ព័ត៌មានអន្ដរជាតិ

កម្ចីមិនដំណើរការថៃ ហក់ឡើងខ្ពស់បំផុតក្នុងរយៈពេល ៣ ឆ្នាំ ដោយសារបញ្ហាសេដ្ឋកិច្ច

បានផុស

២ years មុន

នៅ

ថ្ងៃពុធ ២៧ វិច្ឆិកា ២០២៤

ដោយ

ប្រាក់កម្ចីមិនដំណើរការរបស់ធនាគារថៃនៅត្រីមាសមុន បានកើនឡើងដល់កម្រិតខ្ពស់បំផុតក្នុងរយៈពេល៣ឆ្នាំ នៅពេលដែលក្រុមហ៊ុនសាជីវកម្ម និងបុគ្គលឯកជន ជួបបញ្ហាលំបាកក្នុងការសងបំណុល ទោះបីជាធនាគារកណ្ដាលថៃបានប្រកាសពីវឌ្ឍនភាពនៃកិច្ចពិភាក្សាជាមួយក្រសួងហិរញ្ញវត្ថុ លើវិធានការបន្ធូរបន្ថយក៏ដោយ។ នេះបើតាមការចុះផ្សាយរបស់សារព័ត៌មាន Bloomberg។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួយការទេសាភិបាលធនាគារកណ្ដាលថៃ លោកស្រី Suwannee Jatsadasak បានប្រាប់សន្និសីទសារព័ត៌មានកាលពីថ្ងៃអង្គារថា នៅត្រីមាសទី៣ កម្ចីមិនដំណើរការរបស់ធនាគារពាណិជ្ជថៃ មានចំនួន ២,៩ ភាគរយ នៃកម្ចីសរុប ពោលគឺកើនឡើងពី ២,៨៤ ភាគរយ ក្នុងត្រីមាសទី២ ដែលធ្វើឱ្យកើនឡើងបំផុតរាប់តាំងពីត្រីមាសទី៣ នៃឆ្នាំ ២០២១។

កន្លងមក លោកស្រីនាយករដ្ឋមន្ត្រី ផែតងតាន ស៊ីណាវ៉ាត្រា បានសន្យាថានឹងកាត់បន្ថយកម្រិតបំណុលគ្រួសារខ្ពស់ដែលធ្វើឱ្យកម្ចីមិនដំណើរការកាន់តែអាក្រក់ទៅៗ និងបង្កការស្ទាក់ស្ទើរពីធនាគារក្នុងការផ្ដល់ឥណទានបន្ថែមទៀតដល់អ្នកខ្ចីសម្រាប់ទិញឡាន ឬផ្ទះជាដើម។ កាលពីសប្ដាហ៍មុន រដ្ឋាភិបាលថៃបានពិភាក្សាអំពីផែនការរៀបចំរចនាសម្ព័ន្ធឡើងវិញក្នុងតម្លៃ ១,៣ ទ្រីលានបាត លើកម្ចីទិញផ្ទះ រថយន្ត និងកម្ចីផ្ទាល់ខ្លួន ដោយអាចរួមបញ្ជូលទាំងរយៈពេលសងត្រឡប់យូរជាងមុន និងការព្យួរការប្រាក់ជាដើម។

លោកស្រី Suwannee មានថ្លែងថា៖ «យើងនៅតែត្រូវតាមដានយ៉ាងដិតដល់នូវលទ្ធភាពទូទាត់បំណុលរបស់អាជីវកម្មខ្នាតតូច និងមធ្យម និងម្ចាស់ផ្ទះដែលមានប្រាក់ចំណូលតិច ហើយការខ្ចីប្រាក់ច្រើន។ អាជីវកម្មមួយចំនួនក៏កំពុងប្រឈមមុខនឹងបញ្ហារចនាសម្ព័ន្ធ និងការប្រកួតប្រជែងទាបផងដែរ»។

គួរគូសបញ្ជាក់ថា សេដ្ឋកិច្ចថៃ ដែលជាប្រទេសមានសេដ្ឋកិច្ចធំទី២នៅអាស៊ីអាគ្នេយ៍ កំពុងប្រឈមមុខនឹងកម្រិតខ្ពស់នៃបំណុលគ្រួសារ ដែលជាបន្ទុកធ្វើឱ្យមនុស្សស្ទាក់ស្ទើរក្នុងការចំណាយ វិនិយោគលើអាជីវកម្មថ្មី ឬជួលបុគ្គលិកបន្ថែម។ នោះបានធ្វើឱ្យកំណើនសេដ្ឋកិច្ចថៃដើរអូសជើង បើធៀបនឹងប្រទេសផ្សេងៗទៀតក្នុងតំបន់៕