ព័ត៌មានអន្ដរជាតិ

អ៊ីស្រាអែល ខ្សឹបប្រាប់អាមេរិកថា ខ្លួននឹងមិនវាយរោងចក្រប្រេង ឬនុយក្លេអ៊ែរអ៊ីរ៉ង់ទេ

បានផុស

២ years មុន

នៅ

ថ្ងៃអង្គារ ១៥ តុលា ២០២៤

ដោយ

Chheang

ប្រព័ន្ធផ្សព្វផ្សាយធំៗរបស់អាមេរិកចំនួន២គឺ Washington Post និង The Wall Street Journal បានចុះផ្សាយកាលពីថ្ងៃទី១៤ខែតុលាថា គម្រោងសងសឹករបស់អ៊ីស្រាអែលទៅលើអ៊ីរ៉ង់ នឹងមិនមានគោលដៅវាយប្រហាររោងចក្រប្រេង ឬក៏នុយក្លេអ៊ែរនោះឡើយ។

លោក Joe Biden និងលោក Benjamin Netanyahu (រូបភាព៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពដែលបង្ហើបប្រាប់ Washington Post បានឲ្យដឹងថា នាយករដ្ឋមន្ត្រីអ៊ីស្រាអែល លោក Benjamin Netanyahu បានធានាអះអាងប្រាប់សេតវិមានថា ការវាយសងសឹកដែលខ្លួនកំពុងពិចារណា នឹងផ្ដោតសំខាន់លើតែទីតាំងយោធាក្នុងប្រទេសអ៊ីរ៉ង់តែប៉ុណ្ណោះ។

ចំណែកឯ The Wall Street Journal បានស្រង់សម្ដីពីប្រភពរបស់ខ្លួន និងរាយការណ៍ថា ការអះអាងនេះ ធ្វើឡើងនៅក្នុងការហៅទូរសព្ទរវាងលោក ចូ បៃដិន ប្រធានាធិបតីអាមេរិក និងលោក Netanyahu កាលពីសប្ដាហ៍មុន ព្រមទាំងកិច្ចសន្ទនាកាលពីពេលថ្មីៗរវាងលោក Lloyd Austin រដ្ឋមន្ត្រីការពារជាតិអាមេរិក និងលោក Yoav Gallant រដ្ឋមន្ត្រីការពារជាតិអ៊ីស្រាអែល។

អ៊ីស្រាអែល បានប្ដេជ្ញាវាយសងសឹក បន្ទាប់ពីអ៊ីរ៉ង់បានផ្លោងមីស៊ីលប្រមាណ២០០គ្រាប់ចូលទៅក្នុងទឹកដីរបស់ខ្លួន កាលពីថ្ងៃទី១ខែតុលា ដែលជាការឆ្លើយតបទៅនឹងការសម្លាប់មេដឹកនាំរបស់ក្រុមសកម្មប្រយុទ្ធដែលមានការគាំទ្រដោយអ៊ីរ៉ង់ ព្រមទាំងការសម្លាប់មេបញ្ជាការម្នាក់នៃកងឆ្មាំបដិវត្តន៍អ៊ីរ៉ង់។

ក្នុងឆ្នាំ២០២៤ អ៊ីរ៉ង់ បានធ្វើការវាយប្រហារដោយផ្ទាល់ទៅលើអ៊ីស្រាអែលចំនួន២លើក ដោយលើកដំបូងបានកើតឡើងកាលពីខែមេសា ដោយកាលណោះអ៊ីរ៉ង់ថា វាជាការឆ្លើយតបនឹងការវាយប្រហាររបស់អ៊ីស្រាអែលទៅលើស្ថានកុងស៊ុលរបស់ខ្លួននៅក្នុងរដ្ឋធានី Damascus ប្រទេសស៊ីរី។

ប្រធានាធិបតីអាមេរិក បានព្រមានអ៊ីស្រាអែលកុំឲ្យវាយប្រហារសងសឹកទៅលើរោងចក្រប្រេង ឬក៏រោងចក្រនុយក្លេអ៊ែររបស់អ៊ីរ៉ង់ ដើម្បីបញ្ចៀសការរីកសាយភាយកាន់តែធំឡើងនៃសង្គ្រាមក្នុងតំបន់ ក៏ដូចជាការធ្វើឲ្យតម្លៃថាមពលនៅលើពិភពលោកមានការកើនឡើងខ្លាំង៕

ដោយ៖ ឈាង