ព័ត៌មានអន្ដរជាតិ

កូរ៉េខាងជើង បាញ់សាកល្បងមីស៊ីលលើកដំបូង ពីនាវាពិឃាតថ្មីរបស់ខ្លួន

បានផុស

១ year មុន

នៅ

ថ្ងៃពុធ ៣០ មេសា ២០២៥

ដោយ

Chheang

មេដឹកនាំកូរ៉េខាងជើង លោក គីម ជុងអ៊ុន បានចុះត្រួតពិនិត្យការសាកល្បងសព្វាវុធដំបូងរបស់នាវាពិឃាត «Choe Hyon» ទម្ងន់ ៥ ០០០តោន ដែលទើបសម្ពោធថ្មី ដោយនេះគឺជាការរីកចម្រើនគួរឲ្យកត់សម្គាល់នៅក្នុងសមត្ថភាពកងទ័ពជើងទឹករបស់ទីក្រុងព្យុងយ៉ាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ទីភ្នាក់ងារព័ត៌មានរដ្ឋ KCNA នៅថ្ងៃពុធទី៣០ខែមេសា ការធ្វើតេស្តដែលបានប្រារព្ធតាំងពីដើមសប្តាហ៍នេះ រួមមាន ការបាញ់មីស៊ីលល្បឿនលឿនជាងសំឡេង មីស៊ីលគ្រូស និងមីស៊ីលប្រឆាំងយន្តហោះ ព្រមទាំងមានប្រតិបត្តិការបាញ់កាំភ្លើងអេឡិចត្រូនិចស្វ័យប្រវត្តិទំហំ ១២៧មិល្លិម៉ែត្រផងដែរ។

នៅក្នុងព្រឹត្តិការណ៍នោះ លោក គីម បានសង្កត់ធ្ងន់លើភាពចាំបាច់នៃការពន្លឿនអាវុធនុយក្លេអ៊ែររបស់កងទ័ពជើងទឹក ដើម្បីការពារ និងអធិបតេយ្យភាពរដ្ឋលើដែនសមុទ្រប្រឆាំងនឹងការគំរាមកំហែងដែលមានស្រាប់ និងនាពេលអនាគត។ លោកក៏បានប្រកាសអំពីផែនការដាក់បញ្ជូននាវាពិឃាតថ្មីទៅក្នុងទីភ្នាក់ងារកងទ័ពជើងទឹកនៅដើមឆ្នាំក្រោយផងដែរ ហើយបានបង្ហាញពីចេតនាក្នុងការអភិវឌ្ឍនាវាមុជទឹកដើរដោយថាមពលនុយក្លេអ៊ែរជាជំហានបន្ទាប់ ក្នុងការពង្រឹងកងទ័ពជើងទឹក។

អ្នកវិភាគបានលើកឡើងថា ប្រព័ន្ធរ៉ាដា និងសព្វាវុធទំនើបៗរបស់នាវាពិឃាតនេះ អាចបង្កើតឡើងដោយមានជំនួយបច្ចេកវិទ្យាពីប្រទេសរុស្ស៊ី ដែលឆ្លុះបញ្ចាំងពីទំនាក់ទំនងយោធាកាន់តែស៊ីជម្រៅរវាងក្រុងព្យុងយ៉ាង និងក្រុងមូស្គូ។ នាវាពិឃាត Choe Hyon ត្រូវបានគេជឿថាអាចផ្ទុកមីស៊ីលបានប្រហែល ៨០គ្រាប់។ រូបភាពពីផ្កាយរណបបង្ហាញថា នាវានេះមានប្រវែងប្រហែល ១៤០ម៉ែត្រ ដែលធ្វើឲ្យវាក្លាយជានាវាចម្បាំងដ៏ធំបំផុតដែលត្រូវបានសាងសង់នៅលើទឹកដីកូរ៉េខាងជើងគិតមកទល់នឹងបច្ចុប្បន្ន៕