ទេសចរណ៍ខេត្តស្រះកែវថៃ រងផលប៉ះពាល់ពីការបិទព្រំដែនជាមួយកម្ពុជា

ការបិទព្រំដែន និងកំណត់ម៉ោងចេញចូលជាឯកតោភាគីរបស់យោធាថៃ ដែលទាក់ទាញចំណាត់ការដូចគ្នាពីកម្ពុជា បាន​បង្កជាផលប៉ះពាល់ដល់វិស័យទេសចរណ៍ខេត្តស្រះកែវរបស់ថៃ ដែលកត់ត្រាពីការធ្លាក់ចុះនៃចំនួនភ្ញៀវ និងអត្រាស្នាក់នៅសណ្ធាគារ។ នេះបើតាមការចុះផ្សាយរបស់កាសែត The Nation ថ្ងៃសៅរ៍នេះ។

ផលប៉ះពាល់ទេសចរណ៍មិនសូវធ្ងន់ធ្ងរទេ នៅខេត្ត Ubon Ratchathani ដោយមានការរំខានតិចតួចដល់ទិសដៅក្នុងតំបន់។ នៅ​ខេត្ត​ស្រះកែវ ផលប៉ះពាល់ខ្លាំងនៅស្រុក​អារញ្ញ​ប្រាថេត ដែល​អត្រា​ស្នាក់នៅ​សណ្ឋាគារ​ជា​មធ្យម​បាន​ធ្លាក់​ចុះ​។ ​ជា​ចម្បង វាបណ្ដាលមកពីការធ្លាក់ចុះនៃទេសចរថៃ និងឥណ្ឌូណេស៊ី ដែលត្រៀមចូលកម្ពុជា ដោយសារតែការរំខានការធ្វើដំណើរ។

បើតាម The Nation ភ្ញៀវទេសចរកម្ពុជាដែលទៅលេងថៃ ក៏បានធ្លាក់ចុះចំនួន ៤៣ ភាគរយ ចាប់តាំងពីការបិទព្រំដែនកើតឡើងនៅដើមខែនេះ ដោយជាមធ្យមចំនួន​ប្រចាំថ្ងៃ បានធ្លាក់ចុះពី ១ ៥០០ នាក់ មកត្រឹម ១ ២០០ នាក់។

គួរគូសបញ្ជាក់ថា កម្ពុជាជាប្រភព​ដ៏សំខាន់មួយ​សម្រាប់ទេសចរណ៍ថៃ។ យោងតាមអាជ្ញាធរទេសចរណ៍ថៃ (TAT) ក្នុងឆ្នាំ ២០២៤ មាន​ភ្ញៀវទេសចរកម្ពុជា​ប្រមាណ ៥៥៣ ០៦០ នាក់ ទៅលេងប្រទេសថៃ ធ្លាក់ចុះ ៥ ភាគរយ។ ចំនួន​ភ្ញៀវ​ទេសចរ​កម្ពុជា​ប្រចាំ​ថ្ងៃ ក៏​បាន​ធ្លាក់​ចុះ​យ៉ាង​ខ្លាំងផងដែរ​ក្នុង​រយៈ​ពេល​៥​ខែ​ដើម​ឆ្នាំ​២០២៥ ប្រមាណ ១៤ ភាគរយ ធៀបនឹង​រយៈពេលដូចគ្នាឆ្នាំមុន។

ការិយាល័យ TAT នៅខេត្ត Ubon Ratchathani, Surin, Sa Kaeo, និង Trat បានរាយការណ៍ថា មិនមានវិធានការសន្តិសុខពិសេសដើម្បីឆ្លើយតបទៅនឹងការបិទព្រំដែនទេ ដោយសារវិធានការត្រួតពិនិត្យព្រំដែនយ៉ាងតឹងរ៉ឹងបានអនុវត្តរួចហើយ៕