អុីរ៉ង់ រឹតបន្តឹងការគ្រប់គ្រងច្រក Hormuz និងព្រមានកប៉ាល់ ដែលមិនព្រមដើរតាមផ្លូវរបស់ខ្លួន

ប្រមុខការទូតជាន់ខ្ពស់អុីរ៉ង់ បានព្រមានកាលពីថ្ងៃទី២៨ ខែមិថុនា ថា រាល់ការប៉ុនប៉ងណាមួយរបស់កប៉ាល់ដឹកទំនិញ ក្នុងការបើកវាងផ្លូវនាវាចរណ៍ដែលអុីរ៉ង់កំណត់នៅច្រកសមុទ្រ Hormuz នឹង «បង្កើនភាពតានតឹង» នៅក្នុងតំបន់មជ្ឈិមបូព៌ា ខណៈដែលកងកម្លាំងអាមេរិក-អុីរ៉ង់ កំពុងវាយប្រហារ​គ្នាទៅវិញទៅមក នៅលើផ្លូវទឹកដ៏សំខាន់មួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមភ្នាក់ងារ AFP, រដ្ឋមន្ត្រីការបរទេសអុីរ៉ង់ លោក Abbas Araghchi បានប្រកាសថា៖​« រាល់ការប៉ុនប៉ងណាមួយ​ក្នុងការ​បង្កើតការរៀបចំថ្មី ឬដាច់ដោយឡែកពីគ្នា ធៀបនឹងអ្វីដែលកំពុងអនុវត្តដោយសាធារណរដ្ឋឥស្លាម​អុីរ៉ង់​ នឹង​​នាំ​ទៅរក​ស្ថានភាពកាន់តែស្មុគស្មាញ រួមទាំងការពន្យារពេលក្នុងការបើកច្រក Hormuz ឡើងវិញ មានតែបង្កើនភាពតានតឹងតែប៉ុណ្ណោះ»។

លោក ក៏គូសបញ្ចាក់បន្ថែមថា «ខ្ញុំសូមជំរុញឲ្យគ្រប់ភាគី គោរពតាមអនុស្សរណៈនៃការយោគយល់គ្នា (MoU) ហើយមិនត្រូវបណ្តោយឲ្យអនុស្សរណៈនេះ ងាកចេញពីគន្លងរបស់វាឡើយ»។

នៅក្នុងសន្និសីទសារព័ត៌មានរួមគ្នា, រដ្ឋមន្ត្រីការបរទេសអុីរ៉ាក់ លោក Fuad Hussein បានប្រាប់សមភាគី​អុីរ៉ង់ លោក Araghchi ថា វាមានសារៈសំខាន់ណាស់ក្នុងការបើកច្រកសមុទ្រឡើងវិញ និងលើកលែងការបិទខ្ទប់ផ្លូវទឹកពីសំណាក់កងទ័ពជើងទឹកអាមេរិកមកលើអុីរ៉ង់។ លោក បានបន្ថែមថា អុីរ៉ាក់មិនគាំទ្រការពង្រីកទំហំ​​នៃ​សង្គ្រាមទៅលើបណ្តាប្រទេសឈូងសមុទ្រឡើយ ហើយក៏មិនគាំទ្រការវាយប្រហារលើប្រទេសអុីរ៉ង់ដូចគ្នា​។

ទោះជាយ៉ាងណា កងឆ្មាំបដិវត្តន៍ឥស្លាមអុីរ៉ង់ (IRGC) បានប្រកាសនៅថ្ងៃអាទិត្យថា ពួកគេកំពុងចាត់វិធានការ ដើម្បីគ្រប់គ្រងចរាចរណ៍នៅច្រកសមុទ្រ ដែលនៅក្នុងពេលសន្តិភាព ផ្លូវទឹកនេះគឺជាកន្លែងឆ្លងកាត់នៃប្រេង និងឧស្ម័នធម្មជាតិរាវ (LNG) ប្រហែលមួយភាគប្រាំនៃពិភពលោក។ ក្រុម IRGC បានព្រមានថា នាវាទាំងឡាយណាដែលរំលោភបំពាន នឹងត្រូវដោះស្រាយយ៉ាងម៉ឺងម៉ាត់ជាងមុន។

