ព័ត៌មានជាតិ

អនុរដ្ឋលេខាធិការក្រសួងការងារ ស្នើ រដ្ឋបាលរោងចក្រ និងភាគីពាក់ព័ន្ធ ក្នុងខេត្តកំពង់ស្ពឺ ចូលរួមគាំទ្រកម្មវិធី ១,៥ លាននាក់ របស់រាជរដ្ឋាភិបាល

បានផុស

១ year មុន

នៅ

ថ្ងៃព្រហស្បតិ៍ ៣០ មករា ២០២៥

ដោយ

លោក ម៉ុល វិបុល អនុរដ្ឋលេខាធិការ នៃក្រសួងការងារ និងបណ្ដុះបណ្ដាលវិជ្ជាជីវៈ បានស្នើដល់រដ្ឋបាលរោងចក្រ និងគ្រប់ភាគីពាក់ព័ន្ធទាំងអស់ នៃខេត្តកំពង់ស្ពឺ ចូលរួមសហការគាំទ្រកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ១,៥ លាននាក់ របស់រាជរដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើនេះ ក្នុងឱកាស ក្រុមការងារព័ត៌មានទីផ្សារការងារ, ក្រុមការងារ ប.ស.ស និងក្រុមការងារ នៃវិទ្យាស្ថានពហុបច្ចេកទេសខេត្តកំពង់ស្ពឺ ដឹកនាំដោយ លោក ម៉ុល វិបុល បានធ្វើបទបង្ហាញអំពីកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ១,៥ លាននាក់, អត្ថប្រយោជន៍ទទួលបានពីបេឡាជាតិសន្តិសុខសង្គម (ប.ស.ស) និងការផ្សព្វផ្សាយអំពីឱកាសការងារជាង ៦ ម៉ឺនកន្លែង របស់ទីភ្នាក់ងារជាតិមុខរបរ និងការងារ (NEA) ទៅដល់កម្មករ-និយោជិត នៃរោងចក្រ SUN SHUI SHING INDUSTRIAL (CAMBODIA) CO LTD ខេត្តកំពង់ស្ពឺ កាលពីព្រឹកថ្ងៃទី ២៩ ខែមករា ឆ្នាំ ២០២៥ ម្សិលមិញនេះ។

នាឱកាសនោះ លោក ម៉ុល វិបុល បានស្នើ កម្មករ-និយោជិត នៃខេត្តកំពង់ស្ពឺ សូមជួយបន្តចែករំលែកព័ត៌មានឲ្យបានទូលំទូលាយដល់កម្មករផ្សេងទៀត។

ទន្ទឹមនោះ លោក ម៉ុល វិបុល ក៏បានស្នើដល់ រដ្ឋបាលរោងចក្រ និងគ្រប់ភាគីពាក់ព័ន្ធទាំងអស់ នៃខេត្តកំពង់ស្ពឺ ចូលរួមសហការគាំទ្រកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ១,៥ លាននាក់ និងផ្សព្វផ្សាយជំរុញលើកទឹកចិត្តទៅដល់ក្រុមគោលដៅនៅតាមភូមិ/ឃុំ/ស្រុកកំណើតផងដែរ។

ជាមួយនេះ លោកអនុរដ្ឋលេខាធិការ និងក្រុមការងារ ក៏បានផ្ដល់ជូននូវ QR-Code សម្រាប់ទាញយកឯកសារសៀវភៅមេរៀនទាំង ៤៥ មុខជំនាញ នៃកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ១,៥ លាននាក់ ព្រមទាំងផ្ដល់ជូនឯកសារចងក្រងទាក់ទងនឹងប្រសាសន៍របស់ សម្តេចធិបតី នាយករដ្ឋមន្ត្រី និងថ្នាក់ដឹកនាំ និងបទចម្រៀងស្ដីពីកម្មវិធី ១,៥ លាននាក់ ជូនដល់រដ្ឋបាលរោងចក្រ ដើម្បីចាក់ផ្សព្វផ្សាយជូនកម្មករនៅពេលម៉ោងសម្រាកអាហារថ្ងៃត្រង់ផងដែរ៕

អត្ថបទ ៖ ពិសី