ព័ត៌មានជាតិ

លោកអភិបាលខណ្ឌច្បារអំពៅ បញ្ជាក់ថា ទឹកនឹងស្រកឆាប់ៗ ខណៈស្ថានីយបូមទឹកកំពុងបូមទាំងថ្ងៃទាំងយប់

បានផុស

២ years មុន

នៅ

ថ្ងៃអាទិត្យ ៦ តុលា ២០២៤

ដោយ

លោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅ បានមានប្រសាសន៍ប្រាប់ កម្ពុជាថ្មី នាថ្ងៃទី ៦ ខែតុលា ឆ្នាំ ២០២៤ នេះថា បញ្ហាជំនន់ទឹកភ្លៀងដែលកំពុងលិចលង់នៅតំបន់ផ្សារបឹងព្រលឹត ស្ថិតក្នុងភូមិអូរអណ្តូងទី ១ សង្កាត់ព្រែកប្រា នាអំឡុងពេល ២ ថ្ងៃនេះ អាច និងស្រកទៅវិញនាពេលឆាប់ៗ នេះ បើសិនជាមេឃមិនធ្លាក់ភ្លៀងខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ចេង មុនីរ៉ា បញ្ជាក់ទៀតថា រយៈពេល ២ ថ្ងៃ ខណៈតំបន់មួយចំនួនក្នុងភូមិសាស្ត្រខណ្ឌច្បារអំពៅ ពិសេសផ្សារបឹងព្រលឹត គឺ លោកបានដឹកនាំក្រុមជំនាញ អាជ្ញាធរទាំងអស់ រួមទាំងអភិបាលរងខណ្ឌ លោកនាយការិយាល័យ ព្រមទាំងលោក លោកស្រីចៅសង្កាត់ ទាំង ៨ ឲ្យចុះស្តារសំរាមតាមមុខលូដែលកកស្ទះ ដើម្បីឲ្យទឹកហូរចូលលូបានលឿនទៅក្នុងលូធំ ទើបអាចឲ្យស្ថានីយបូមទឹក(ព្រែកបាំង) ស្ថិតនៅសង្កាត់ច្បារអំពៅទី ១ បានបូមចូលក្នុងទន្លេបាសាក់។

លោកអភិបាលខណ្ឌច្បារអំពៅ បញ្ជាក់បន្ថែមថា ចំពោះតំបន់ផ្សារបឹងព្រលឹតដែលលិចលង់ខ្លាំង គឺទាល់តែយកម៉ាស៊ីនបូមចេញពីប្រព័ន្ធលូតូចចូលទៅលូធំទើបអាចរំដោះទឹកបាន។ ដូច្នេះបើសិនជាមេឃមិនធ្លាក់ភ្លៀងខ្លាំងដូចថ្ងៃទី ៥ និងទី ៦ ខែតុលា នោះទេ គឺទឹកនឹងបានស្រក ដោយសារតែស្ថានីយបូមទឹកព្រែកបារាំង បានប្រឹងប្រែងបូមទាំងយប់ទាំងថ្ងៃនោះ។

ទន្ទឹមនឹងនេះ លោកអភិបាលខណ្ឌច្បារអំពៅ បានជំរុញឲ្យ លោក លោកស្រីចៅសង្កាត់ទាំង ៨ និងលោកមេភូមិទាំងអស់ ត្រូវដឹកនាំកម្លាំងចុះតាមខ្នងផ្ទះប្រជាពលរដ្ឋ ដើម្បីជួយជាកម្លាំងពេលលោកត្រូវការ៕

អត្ថបទ ៖ នរា

សូមទស្សនាវីដេអូខាងក្រោម ៖