ឆ្នាំ២០២៤ គ្រោះថ្នាក់ចរាចរណ៍កើតឡើងជាង ២ ៨០០ករណី ស្លាប់មនុស្សជាង ១៥០០នាក់

ក្នុងរយៈពេលពេញមួយឆ្នាំ២០២៤ ករណីគ្រោះថ្នាក់ចរាចរណ៍ផ្លូវគោកកើតមានឡើងចំនួន ២,៨៤៤ ករណី បណ្ដាលឲ្យមានមនុស្សស្លាប់ ចំនួន ១,៥០៩នាក់។ ចំនួនគ្រោះថ្នាក់ចរាចរណ៍នេះ បានថយចុះប្រមាណចំនួន ១៤% បើធៀបនឹងឆ្នាំ២០២៣។ នេះបើតាមរបាយការណ៍ប្រចាំឆ្នាំរបស់នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានបញ្ជាក់នៅព្រឹកថ្ងៃទី៤ ខែកុម្ភៈ ឆ្នាំ២០២៥នេះ។

លោកឧត្ដមសេនីយ៍ត្រី ថី វិសាល អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានឲ្យដឹងថា តាមទិន្ន័យដែលប្រមូលបាននៅទូទាំងប្រទេស អគ្គស្នងការដ្ឋាននគរបាលជាតិ បានមើលឃើញថា តួលេខនៃការគ្រោះថ្នាក់ចរាចរណ៍មានការថយចុះប្រមាណ១៤% ក្នុងនោះគឺមាន ២,៨៤៤ករណី លើ ៣,៣១៧ករណី ដែលតួលេខនេះ មានការថយចុះរហូតជិត៥០០ករណី។ លោកបន្ថែមថា នៅក្នុង ២,៨៤៤ករណីនោះ មានគ្រោះថ្នាក់ដែលបង្កឲ្យមនុស្សស្លាប់ចំនួន ១,៥០៩នាក់ លើ១,៥៩០នាក់ មានការថយចុះចំនួន ៨១នាក់ ស្មើប្រមាណ៥% ក្រៅពីនេះ មានអ្នករងរបួសទាំងធ្ងន់ និងស្រាលចំនួន ៣,៧២០នាក់ លើ៤,៥១៥នាក់ ថយចុះ ៧៩៥នាក់ ស្មើប្រមាណ១៩% បើធៀបនឹងឆ្នាំ២០២៣។

អនុប្រធាននាយកដ្ឋាននគរបាលចរាចរណ៍ បានលើកឡើងបន្ថែមថា ដើម្បីចូលរួមកាត់បន្ថយករណីគ្រោះថ្នាក់ចរាចរណ៍នៅឆ្នាំបន្ទាប់ សមត្ថកិច្ចនឹងបន្តរឹតបន្តឹងច្បាប់ចរាចរណ៍ផ្លូវគោក និងមានវិធានការយ៉ាងតឹងរ៉ឹង ចំពោះអ្នកដែលបើកបរល្មើសច្បាប់ ដោយមានការពិន័យដកពិន្ទុ អប់រំណែនាំជាដើម ជាពិសេសនឹងរឹតបន្តឹងនៅត្រង់ចំណុចគោលដៅដែលមានគ្រោះថ្នាក់ចរាចរណ៍ច្រើន។ លោកក៏ស្នើដល់គ្រប់ភាគីពាក់ព័ន្ធទាំងអស់ ដើម្បីធ្វើជាដៃគូក្នុងការទប់ស្កាត់ និងកាត់បន្ថយករណីគ្រោះថ្នាក់ចរាចរណ៍ផ្លូវគោក ជាពិសេសគឺប្រជាពលរដ្ឋទាំងអស់ ហើយការចូលរួមទាំងអស់នេះ នឹងអាចចូលរួមកាត់បន្ថយគ្រោះថ្នាក់ចរាចរណ៍នៅក្នុងឆ្នាំ២០២៥ និងឆ្នាំបន្តបន្ទាប់ទៀត៕

អត្ថបទ៖ សុខុម