មហាសេដ្ឋីឌូបៃចាយលុយ ៥០ លានដុល្លារទិញកោះដាច់តែឯង កុំឲ្យគេមើលប្រពន្ធស្លៀកប៊ីគីនី

រឿងរ៉ាវ​ជីវិត​ដ៏​ប្រណិត​របស់​ភរិយា​ជនជាតិ​ឌូ​បៃ បាន​បង្ក​ឲ្យមានការ​ភ្ញាក់ផ្អើល​ជា​ថ្មី​ម្តង​ទៀត​លើ​បណ្តាញ​សង្គម។ លើក​នេះ​ប្តី​អ្នក​មាន​មិន​ស្ទាក់ស្ទើរ​ចំណាយ​លុយ​៥០​លាន​ដុល្លារ​ ទិញ​កោះ​ឯកជន​ឲ្យភរិយាជាទីស្រលាញ់បានបង្ហាញកាយដើរលើឆ្នេរនោះតែម្នាក់ឯងទេ។

កាលពីពេលថ្មីៗនេះ Soudi Al Nadak អាយុ ២៦ឆ្នាំ បានទាក់ទាញការចាប់អារម្មណ៍យ៉ាងខ្លាំងនៅលើបណ្តាញសង្គម នៅពេលចែករំលែកវីដេអូអំពីកោះដែលស្វាមីរបស់នាងបានទិញជាអំណោយ។ នៅលើទំព័រ Instagram ផ្ទាល់ខ្លួន ដែលមានអ្នកតាមដាន ៣៣៦,០០០នាក់ នាងបានសរសេរថា «នៅពេលដែលអ្នកចង់ស្លៀកឈុតប៊ីគីនី ហើយប្តីមហាសេដ្ឋីរបស់អ្នកទិញកោះមួយឲ្យអ្នកដាច់ពីគេឯង»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Soudi Al Nadak ជា​ជនជាតិ​អង់គ្លេស ដែល​បច្ចុប្បន្ន​កំពុង​រស់នៅ​ក្នុង​ទីក្រុង​ឌូបៃ​ជាមួយ​ស្វាមី​អ្នកជំនួញ Jamal Al Nadak។ គូស្នេហ៍​មួយ​គូ​នេះ​បាន​ជួប​គ្នា​ពេល​ពួក​គេ​នៅ​ជា​និស្សិត ហើយ​បាន​រៀប​ការ​នៅ​ឆ្នាំ​២០២១ ។

យ៉ាងណា ចាប់តាំងពីរៀបការមក Soudi Al Nadak ត្រូវបានគេស្គាល់ថា​ មានជីវិតដ៏ប្រណិត និងឡូយឆាយជាមួយស្វាមីមហាសេដ្ឋីរបស់នាង។ នៅលើទំព័រ Instagram ផ្ទាល់ខ្លួន Soudi តែងតែបង្ហោះវីដេអូដែលមានចំណងជើងថា «​តើប្តីមហាសេដ្ឋីរបស់ខ្ញុំចំណាយលើខ្ញុំប៉ុន្មានសប្តាហ៍នេះ»”​? ដើម្បីកត់ត្រាអំណោយថ្លៃៗដែលនាងបានទទួលពីប្តី។ វីដេអូនីមួយៗមានអ្នកមើលច្រើនលើសលប់ជាមួយនឹងចំនួនទឹកប្រាក់ដ៏ច្រើន ចាប់ពី ៥ម៉ឺនដុល្លារ ដល់ ១លានដុល្លារ។

ចែករំលែកអំពីហេតុផលនៃការទិញកោះនេះ Soudi បាននិយាយថា នាងនិងស្វាមីមានគម្រោងវិនិយោគអស់រយៈពេលជាយូរមកហើយ។ យ៉ាងណាមិញ មូលហេតុចម្បងដែលធ្វើឲ្យស្វាមីសម្រេចចិត្តចំណាយលុយច្រើន ដោយសារតែចង់ឲ្យនាងមានសេរីភាព និងស្រួលស្លៀកប៊ីគីនី ដោយមិនខ្វល់ពីភ្នែកអ្នកដទៃ។ នាងថែមទាំងចែករំលែកជាមួយកាសែត Hindustan ថា «​វាជាអ្វីមួយដែលយើងកំពុងស្វែងរកការវិនិយោគមួយរយៈ ហើយប្តីរបស់ខ្ញុំចង់ឲ្យខ្ញុំមានអារម្មណ៍ថា មានសុវត្ថិភាពនៅលើឆ្នេរ នោះហើយជាមូលហេតុដែលគាត់បានទិញកោះមួយនេះ »។

មិនត្រឹមតែប៉ុណ្ណឹងនោះទេ Soudi Al Nadak ក៏បានបង្ហាញផងដែរថា កោះនេះមានតម្លៃ ៥០លានដុល្លារអាមេរិក និងមានទីតាំងនៅអាស៊ី។ ទោះ​ជា​យ៉ាង​ណា សម្រាប់​ហេតុផល​ផ្ទាល់​ខ្លួន អ្នក​មាន​ឥទ្ធិពល​រូប​នេះ​បដិសេធ​មិន​បង្ហាញ​ពី​ទីតាំង​ពិត​ប្រាកដ​របស់​នាងឡើយ។ ប៉ុន្តែនៅ​ខាងក្រោម​ការ​បង្ហោះមាន​មតិ​ជាច្រើន​បាន​សម្តែង​មន្ទិល​ចំពោះអ្វីដែលនាងបានបង្ហាញភ្នែកសាធារណៈ។ ក្រៅ​ពី​នេះ​​ក៏​មាន​មតិ​ជា​ច្រើន​រិះគន់​នាងថា បាន​បង្អួត​ទ្រព្យសម្បត្តិ​របស់​ខ្លួនហួសប្រមាណពេកជាពិសេសដល់មនុស្សជាច្រើនដែលខ្វះខាត៕

អត្ថបទ៖ សាង ស្រីល័ក្ខ

ចុចអាន៖ជារឿងកម្របំផុត ស្រ្តីចិនម្នាក់មានស្បូនពីរ សម្រាលបានកូនភ្លោះ