សន្ទស្សន៍ទំនុកចិត្តវិនិយោគិនថៃ បន្ត​នៅកម្រិតទុទ្ទិដ្ឋិនិយមជុំវិញ​បញ្ហាពន្ធ

សន្ទស្សន៍ទំនុកចិត្តវិនិយោគិន (ICI) ​របស់សហព័ន្ធនៃអង្គការទីផ្សារមូលធនថៃ (Fetco) ​នៅតែស្ថិតក្នុងកម្រិតប្រុងយ័ត្នទៅនឹងហានិភ័យ ដោយសារតែ​ភាពតានតឹងពាណិជ្ជកម្មសកលបង្កដោយសង្រ្គាមពន្ធគយ ជម្លោះភូមិសាស្ត្រនយោបាយ និងស្ថានភាពនយោបាយក្នុងស្រុក។ នេះបើតាមការចុះផ្សាយរបស់កាសែតបាងកកប៉ុស្តិ៍។

នៅក្នុងខែមេសា សន្ទស្សន៍ទំនុកចិត្តវិនិយោគិនថៃ ឈរនៅ ៦៤,១ ពិន្ទុ ដែលបង្ហាញថា អ្នកវិនិយោគមានទុទ្ទិដ្ឋិនិយមចំពោះទីផ្សារភាគហ៊ុនក្នុងរយៈពេល ៣ ខែបន្ទាប់។ គោលនយោបាយជំរុញ​សេដ្ឋកិច្ចរបស់រដ្ឋាភិបាល គឺជាហេតុផលចម្បងដែលទំនុកចិត្តមិនធ្លាក់ចុះទាបជាងនេះ។

សង្គ្រាមពាណិជ្ជកម្ម ជម្លោះអន្តរជាតិ និងកង្វល់នយោបាយក្នុងស្រុក បន្ត​ប៉ះពាល់ដល់ទំនុកចិត្តវិនិយោគិន ខណៈទំនុកចិត្តរបស់វិនិយោគិនលក់រាយ និងបរទេស នៅតែបន្តមាន​ទុទ្ទិដ្ឋិនិយម។ ប៉ុន្តែទស្សនវិស័យរបស់វិនិយោគិនតាមអង្គការស្ថាប័ន មានសុទិដ្ឋិនិយម។

​ប្រធាន Fetco លោក Kobsak Pootrakool បាននិយាយថា​៖ «ក្នុងខែមេសា ទីផ្សារមូលធនថៃមានការប្រែប្រួលដោយសារតែកត្តាជាច្រើនរួមទាំងពន្ធរបស់សហរដ្ឋអាមេរិក ការស្ទុះងើបឡើងវិញយឺតយ៉ាវនៃសេដ្ឋកិច្ចក្នុងស្រុក និង​ការធ្លាក់ចុះនៃសន្ទុះវិស័យទេសចរណ៍»​ ក៏ដូចជា​ការព្យាករបែបអវិជ្ជមាននៃសេដ្ឋកិច្ចថៃពីក្រុមហ៊ុនសេវាកម្មហិរញ្ញវត្ថុអន្តរជាតិ Moody៕