លោក JD Vance ថា អំពើហិង្សាត្រូវតបតដោយហិង្សា ក្រោយ អាមេរិក​វាយប្រហារលើអុីរ៉ង់​ជាថ្មី​​

បន្ទាប់ពីអាមេរិក បានបើកការវាយប្រហារលើ​ទីតាំង​ដ្រូន ​រាដា និង កន្លែង​ស្តុក​​អាវុធ​របស់​អុីរ៉ង់​​​ អនុប្រធានាធិបតីអាមេរិក លោក JD Vance បាន​ចេញ​មក​ព្រមានទីក្រុងតេហេរ៉ង់ថា ទីក្រុងវ៉ាស៊ីនតោននឹងមានវិធានការតឹងរ៉ឹងបំផុត ប្រសិនបើអំពើហិង្សានៅតែបន្តកើតមាន។ នេះបើយោងតាមការចេញផ្សាយពីសារព័ត៌មាន timesofisrael។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បញ្ជាការដ្ឋានកណ្តាលរបស់អាមេរិក (CENTCOM) ដែលជាទីភ្នាក់ងារប្រតិបត្តិការយោធារបស់អាមេរិកនៅមជ្ឈិមបូព៌ា បានប្រកាសកាលពីថ្ងៃទី ២៦ ខែមិថុនា ជុំវិញ​ការការវាយប្រហារជាបន្តបន្ទាប់ លើគោលដៅជាច្រើន​នៅអុីរ៉ង់។ បើតាមទីក្រុងវ៉ាស៊ីនតោន ការ​វាយ​ប្រហារ​នេះធ្វើឡើងដើម្បីឆ្លើយតបទៅនឹងការដែលអុីរ៉ង់បានវាយប្រហារលើនាវាដឹកទំនិញ ដែលកំពុងធ្វើដំណើរឆ្លងកាត់ច្រកសមុទ្រ Hormuz។

លោកអនុប្រធានាធិបតីអាមេរិក បានសរសេរនៅលើបណ្តាញសង្គម X បន្ទាប់ពីការវាយប្រហារតាមអាកាសលើអុីរ៉ង់ថា «អុីរ៉ង់បានចុះហត្ថលេខាលើបទឈប់បាញ់។ យើងបានគោរពវា។ ប្រសិនបើពួកគេមានការខ្វែងគំនិតគ្នាលើរបៀបអនុវត្តអនុស្សរណៈនេះ ពួកគេអាចលើកទូរស័ព្ទជជែកគ្នាបាន។ ប៉ុន្តែ អំពើហិង្សានឹងត្រូវឆ្លើយតបទៅវិញដោយអំពើហិង្សាដូចគ្នា»។

យ៉ាងណា កងឆ្មាំបដិវត្តន៍ឥស្លាមអុីរ៉ង់ (IRGC) ឯណោះវិញ បានថ្កោលទោសការវាយប្រហារតាមអាកាសរបស់អាមេរិក លើគោលដៅក្នុងប្រទេសខ្លួន ដោយនិយាយថា ទីក្រុងវ៉ាស៊ីនតោនបានរំលោភលើការប្តេជ្ញាចិត្តរបស់ខ្លួននៅក្នុងអនុស្សរណៈនៃការយោគយល់គ្នា (MoU) ដែលបានចុះហត្ថលេខាជាមួយទីក្រុងតេហេរ៉ង់កាលពីសប្តាហ៍មុន។

ក្រុម IRGC បានប្រកាសបន្ទាប់ពីបញ្ជាក់ថា ខ្លួនបានវាយប្រហារលើទីតាំងយោធាអាមេរិកនៅក្នុងតំបន់ ដើម្បីសងសឹកវិញ ប៉ុន្តែមិនបានបញ្ជាក់ពីទីតាំងជាក់លាក់នោះទេថា ប្រសិនបើការឈ្លានពាននៅតែបន្ត យើងនឹងឆ្លើយតបវិញយ៉ាងខ្លាំងក្លា និងក្នុងលក្ខណៈទ្រង់ទ្រាយធំជាងមុន។

គួររំលឹកថា អុីរ៉ង់ និងអាមេរិក កាលពីថ្ងៃទី ១៧ ខែមិថុនា បានចុះហត្ថលេខាលើអនុស្សរណៈនៃការយោគយល់គ្នាមួយ ដើម្បីបញ្ចប់ជម្លោះដែលបានអូសបន្លាយជាងបីខែ ដែលនេះជាការបើកផ្លូវសម្រាប់ការចរចារយៈពេល ៦០ ថ្ងៃ ដើម្បីដោះស្រាយបញ្ហានានា ដូចជាកម្មវិធីនុយក្លេអ៊ែររបស់អុីរ៉ង់ និងការលើកលែងទណ្ឌកម្មជាដើម។

ទោះបីជាមានកិច្ចព្រមព្រៀងនេះក៏ដោយ ក៏ភាគីទាំងពីរនៅតែបន្តវាយប្រហារគ្នាទៅវិញទៅមក ហើយមិនទាន់បានព្រមព្រៀងគ្នាលើបញ្ហាច្រកសមុទ្រ នោះឡើយ។ ខណៈដែលអាមេរិកនិយាយថា អុីរ៉ង់បានធានាអះអាងថានឹងមិនយកកម្រៃពីនាវាដែលឆ្លងកាត់ច្រកសមុទ្រនេះទេ ប៉ុន្តែអុីរ៉ង់ និងអូម៉ង់ បាននិយាយថា ពួកគេនឹងសិក្សាអំពីតម្លៃដែលត្រូវប្រមូលពីសេវាកម្មគ្រប់គ្រងច្រកសមុទ្រ ដោយបញ្ជាក់ពីអធិបតេយ្យភាពរបស់ពួកគេលើផ្លូវទឹកដ៏សំខាន់មួយនេះ៕

អត្ថបទ ៖ សាង ស្រីល័ក្ខ

អាមេរិក បើកការវាយ​​ប្រហារ​លើអ៊ីរ៉ង់ ក្រោយកប៉ាល់​មួយគ្រឿង ត្រូវដ្រូនបុកចំនៅច្រកសមុទ្រ Hormuz