ព័ត៌មានអន្ដរជាតិ

វៀតណាមវ៉ាដាច់បង់ក្លាដែស ក្លាយជាប្រទេសនាំចេញសម្លៀកបំពាក់ធំបំផុតទី២ របស់ពិភពលោក

បានផុស

១ year មុន

នៅ

ថ្ងៃព្រហស្បតិ៍ ២៦ ធ្នូ ២០២៤

ដោយ

អ្នកនាំពាក្យក្រុមហ៊ុនវាយនភណ្ឌជាតិវៀតណាម (Vinatex) លោក Hoang Manh Cam បានឱ្យដឹងកាលពីថ្ងៃពុធថា វៀតណាមបានវ៉ាដាច់បង់ក្លាដែស ក្លាយជាប្រទេសនាំចេញសម្លៀកបំពាក់ និងវាយនភណ្ឌធំជាងគេបំផុតទី២របស់ពិភពលោក ដោយឈរនៅតែក្រោយពីចិនប៉ុណ្ណោះ។ នេះបើតាមការចុះផ្សាយរបស់សារព័ត៌មាន VOV។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Cam បាននិយាយថា ឧស្សាហកម្មវាយនភណ្ឌ និងកាត់ដេរវៀតណាម បានទទួលការបញ្ជាទិញយ៉ាងច្រើន ពេលអ្នកទិញងាកចេញពីបង់ក្លេដែសដែលជួបនឹងវិបត្តិនយោបាយធ្ងន់ធ្ងរនៅឆ្នាំ ២០២៤ នេះ ដោយកើបបានចំណូលប្រមាណ ៤៤ ប៊ីលានដុល្លារអាមេរិក ស្មើនឹងកំណើន ១១ ភាគរយ។

មន្រ្តីដដែលបន្តថា វៀតណាមកំពុងមានអត្រាកំណើននាំចេញល្អបំផុតនៅលើពិភពលោក ក្នុងចំណោមប្រទេសនាំចេញសម្លៀកបំពាក់ និងវាយនភណ្ឌធំៗទាំងអស់។

លោក Cam បានដកស្រង់ស្ថិតិដែលបង្ហាញថា ចិននាំចេញវាយនភណ្ឌ និងកាត់ដេរ សរុបជាទឹកប្រាក់ប្រមាណ ២៧៣,៤ ប៊ីលានដុល្លារ ក្នុងរយៈពេល ១១ ខែដើមឆ្នាំ ដោយកើនឡើង ០,២ ភាគរយ ធៀបនឹងរយៈពេលដូចគ្នាកាលពីឆ្នាំមុន។ ចំណែកឯបង់ក្លាដែស ដែលជាគូប្រជែងវៀតណាមដ៏ធំឯណោះវិញ បានកត់ត្រាពីការធ្លាក់ចុះនៃការនាំចេញរហូតដល់ ៣,៧ ភាគរយ ក្នុងរយៈពេល ១០ ខែដើមឆ្នាំ មកនៅត្រឹម ២៧,៧ ប៊ីលានដុល្លារប៉ុណ្ណេះ។

បន្ទាប់ពីវៀតណាមគឺឥណ្ឌា ដែលទទួលបានអត្ថប្រយោជន៍ច្រើនបំផុតពីនិន្នាការងាកចេញពីបង់ក្លេដែស។ ឥណ្ឌាកត់ត្រាពីកំណើនប្រមាណ ៦,៩-៧ ភាគរយ លើការនាំចេញសម្លៀកបំពាក់ និងវាយនភណ្ឌ នៅឆ្នាំនេះ។ ប្រទេសផ្សេងៗទៀតដែលទទួលប្រយោជន៍ពីនិន្នាការដដែលរួមមាន ប្រទេសស្រីលង្កា និងតួកគីជាដើម។

ទោះបីជាយ៉ាងណាក៏ដោយ លោក Cam បានព្រមានថា និន្នាការនេះអាចមានរយៈពេលត្រឹមតែមួយរយៈប៉ុណ្ណោះ ព្រោះថាការនាំចេញរបស់ប្រទេសបង់ក្លាដែស ហាក់ស្ទុះងើប ដោយដណ្ដើមយកចំណែកទីផ្សារឡើងវិញនៅខែកញ្ញា និងខែតុលា។ ការណ៍នេះហើយបង្ហាញថា ការនាំចេញវាយនភណ្ឌ និងការប្រកួតប្រជែងរបស់បង់ក្លាដែស នឹងវិលត្រឡប់មកវិញ។

គួរគូសបញ្ជាក់ថា វិស័យកាត់ដេរបង់ក្លេដែសបានរងផលប៉ះពាល់ខ្លាំង ជុំវិញវិបត្តិនយោបាយដែលផ្ដួលរំលំរដ្ឋាភិបាលរបស់លោកស្រីអតីតនាយករដ្ឋមន្រ្តី ឆេក ហាស៊ីណា នៅដើមខែសីហា។ ការណ៍នេះបានផ្ដល់ប្រយោជន៍ដល់ប្រទេសនាំចេញផលិតផលកាត់ដេរផ្សេងៗទៀត រួមទាំងវៀតណាមជាដើម៕

ព័ត៌មានអន្ដរជាតិ២២ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេដ្ឋកិច្ច៣ ថ្ងៃ ago

ធនាគារ ARDB ចាក់បញ្ចូលទុនលើស្វាយចន្ទី និងដំឡូងមី

សេចក្ដីជូនដំណឹង២ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា