ព័ត៌មានជាតិ

ដល់រដូវចាប់ហ៊ីងអ្នកស្រុកចិត្របុរី ហ៊ីងពងពេញពោះលក់បានថ្លៃ ពេញនិយមអ្នកទទួលទាន

បានផុស

១ year មុន

នៅ

ថ្ងៃអាទិត្យ ២៧ មេសា ២០២៥

ដោយ

ពេលមានភ្លៀងធ្លាក់ដើមឆ្នាំជោគជាំម្តងៗ ប្រជាពលរដ្ឋនៅស្រុកចិត្របុរី ក៏ដូចជា តាមស្រុកមួយចំនួនក្នុងខេត្តក្រចេះ បាននាំគ្នាចូលក្នុងព្រៃកាត់យប់ ដើម្បីឆ្លុះចាប់សត្វកង្កែបហ៊ីង យកមកលក់ឲ្យអ្នកស្រុក និងចំអិនធ្វើជាម្ហូបអាហារបរិភោគក្នុងគ្រួសារ។

តាមការកត់សម្គាល់របស់អ្នកភូមិអញ្ចាញ ឃុំដារ ស្រុកចិត្របុរី នៅពេលមានភ្លៀងធ្លាក់កក់ខែជោកជាំម្តងៗ ធ្វើឲ្យសត្វហ៊ីងដែលរស់នៅសំងំក្នុងដីសើម និងក្រោមស្លឹកឈើងាប់វារត់ចេញមកក្រៅ ហើយយំសំឡេងទ្រហឹងអើងកង តាមដងអូរ និងព្រៃ។ តាមរយៈសម្លេងយំ អ្នកស្រុកឆ្លុះក៏បានទៅឆ្លុះនិងចាប់នៅពេលយប់យកទៅលក់ ដោយក្នុង១គីឡូក្រាម តម្លៃចាប់ពី ២ ម៉ឺនរៀល ទៅ ៣ម៉ឺនរៀល តាមហ៊ីងពង និងហ៊ីងអត់ពង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សត្វហ៊ីងចេញនៅរដូវធ្លាក់ភ្លៀងកក់ខែថ្មីៗមួយឆ្នាំមានតែម្តងគត់ ជាពិសេសសត្វហ៊ីងមានពងពេញៗពោះ ដោយមិនទាន់បើកមាត់ចាប់សត្វល្អិតផ្សេងៗធ្វើជាចំណី គឺគេពេញនិយមទិញទៅធ្វើជាម្ហូបបំផុត ទោះបីតម្លៃថ្លៃបន្តិចក៏ដោយ។ ចំណែកហ៊ីងដែលបើកមាត់ និងជម្រុះពងអស់ក៏គេមិនសូវទិញ និងយកទៅបរិភោគដែរ។

ហ៊ីង គេអាចយកទៅធ្វើម្ហូបបានច្រើនប្រភេទដូចជា៖ ឆា ស្ងោរ ប្រឡាក់គ្រឿងអាំង ចៀន បំពង ជាដើម។

ហ៊ីង មាន ៣ ប្រភេទ គឺហ៊ីងកណ្ដោល ឬហ៊ីងក្រូត មាឌធំជាងហ៊ីងឯទៀត វាយំឮក្រេតក្រូតៗ, ហ៊ីងជ័រ មានមាឌតូចជាងហ៊ីងកណ្ដោល មានជ័រស្អិតនៅលើស្បែក វាយំឮសូរតូច និងហ៊ីងចំបក់ មានមាឌតូចជាងហ៊ីងជ័រ វាយំឮសូរខ្សោយជាងហ៊ីងជ័រ៕

អត្ថបទ៖ ប្រុញ វិធិន