លោក​ លៀក លីដា​ យល់ថា ភាពយន្តខ្មែរអាចនឹងដើរថយក្រោយ និងចង់ឱ្យរួមគ្នាគិតដើម្បីវិស័យនេះរីកចម្រើន

ប្រធានសមាគមផលិតករភាពយន្តខ្មែរ និងជាអ្នកដឹកនាំសម្តែងលោក លៀក លីដា បានបង្ហាញក្តីព្រួយបារម្ភដោយលោកយល់ឃើញថាភាពយន្តខ្មែរនឹងដើរថយក្រោយក្នុងឆ្នាំ២០២៥នេះ បើធៀបទៅឆ្នាំ២០២៣ និង២០២៤ កន្លងទៅ។

ការលើកឡើរបស់ផលិតករភាពយន្តលោក លៀក លីដា ខាងលើនេះ ដោយសាសង្កេតឃើញថា បច្ចុប្បន្នហាក់មិនសូវមានការចូលរួមពីសំណាក់អ្នកពាក់ព័ន្ធលើផ្នែវិស័យមួយនេះបានល្អនៅឡើយទេ។ ក្នុងនោះ លោកក៏បានអំពាវនាវឲ្យមានការចូលរួមគិតគូរពីសំណាក់អ្នកដែលពាក់ព័ន្ធផងដែរ។

ប្រធានសមាគមផលិតករភាពយន្តខ្មែរលោក លៀក លីដា បានបញ្ចេញទស្សន:ថា “ភាពយន្តខ្មែរនឹងដើរ ថយក្រោយក្នុងឆ្នាំ២០២៥បើធៀបទៅឆ្នាំ២០២៣ និង២០២៤ ។ តាមបទពិសោធរបស់ខ្ញុំជាបុគ្គលអ្នកពាក់ព័ន្ធនិងចង់ឲ្យវិស័យនេះរីកចម្រើនពិតប្រាកដគួរនាំគ្នារួមគិតឲ្យបានឆាប់”។ ចំណុចនេះ មានការគាំទ្រពីទស្សនិកជនមួយចំនួនដោយជម្រុញឲ្យមានការសហការគ្នាលើកម្ពស់វិស័យភាពយន្តជាតិឡើងវិញ។

តាមការបញ្ជាក់ពីលោក លៀក លីដា បានឲ្យដឹងយ៉ាងខ្លីថាមូលហេតុបណ្តាមកពីមានការថយចំនួនអ្នក មើលទស្សនា និងគុណភាព។ អ្នកដឹកនាំសម្តែល្បីឈ្មោះលោក លៀក លីដា ជារឿយៗបានចេញមុខអំពាវនាវ ដោយស្នើសុំដល់មហាជនពិសេសយុវជនខ្មែររួមគ្នាគាំទ្រស្នាដៃភាពយន្តជាតិ ក្នុងការរួមចំណែកផ្សព្វផ្សាយវប្បធម៌ខ្មែរ។ ម្យ៉ាងទៀត គឺការចូលរួមការពារវិស័យភាពយន្តជាតិរបស់យើងកុំឲ្យធ្លាក់ចុះ៕ អត្ថបទ៖​ ចាន់រ៉ា