ចរាចរណ៍

គ្រោះថ្នាក់លើផ្លូវល្បឿនលឿនកើតឡើងភាគច្រើនមកពីបើកបរលើសល្បឿនកំណត់ និងការធ្វេសប្រហែសរបស់អ្នកបើកបរ

បានផុស

៦ ខែ មុន

នៅ

ថ្ងៃអាទិត្យ ៦ តុលា ២០២៤

ដោយ

គ្រោះថ្នាក់ចរាចរណ៍ដែលតែងតែកើតឡើងលើផ្លូវល្បឿនលឿនភាគច្រើន បណ្ដាលមកពីការបើកបរលើសល្បឿនកម្រិតកំណត់ និងការធ្វេសប្រហែសរបស់អ្នកបើកបរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅព្រឹកថ្ងៃទី ០៦ ខែតុលា ឆ្នាំ ២០២៤ នេះ លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឲ្យដឹងថា ការបើកបរលើសល្បឿនកម្រិតកំណត់ និងការធ្វេសប្រហែសមិនគោរពតាមការណែនាំពីរបៀបបើកបរជាបញ្ហាចម្បងបណ្តាលឲ្យកើតមានគ្រោះថ្នាក់ចរាចរណ៍នៅលើផ្លូវល្បឿនលឿន។ ការធ្វេសប្រហែស និងភាពព្រហើនរបស់អ្នកបើកបរខ្លះ តែងបានបង្កគ្រោះថ្នាក់ដល់ខ្លួនឯង និងអ្នកដទៃ ព្រមទាំងធ្វើឲ្យខូចខាតទ្រព្យសម្បត្តិក្រុមហ៊ុន។

សូមជម្រាបថា ក្នុងរយៈពេល ៣ ថ្ងៃ នាឱកាសបុណ្យភ្ជុំបិណ្ឌ មានករណីគ្រោះថ្នាក់ចរាចរណ៍នៅលើផ្លូវល្បឿនលឿនកើតឡើងចំនួន ៦ ករណី (មិនមានករណីស្លាប់ទេ) ដែលចំនួននេះតិចជាងឆ្នាំមុន ១ ករណី។

គួរបញ្ជាក់ផងដែរថា កាលពីវេលាម៉ោង ១៥ និង ៣៨ នាទីរសៀល ថ្ងៃទី ០៥ ខែតុលា ឆ្នាំ ២០២៤ ម្សិលមិញ មានករណីគ្រោះថ្នាក់ចរាចរណ៍ដោយរថយន្តម៉ាក ESCALADE ពណ៌ខ្មៅ ពាក់ផ្លាកលេខ ភ្នំពេញ 2CE-0567 អ្នកបើកបរឈ្មោះ XIONG YONGZHOU ភេទប្រុស ជនជាតិចិន អាយុ ៣២ ឆ្នាំ ធ្វើដំណើរក្នុងទិសដៅព្រះសីហនុទៅភ្នំពេញ បានប្រើប្រាស់ល្បឿនលឿន ក្នុងពេលមេឃកំពុងមានភ្លៀងធ្លាក់ខ្លាំងត្រង់ចំណុចផ្លូវកោង នៅចំណុចគីឡូម៉ែត្រ K141+700 ភូមិឬទ្ធី ១ ឃុំកែវផុស ស្រុកស្ទឹងហាវ ខេត្តព្រះសីហនុ បានរអិលជ្រុលចង្កូតបុករនាំងការពារទ្រូងផ្លូវ ហើយខ្ទាតចូលចំណែកផ្លូវក្នុងទិសដៅភ្នំពេញទៅព្រះសីហនុ បណ្តាលឲ្យរថយន្តមួយគ្រឿងទៀត កំពុងធ្វើដំណើរក្នុងទិសដៅភ្នំពេញទៅព្រះសីហនុ បុកពេញទំហឹងតែម្ដង ដែលមានម៉ាក FORD RANGER ពណ៌ខ្មៅ ពាក់ផ្លាកលេខ ភ្នំពេញ 2BI-0565 អ្នកបើកបរឈ្មោះ មិត្ត ប៊ុន ភេទប្រុស ជនជាតិខ្មែរ អាយុ ៤៨ ឆ្នាំ។

ក្នុងហេតុការណ៍គ្រោះថ្នាក់ចរាចរណ៍ខាងលើនេះដែរ មិនបណ្ដាលឲ្យមានមនុស្សរងរបួសនោះឡើយ ប៉ុន្តែរថយន្តរងការខូចខាតស្ទើរទាំងស្រុង និងរបាំងពុះចែកទ្រូងផ្លូវបាក់ជាច្រើនម៉ែត្រផងដែរ។

ជាចុងក្រោយ លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានអំពាវនាវដល់អ្នកបើកបរ សូមមានស្មារតីប្រុងប្រយ័ត្ន គោរពការបញ្ជាចរាចរណ៍ឲ្យបានខ្ជាប់ខ្ជួន និងមើលផ្ទាំង LED ដែលក្រុមហ៊ុនផ្លូវល្បឿនលឿនភ្នំពេញ-ព្រះសីហនុ បានជូនដំណឹងសារដាស់តឿន និងព័ត៌មានផ្សេងៗ៕

អត្ថបទ ៖ សុភា