំមុនមកម្ល៉េះ។ ប៉ុន្តែមកទល់ពេលនេះផ្លូវនេះចាប់ផ្តើមខូចម្តងបន្តិចៗ និងពេលមានភ្លៀងធ្លាក់ទឹកដក់តាមជង្ហុកយូរៗ បណ្តាលអោយខូចខាតកាន់តែធ្ងន់ធ្ងរ។

ពលរដ្ឋបានសំណូមពរអាជ្ញាធរជួយចុះជួសជុលកំណាត់ផ្លូវចូលវត្តធុតង្គនេះផង ព្រោះថាពេលមានភ្លៀងធ្លាក់កំណាត់ផ្លូវនេះ គឺមានការជន់លិចទឹកហូរចូលក្នុងផ្ទះ និងដក់ទឹកតាមជង្ហុក ធ្វើអោយពិបាកក្នុងការរស់នៅ និងធ្វើដំណើរ។

លោកស្រី សឿង សេរី ចៅសង្កាត់ដង្កោ ខណ្ឌដង្កោ មិនអាចសុំការឆ្លើយបំភ្លឺបានទេនៅរសៀលថ្ងៃទី២៤កញ្ញា ពាក់ព័ន្ធបញ្ហានេះ ខណៈទូរស័ព្ទចូល៣ដង តែគ្មានអ្នកលើក៕

អត្ថបទ៖ រដ្ឋា