ព័ត៌មានអន្ដរជាតិ

ថៃបង្កើនថ្ងៃឈប់សម្រាកជាតិ ដើម្បីជំរុញវិស័យទេសចរណ៍

បានផុស

២ years មុន

នៅ

ថ្ងៃអង្គារ ១៩ វិច្ឆិកា ២០២៤

ដោយ

គណៈរដ្ឋមន្ត្រីថៃកាលពីសប្ដាហ៍មុន បានអនុម័តលើការបន្ថែមថ្ងៃឈប់សម្រាកសាធារណៈសម្រាប់ឆ្នាំក្រោយ និងខែមករា ឆ្នាំ ២០២៦ ដើម្បីជំរុញវិស័យទេសចរណ៍ និងសេដ្ឋកិច្ចទាំងមូល។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧបនាយករដ្ឋមន្ត្រីថៃ លោក Phumtham Wechayachai បាននិយាយបន្ទាប់ពីកិច្ចប្រជុំនៅសប្ដាហ៍មុនថា គណៈរដ្ឋមន្ត្រីបានអនុម័តលើសំណើសម្រាប់ការបន្ថែមថ្ងៃឈប់សម្រាក (១ ថ្ងៃនៅខែមិថុនា និង១ថ្ងៃនៅខែសីហា) នៅឆ្នាំក្រោយ និង ១ ថ្ងៃនៅខែមករា ឆ្នាំ ២០២៦។ ការបន្ថែមនេះ ធ្វើឱ្យថ្ងៃឈប់សម្រាកជាតិថៃ មានចំនួន ២១ ថ្ងៃ ក្នុងឆ្នាំ ២០២៥។

គួរគូសបញ្ជាក់ថា ថៃដែលពឹងផ្អែកលើវិស័យទេសចរណ៍ បានដាក់ចេញនូវថ្ងៃឈប់សម្រាកបន្ថែមក្នុងរយៈពេលប៉ុន្មានឆ្នាំចុងក្រោយនេះ ដើម្បីជួយដល់ទេសចរណ៍ឱ្យស្ទុះងើបឡើងវិញពីជំងឺរាតត្បាតកូវីដ១៩ ដោយវិស័យនេះរួមចំណែកប្រមាណ ១២ ភាគរយ នៃផលិតផលក្នុងស្រុកសរុប និងជិត១/៥នៃការងាររបស់ប្រទេស។

អ្នកនាំពាក្យរងរដ្ឋាភិបាល លោក Sasikan Wattanachan បាននិយាយថា ការប្រកាសថ្ងៃឈប់សម្រាកបន្ថែម ក៏ស្របនឹងគោលនយោបាយរបស់រដ្ឋាភិបាលថៃ ដែលកំណត់ឆ្នាំក្រោយថាជាឆ្នាំទេសចរណ៍ និងកីឡាផងដែរ។

គួរគូសបញ្ជាក់ថា រហូតមកដល់ពេលនេះ ភ្ញៀវទេសចរអន្តរជាតិប្រហែល ៣០ លាននាក់ បានមកលេងប្រទេសថៃ ដែលកំណត់គោលដៅទាក់ទាញភ្ញៀវទេសចរឱ្យបាន ៣៦,៧ លាននាក់នៅឆ្នាំនេះ។ ក្នុងឆ្នាំ ២០១៩ ថៃបានកត់ត្រាពីចំនួនភ្ញៀវទេសចរអន្តរជាតិរហូតជិតដល់ ៤០ លាននាក់ ដោយកើបប្រាក់ចំណូលប្រមាណ ៦០ ប៊ីលានដុល្លារ មុនវិស័យនេះចាប់ផ្ដើមធ្លាក់ចុះដុនដាបដោយសារតែវិបត្តិកូវីដ១៩៕