ត្រាំ ចុះហត្ថលេខា យកពន្ធ២៥% លើដែកថែបនិងអាលុយមីញ៉ូម ដែលនាំចូលអាមេរិក

នៅទីបំផុត ប្រមុខសេតវិមានលោក ដូណាល់ ត្រាំ បានចុះហត្ថលេខាលើបញ្ជាប្រតិបត្តិ យកពន្ធ២៥% លើដែកថែបនិងអាលុយមីញ៉ូម ដែលនាំចូលសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC នៅថ្ងៃអង្គារទី១១ខែកុម្ភៈឆ្នាំ២០២៥, លោកបានចុះហត្ថលេខានេះនៅក្នុងការិយាល័យពងក្រពើ ជាមួយសេចក្តីប្រកាសថា ការយកពន្ធនេះគឺគ្មានការលើកលែងអ្វីឡើយ។ មិនត្រឹមប៉ុណ្ណឹង លោកក៏បង្ហើបអំពីគម្រោងយកពន្ធថែមលើយានយន្ត ឱសថ និងឈីបកំព្យូរទ័រ ដែលនាំចូលសហរដ្ឋអាមេរិកផងដែរ។

បញ្ជាយកពន្ធនេះ ត្រូវគេដឹងថា ប៉ះពាល់ខ្លាំងបំផុតដល់កាណាដា ម៉ិកស៊ិក ប្រេស៊ីល និងកូរ៉េខាងត្បូង ព្រោះប្រទេសទាំង៤នេះ សុទ្ធសឹងជាអ្នកនាំចេញដែកថែបកំពូលៗចូលទៅសហរដ្ឋអាមេរិក។

កាណាដា​គឺជាប្រទេស​ផ្គត់ផ្គង់ដ៏ធំបំផុតនៃលោហៈអាលុយមីញ៉ូមសុទ្ធសម្រាប់​សហរដ្ឋអាមេរិក ដែលស្មើនឹង ៧៩%នៃការនាំចូលសរុប​របស់អាមេរិក ក្នុងរយៈពេល​ ១១ ខែដំបូង នៃឆ្នាំ ២០២៤។ ​

សូមជម្រាបថា​ កាលពី​អាណត្តិទី១ លោក​ ត្រាំ ក៏បាន​ដាក់ពន្ធ ២៥% លើដែកថែបនាំចូល និង ១០%លើ​​អាលុយមីញ៉ូមផងដែរ ប៉ុន្តែក្រោយមកបានផ្តល់ការលើកលែងពន្ធលើដៃគូពាណិជ្ជកម្មមួយចំនួន រួមទាំងកាណាដា ម៉ិកស៊ិក និងប្រេស៊ីល៕

អត្ថបទ៖ សុខ សុវណ្ណ

ចុចអាន៖ ត្រាំ​ គ្រោងប្រកាសពន្ធ ២៥ ភាគរយ លើដែកថែប និងអាល៊ុយមីញ៉ូមនាំចូលពីគ្រប់ប្រទេស