ព័ត៌មានអន្ដរជាតិ

អាមេរិក អនុម័តការលក់សព្វាវុធតម្លៃ ២ពាន់លានដុល្លារឲ្យតៃវ៉ាន់

បានផុស

៥ ខែ មុន

នៅ

ថ្ងៃសៅរ៍ ២៦ តុលា ២០២៤

ដោយ

Chheang

មន្ទីរបញ្ចកោណ បានប្រកាសកាលពីថ្ងៃសុក្រថា សហរដ្ឋអាមេរិកបានអនុម័តកញ្ចប់លក់សព្វាវុធដ៏មានសក្ដានុពលចំនួន ២ពាន់លានដុល្លារទៅឲ្យកោះតៃវ៉ាន់ ដោយក្នុងនោះមានទាំងប្រព័ន្ធខែលការពារដែនអាកាសកម្រិតខ្ពស់ NASAMS។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសចិន បាននិងកំពុងបង្កើនសម្ពាធយោធាប្រឆាំងនឹងកោះតៃវ៉ាន់ រួមទាំងរៀបចំសមយុទ្ធសង្គ្រាមកាលពីសប្តាហ៍មុន ដែលវាជាសមយុទ្ធលើកទី២ហើយចាប់តាំងពីលោក Lai Ching-te ឡើងកាន់តំណែងជាប្រធានាធិបតីតៃវ៉ាន់កាលពីខែឧសភា។

ទីភ្នាក់ងារសហប្រតិបត្តិការសន្តិសុខការពារជាតិរបស់មន្ទីរបញ្ចកោណ បាននិយាយថា កញ្ចប់លក់ថ្មីនេះមានទឹកប្រាក់ចំនួន ១,១៦ពាន់លានដុល្លារសម្រាប់ប្រព័ន្ធមីស៊ីល និង ៨២៨លានដុល្លារសម្រាប់ប្រព័ន្ធរ៉ាដា។

សេចក្តីថ្លែងការណ៍របស់មន្ទីរបញ្ចកោណ បានរៀបរាប់ថា៖ «ការលក់ដែលបានស្នើឡើងនេះបម្រើផលប្រយោជន៍ជាតិ សេដ្ឋកិច្ច និងសន្តិសុខរបស់សហរដ្ឋអាមេរិក ដោយគាំទ្រដល់កិច្ចខិតខំប្រឹងប្រែងជាបន្តបន្ទាប់របស់អ្នកទិញ ដើម្បីធ្វើទំនើបកម្មកងកម្លាំងប្រដាប់អាវុធរបស់ខ្លួន និងដើម្បីរក្សានូវសមត្ថភាពការពារដ៏គួរឲ្យទុកចិត្ត។ ការលក់ដែលបានស្នើឡើងនឹងជួយកែលម្អសុវត្ថិភាពរបស់អ្នកទទួល និងជួយក្នុងការរក្សាស្ថិរភាពនយោបាយ តុល្យភាពយោធា និងវឌ្ឍនភាពសេដ្ឋកិច្ចក្នុងតំបន់»។

ប្រភពរដ្ឋាភិបាលអាមេរិក បានប្រាប់ក្នុងលក្ខខណ្ឌមិនបញ្ចេញឈ្មោះថា ប្រព័ន្ធខែលការពារមីស៊ីល NASAMS គឺជាអាវុធថ្មីសម្រាប់តៃវ៉ាន់ ដោយក្នុងតំបន់មានតែប្រទេសចំនួន២ប៉ុណ្ណោះដែលកំពុងប្រើប្រាស់ NASAMS គឺ ប្រទេសអូស្ត្រាលី និងឥណ្ឌូណេស៊ី៕

ដោយ៖ ឈាង