អង្គការណាតូនឹង​ធ្វើសមយុទ្ធ​ទ្រង់​ទ្រាយ​ធំ​ប្រចាំឆ្នាំសប្តាហ៍​ក្រោយ​ ខណៈរុស្ស៊ីគំរាមលោកខាងលិច

អង្គការណាតូនឹងធ្វើសមយុទ្ធ​ដ៏ធំមួយ​មិនធ្លាប់​មាន​ដែល​គ្រោងទុកនៅសប្តាហ៍ក្រោយ ​ប៉ុន្មាន​សប្តាហ៍បន្ទាប់ពីប្រធានាធិបតី វ្ល៉ាឌីមៀ ពូទីន បានប្រកាសការផ្លាស់ប្តូរគោលលទ្ធិនុយក្លេអ៊ែររបស់រុស្ស៊ី ដើម្បីបំបាក់ទឹកចិត្តសម្ព័ន្ធមិត្តលោកខាងលិចដែលគាំទ្រអ៊ុយក្រែន។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១១ខែកញ្ញានេះ។

សមយុទ្ធ​ដែល​គេ​ឲ្យ​ឈ្មោះថា «Stadfast Noon» នឹងចាប់ផ្តើមនៅថ្ងៃចន្ទសប្ដាហ៍ក្រោយ ក្នុងរយៈពេលប្រហែលពីរសប្តាហ៍ដឹកនាំដោយប្រទេសបែលហ្ស៊ិក និងហូឡង់ ដោយប្រើប្រាស់មូលដ្ឋានយោធា​៨​ និងមានការចូលរួមពីបុគ្គលិកយោធាចំនួន ២០០០នាក់ និងយន្តហោះ៦០​គ្រឿងមកពី១៣ប្រទេស ខណៈសមយុទ្ធ​នេះ​ត្រូវ​បាន​ធ្វើ​ឡើង​នៅ​ពេល​ដូច​គ្នា​ជា​រៀងរាល់​ឆ្នាំ​អស់​រយៈពេល​ជាង​មួយ​ទសវត្សរ៍​មក​ហើយ។

នៅក្នុង​សមយុទ្ធនេះក៏មានយន្តហោះទម្លាក់គ្រាប់បែក និងយន្តហោះចម្បាំងដែលអាចផ្ទុកក្បាលគ្រាប់នុយក្លេអ៊ែរចូលរួមផងដែរ ខណៈសមយុទ្ធ​នេះភាគច្រើន​ធ្វើ​នៅ​ចម្ងាយ​ប្រហែល​៩០០​គីឡូម៉ែត្រពី​ព្រំ​ដែន​​រុស្ស៊ី ក្នុង​សមុទ្រ​ខាងជើង។ មន្ត្រីអង្គការណាតូក៏បានជូនដំណឹងពីការធ្វើសមយុទ្ធនេះដល់ទីក្រុងមូស្គូ។

អគ្គលេខាធិការអង្គការណាតូថ្មី លោក Mark Rutte បានប្រាប់អ្នកយកព័ត៌មាននៅទីក្រុងឡុងថា៖​«នៅក្នុងពិភពលោកដែលមិនមានស្តិរភាព វាមានសារៈសំខាន់ណាស់ដែលយើងសាកល្បងការការពាររបស់យើង ហើយយើងពង្រឹងការការពាររបស់យើងដើម្បីឱ្យសត្រូវរបស់យើងដឹងថា ណាតូ បានត្រៀមខ្លួនរួចរាល់ហើយ និង​អាច​ឆ្លើយតបទៅនឹងការគំរាមកំហែង​ណាមួយ»។

ប្រមុខថ្មីរបស់អង្គការ ណាតូ រូបនេះក៏គាំទ្រអ៊ុយក្រែនជាអាទិភាពកំពូលផងដែរ ហើយនិយាយថា លោកនឹងធ្វើការជាមួយប្រធានាធិបតីអាមេរិកណាមួយ។

យោងតាមលោក Angus Lapsley ជំនួយការអគ្គលេខាធិការអង្គការ ណាតូ ទទួលបន្ទុកគោលនយោបាយ និងផែនការការពារជាតិ បាននិយាយថា សមយុទ្ធនេះមានគោលបំណងបង្ហាញថា សមត្ថភាពរបស់សម្ព័ន្ធភាពក្នុងការទប់ទល់នឹងការគំរាមកំហែងណាមួយចំពោះប្រទេសសមាជិកទាំង៣២គឺមានភាពរឹងមាំ។

ជាមួយគ្នានេះអង្គការណាតូ បាននឹងកំពុងតាមដានការការរីកចម្រើនរបស់កូរ៉េខាងជើងជាមហាអំណាចនុយក្លេអ៊ែរ ការពង្រីក​យ៉ាងឆាប់រហ័សនៃសមត្ថភាពនុយក្លេអ៊ែររបស់ចិន និងការអភិវឌ្ឍន៍នៅអ៊ីរ៉ង់ ប៉ុន្តែជាក់ស្តែងអ្វីដែលយើងព្រួយបារម្ភបំផុតគឺរុស្ស៊ី។

លោកបាននិយាយថា ទីក្រុងមូស្គូបាននឹងកំពុងវិនិយោគកងកម្លាំងនុយក្លេអ៊ែររបស់ខ្លួន ជាមួយនឹងការបង្កើនល្បឿននៃអាំងតង់ស៊ីតេក្នុងរយៈពេលពីរឆ្នាំចុងក្រោយនេះ និងបានកត់ថាសម្គាល់ថាថ្មីៗនេះ ទីក្រុងមូស្គូទំនងជាមានការប៉ុនប៉ងច្បាស់លាស់មួយលើណាតូជុំវិញការគាំទ្រអ៊ុយក្រែន។

លោកពូទីន បានគំរាមកំហែងលោកខាងលិចជាញឹកញាប់ជាមួយនឹងឃ្លាំងអាវុធនុយក្លេអ៊ែររបស់រុស្ស៊ី។ នៅក្នុងការព្រមានដ៏ខ្លាំងក្លាថ្មីមួយកាលពីចុងខែមុន លោក ពូទីន បាននិយាយថា ការវាយប្រហារធម្មតាលើប្រទេសរុស្ស៊ីដោយប្រទេសណាមួយដែលមានការគាំទ្រពីមហាអំណាចនុយក្លេអ៊ែរនឹងត្រូវបានចាត់ទុកថាជាការវាយប្រហាររួមគ្នា។ ការគម្រាមកំហែងនេះគឺចង់រារាំងសហរដ្ឋអាមេរិក និងសម្ព័ន្ធមិត្តមិនឱ្យអនុញ្ញាតឱ្យអ៊ុយក្រែនវាយលុកចូលទឹកដីរុស្ស៊ីដោយប្រើអាវុធរយៈចម្ងាយឆ្ងាយ៕

អត្ថបទ៖ ប៊ុន សុភាព