លោក Mohammad Mokhber ទីប្រឹក្សាមេដឹកនាំកំពូលរបស់អុីរ៉ង់ បានសរសេរនៅលើបណ្តាញសង្គម X ថា ដរាបណាអុីរ៉ង់នៅតែគ្រប់គ្រងច្រកសមុទ្រនេះ «ក្តីស្រមៃចង់​ធ្វើ​អនុត្តរភាពរបស់ទីក្រុងវ៉ាស៊ីនតោននៅក្នុងតំបន់ នឹងមិនអាចសម្រេច​ឡើយ»។

យ៉ាងណាមិញ ការវាយប្រហារសងសឹកគ្នាទៅវិញទៅមកនេះ បានសង្កត់ធ្ងន់ឲ្យឃើញពីភាពមិនច្បាស់លាស់នៃកិច្ចព្រមព្រៀងមួយ ដែលសម្របសម្រួលដោយប៉ាគីស្ថាន និង​ប្រទេសកាតា​ សំដៅបញ្ចប់សង្គ្រាមបង្កឡើង​ដោយអាមេរិក និងអុីស្រាអែល កាលពីខែកុម្ភៈ ដែលសង្គ្រាមនោះបានរំខានដល់ការដឹកជញ្ជូនតាមកប៉ាល់ឆ្លងកាត់ច្រកសមុទ្រ និងធ្វើឲ្យទីផ្សារថាមពលសកលមានការរង្គោះរង្គើ។

ទីក្រុងតេហេរ៉ង់ នៅតែបន្តប្រកាន់ជំហររឹងត្អឹងក្នុងការគ្រប់គ្រងការធ្វើដំណើរឆ្លងកាត់ច្រកសមុទ្រដ៏សំខាន់មួយនេះ ពោលគឺជាសិទ្ធិគ្រប់គ្រងមួយដែលខ្លួនមិនធ្លាប់មានទាល់តែសោះមុនពេលសង្គ្រាមផ្ទុះឡើង។ នាពេលបច្ចុប្បន្ននេះ អុីរ៉ង់បានបង្ខំឲ្យកប៉ាល់ដែលឆ្លងកាត់ច្រកសមុទ្រនេះ ត្រូវតែធ្វើដំណើរតាមច្រកផ្លូវកៀកនឹងឆ្នេរសមុទ្ររបស់ខ្លួន ទោះបីជាក្នុងសប្តាហ៍នេះ មានកប៉ាល់រាប់សិបគ្រឿងបានបើកបរនៅខាងផ្នែកម្ខាងទៀតនៃផ្លូវទឹក ដោយសារតែពួកគេចង់ធ្វើដំណើរតាមបណ្តោយឆ្នេរសមុទ្រអូម៉ង់ក៏ដោយ។

គួរបញ្ជាក់ដែរថា នៅក្នុងខ្លឹមសារអនុស្សរណៈនៃការយោគយល់គ្នា ដែលបានព្រមព្រៀងគ្នានៅក្នុងខែនេះ ក្នុងគោលបំណងបញ្ចប់សង្គ្រាមជាស្ថាពរ អុីរ៉ង់បានយល់ព្រមលើ ការឆ្លងកាត់ដោយសុវត្ថិភាពសម្រាប់នាវាពាណិជ្ជកម្មដោយមិនគិតថ្លៃ ក្នុងរយៈពេលតែ ៦០ ថ្ងៃប៉ុណ្ណោះ ពីតំបន់ឈូងសមុទ្រទៅកាន់សមុទ្រអូម៉ង់ និងច្រាសមកវិញ នៅក្នុងច្រកសមុទ្រនេះ៕

អត្ថបទ ៖ សាង ស្រីល័ក្ខ

លោក JD Vance ថា អំពើហិង្សាត្រូវតបតដោយហិង្សា ក្រោយ អាមេរិក​វាយប្រហារលើអុីរ៉ង់​ជាថ្មី​​