អាមេរិក វាយប្រហាររោងចក្រនុយក្លេអ៊ែរ ៣កន្លែងនៅអ៊ីរ៉ង់

ប្រមុខសេតវិមាន ដូណាល់ ត្រាំ បានបញ្ជាក់ពីការវាយប្រហាររបស់សហរដ្ឋអាមេរិក កម្ទេចទីតាំងនុយក្លេអ៊ែរចំនួនបីនៅក្នុងប្រទេសអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបញ្ជាក់រឿងនេះនៅលើបណ្តាញសង្គម Truth Social ដោយសរសេរថា «យើងបានបញ្ចប់ការវាយប្រហារដោយជោគជ័យ លើទីតាំងនុយក្លេអ៊ែរចំនួនបីក្នុងប្រទេសអ៊ីរ៉ង់ រួមមាន Fordow, Natanz និង Esfahan ហើយឥឡូវនេះ យន្តហោះទាំងអស់កំពុងស្ថិតនៅក្រៅលំហអាកាសអ៊ីរ៉ង់»។

មិនយូរប៉ុន្មានក្រោយមក លោកត្រាំក៏បង្ហោះសារមួយទៀត ដោយអះអាងថា រោងចក្រនុយក្លេអ៊ែរ Fordo គឺទៅបាត់ហើយ។

ជុំវិញការវាយប្រហារនេះ មន្ត្រីអាមេរិកម្នាក់បានឲ្យដឹងថា យន្តហោះទម្លាក់គ្រាប់បែក B-2 ក៏បានចូលរួមដែរ។ ដូចការគិតមែន យន្តហោះទម្លាក់គ្រាប់បែកបំបាំងកាយ B-2 របស់អាមេរិក បានចល័តទៅកាន់ទឹកដីកោះ Guam ធ្វើឲ្យគេប៉ាន់ស្មានថា យន្តហោះនេះអាចនឹងចូលរួមក្នុងការវាយប្រហារលើអ៊ីរ៉ង់ហើយ។

អ៊ីរ៉ង់ ក៏ទទួលស្គាល់ការវាយប្រហារនេះដែរ ដោយអ្នកនាំពាក្យភ្នាក់ងារគ្រប់គ្រងវិបត្តិខេត្ត Qom លោកMorteza Heydari និយាយថា រោងចក្រនុយក្លេអ៊ែរ Fordo ពិតជារងការទម្លាក់គ្រាប់បែកពីអាកាសមែន។

ចំណែកលោក Akbar Salehi អនុប្រធានផ្នែកសន្តិសុខនៃទីក្រុង Isfahan និយាយថា «ការផ្ទុះជាច្រើនលើកត្រូវបានឮនៅរោងចក្រ Natanz និង Isfahan ហើយយើងបានឃើញការវាយប្រហារនៅទីនោះ»។

សូមជម្រាបថា ស្ថិតនៅចម្ងាយប្រហែល៩៦គីឡូម៉ែត្រ ភាគខាងត្បូងរដ្ឋធានី តេហេរ៉ង់, រោងចក្រចម្រាញ់សារធាតុអ៊ុយរ៉ាញ៉ូមនៅ Fordo គឺស្ថិតនៅក្នុងតំបន់ភ្នំមួយ ជិតទីក្រុង Qom។ រោងចក្រក្រោមដីនេះ​ មានផ្លូវរូងក្រោមដីសំខាន់ចំនួនពីរដែលប្រើសម្រាប់បង្កើនសារធាតុអ៊ុយរ៉ាញ៉ូម ក៏ដូចជាបណ្តាញផ្លូវរូងក្រោមដីតូចៗផងដែរ៕

អត្ថបទ៖ សុខ សុវណ្ណ

ចុចអាន៖ រុស្ស៊ី ព្រមានថា បើអាមេរិកបាញ់នុយក្លេអ៊ែរឬផ្លាស់ប្តូររបបនៅ អ៊ីរ៉ង់ នឹងបង្កមហន្តរាយធំធេង