រុស្ស៊ី ព្រមានថា បើអាមេរិកបាញ់នុយក្លេអ៊ែរឬផ្លាស់ប្តូររបបនៅ អ៊ីរ៉ង់ នឹងបង្កមហន្តរាយធំធេង

សង្គ្រាមអ៊ីស្រាអែល-អ៊ីរ៉ង់ មិនទាន់មើលឃើញសញ្ញាធូរស្រាលឡើង ហើយអ្វីដែលកាន់តែបារម្ភគឺថា ២សប្តាហ៍ទៀតនឹងក្លាយជាពេលដ៏សំខាន់ក្នុងការសម្រេចចិត្តរបស់អាមេរិក តើខ្លួនត្រូវលូកដៃដែរឬក៏អត់? យ៉ាងណា ពេលនេះរុស្ស៊ី បានព្រមានចំៗលោក ដូណាល់ ត្រាំ ថា អ៊ីរ៉ង់មិនអាចផ្លាស់ប្តូររបបបានឡើយ ហើយការធ្វើឃាតមេដឹកនាំកំពូលរបស់ប្រទេសនេះ នឹងបង្កឲ្យមានមហន្តរាយយ៉ាងធំធេង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយ Sky News នៅថ្ងៃសុក្រទី២០ខែមិថុនាឆ្នាំ២០២៥ អ្នកនាំពាក្យវិមានក្រឹមឡាំង Dmitry Peskov និយាយថា ការធ្វើឃាតលោក Ayatollah Ali Khamenei និងការផ្លាស់ប្តូររបបក្នុងប្រទេសអ៊ីរ៉ង់ ប្រៀបបាននឹងការបើកប្រអប់នៃគ្រោះមហន្តរាយ បង្កជាវិនាសកម្មធំធេង។ ទង្វើបែបនោះ ​នឹងបង្កឲ្យមានសកម្មភាពនិងការឆ្លើយតបពីក្នុងប្រទេសអ៊ីរ៉ង់ ចំណែករុស្ស៊ីក៏ជំទាស់ដាច់ខាតផងដែរ។

ដោយឡែក ក្នុងបទសម្ភាសជាមួយសារព័ត៌មាន TASS របស់រុស្ស៊ីឯណោះវិញ លោក Peskov ក៏ព្រមានទៅលោកត្រាំដែរថា ការប្រើប្រាស់អាវុធនុយក្លេអ៊ែរយុទ្ធសាស្ត្ររបស់អាមេរិកនៅតំបន់មជ្ឈិមបូព៌ា នឹងនាំឲ្យមានផលវិបាកដ៏មហន្តរាយ ហើយវានឹងទាញស្ថានការណ៍ឲ្យរាលដាលក្លាយជាសង្គ្រាមពេញតំបន់ទាំងមូល។

ទោះបីជាយ៉ាងណាក៏ដោយ នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បានបំភ្លឺ​រួចហើយថា ការផ្តួលរំលំរបបដឹកនាំអ៊ីរ៉ង់ មិនមែនជាគោលបំណងនៃយុទ្ធនាការយោធារបស់អ៊ីស្រាអែលនោះទេ តែ​លោក​ចាត់ទុក​ថា​វា​ជា «លទ្ធផល»។ ការផ្លាស់ប្តូរណាមួយនៅក្នុងការដឹកនាំរបស់អ៊ីរ៉ង់ត្រូវតែកំណត់ដោយប្រជាជនអ៊ីរ៉ង់ មិនមែនដោយអ៊ីស្រាអែលឡើយ។

លោកបន្តថា «បញ្ហានៃការផ្លាស់ប្តូររបប ឬការដួលរំលំនៃរបបនេះ គឺជាបញ្ហាចម្បង និងសំខាន់បំផុតសម្រាប់ប្រជាជនអ៊ីរ៉ង់។ នោះហើយជាមូលហេតុដែលខ្ញុំមិនចាត់ទុក​វាជាគោលដៅ។ វាអាចជាលទ្ធផល ប៉ុន្តែវាមិនមែនជាគោលដៅដែលបានបញ្ជាក់ ឬផ្លូវការឡើយ»។

សូមជម្រាបជាថ្មី អ៊ីស្រាអែល បានបើកប្រតិបត្តិការ «Risisng Lion» កាលពីថ្ងៃសុក្រទី១៣ខែមិថុនាឆ្នាំ២០២៥ ដោយបាញ់មីស៊ីលលើទីក្រុងតេហេរ៉ង់ ក្នុងគោលបំណងកម្ទេចកម្មវិធីនុយក្លេអ៊ែររបស់អ៊ីរ៉ង់។

អ៊ីស្រាអែលបញ្ជាក់ថា ខ្លួនគ្មាន​ជម្រើស​ផ្សេងក្រៅ​ពី​វាយ​អ៊ីរ៉ង់ឡើយ ព្រោះប្រទេសនេះ កំពុង​ស្ថិតនៅលើផ្លូវឈានឆ្ពោះទៅរកការផលិតបាន​គ្រាប់បែក​នុយក្លេអ៊ែរហើយ។ យ៉ាងណា អ៊ីរ៉ង់បានបដិសេធយ៉ាងដាច់អហង្ការចំពោះការចោទប្រកាន់នេះ និងអះអាងម្តងហើយម្តងទៀតថា កម្មវិធីនុយក្លេអ៊ែររបស់ខ្លួន គឺសម្រាប់តែគោលបំណងស៊ីវិលប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ ក្រុមសកម្មប្រយុទ្ធនិកាយស៊ីអ៊ីតអ៊ីរ៉ាក់ គំរាមវាយមូលដ្ឋានទ័ពអាមេរិក បើ ត្រាំ ចូលជួយអ៊ីស្រាអែល