លោក លៀក លីដា ស្នើផលិតករ-អ្នកសិល្បៈ រួមគ្នាផ្សព្វផ្សាយនិងពង្រឹងគុណភាពនៃការផលិតភាពយន្តខ្មែរ

ជាថ្មីម្តងទៀត លោក លៀក លីដា ផលិតភាពយន្តករ និងជាម្ចាស់ផលិតកម្ម LD បានចេញមុខអំពាវនាវនិងស្នើដល់បណ្តាផលិតករក្នុងស្រុករួមទាំងអ្នកសិល្ប:ទាំងអស់ត្រូវចូលរួមពង្រឹងសមត្ថភាព ហើយរួមគ្នាផ្សព្វផ្សាយវិស័យភាពយន្តជាតិឱ្យកាន់តែទូលំទូលាយ ដើម្បីអន្ទងចិត្តទស្សនិកជនឱ្យគាំទ្រភាពយន្តខ្មែរ កាន់តែខ្លាំងថែមទៀត។

ផលិតករភាពយន្តរូបនេះ បានរៀបរាប់ខ្លឹមសារឱ្យដឹងថា សូមកុំគ្រាន់តែឈរេទះដៃអបអរសាទរ និងនិយាយពាក្យអរគុណ។ វិស័យមួយនេះ ត្រូវការអ្នកទាំងអស់គ្នាចូលរួមជាចាំបាច់។ តួយ៉ាង កាលដែលលោកស្នើសុំនេះ គឺដើម្បីលើកនិយាយពីវិស័យភាពយន្តជាតិ ខណៈដែលវិស័យមួយនេះកំពុងតែមានឱកាសល្អបំផុតសម្រាប់បណ្តាផលិតករ និងអ្នកសិល្ប:ខ្មែរ ស្របពេលនៃការទប់ស្កាត់ភាពយន្តរបស់ថៃ លែងឱ្យមានចាក់បញ្ចាំងនៅក្នុងស្រុកបន្តទៀត។

លោកថា “ហេតុនេះហើយ យើងជាផលិតករ សិល្បករ គួរតែចូលរួមទាំងអស់គ្នា ពោលគឺកុំគ្រាន់តែឈរេទះដៃអបអរសាទរនិងនិយាយពាក្យអរគុណ”។

លោកស្នើរទៀតថា សូមរួមគ្នាតាមរយ:យុទ្ធនាការផ្សព្វផ្សាយក៏ដូចជាការពង្រឹងការផលិត ដើម្បីឱ្យប្រជាជនខ្មែរងាកមកគាំទ្រភាពយន្តជាតិយើងឱ្យបានច្រើន ព្រោះសង្កេតឃើញថា ការសាមគ្គីគ្នារបស់បងប្អូនសព្វថ្ងៃ ពិតជាមានកម្លាំងចិត្តខ្លាំង ដែលអាចជម្រុញទឹកចិត្តនឹងជួយពង្រឹងដល់វិស័យភាពយន្តរបស់ជាតិយើងផងដែរ។

គួរបញ្ជាក់ដែរថា ផលិតករភាពយន្តរបស់ខ្មែរលោក លៀក លីដា កន្លងមកធ្លាប់បានអះអាងថា សម្រាប់លោកបានត្រៀមខ្លួនរួចជាស្រេចក្នុងការផលិតកុនដែលមានគុណភាណផ្គត់ផ្គង់ទីផ្សារក្នុងស្រុក ខណ:បច្ចុប្បន្នលោកក៏កំពុងបញ្ចេញស្នាដៃផលិតរឿងធំៗជាបន្តបន្ទាប់ផងដែរ៕ ចាន់រ៉ា