សណ្តាប់ធ្នាប់លើដងផ្លូវជុំវិញបរិវេណផ្សារច្បារអំពៅ មានរបៀបរៀបរយល្អប្រសើរ ក្រោយគណៈកម្មការផ្សារបង្កើនការយកចិត្តទុកដាក់រៀបចំ

លោក គួច ចំណាន ប្រធានគណៈកម្មការគ្រប់គ្រងផ្សារច្បារអំពៅ បានឲ្យដឹងថា ដោយអនុវត្តតាមអនុសាសន៍ណែនាំរបស់ លោក ឃួង ស្រេង អភិបាលរាជធានីភ្នំពេញ ក៏ដូចជាក្រោមការចង្អុលបង្ហាញដឹកនាំពី លោក ម៉ូវ ម៉ានិត អភិបាលខណ្ឌច្បារអំពៅ ក្រុមការងារគណៈកម្មការផ្សារ តែងតែបែងចែកកម្លាំង ដើម្បីចុះរៀបចំ និង តាមដានជាប្រចាំអំពីការចូលរួមសហការល្អពីអាជីវករ លើការតាំងលក់ទំនិញរបស់ខ្លួន ទៅតាមគំនូសដែលបានកំណត់ ក្នុងគោលដៅរក្សារបៀបរៀបរយ ពិសេសការទុកផ្លូវធំទូលាយសម្រាប់ភ្ញៀវ និង អតិថិជន ថ្មើរជើង។

ក្រុមការងារគណៈកម្មការផ្សារច្បារអំពៅ បានបង្កើនការបន្តយកចិត្តទុកដាក់ក្នុងការរៀបចំសណ្តាប់ធ្នាប់លើដងផ្លូវជុំវិញបរិវេណផ្សាររបស់ខ្លួន ដើម្បីសណ្តាប់ធ្នាប់ និង របៀបរៀបរយល្អប្រសើរ។

ផ្សារច្បារអំពៅ គឺជាផ្សាររដ្ឋមួយ ក្នុងចំណោមផ្សាររដ្ឋទាំង ២៥ ក្នុងរាជធានីភ្នំពេញ និងជាផ្សារចំណាស់មួយ ក៏ប៉ុន្តែបានប្រែក្លាយ និង អភិវឌ្ឍន៍ខ្លួនមកជាផ្សារដែលស៊ីវិល័យមួយ តាមរយៈការផ្លាស់ប្តូរសំណង់អគារផ្សារ អមជាមួយការគិតគូររៀបចំបរិស្ថានអនាម័យ និង សណ្តាប់ធ្នាប់ល្អ ដែលជាកត្តាជំរុញឲ្យមានអ្នកលក់ដូរកាន់តែច្រើន ហើយភ្ញៀវកុះករ ក៏បន្តគាំទ្រជាប្រចាំថ្ងៃផងដែរ៕
អត្ថបទ ៖ សុភា