តម្លៃហាងឆេងមាសបន្តធ្លាក់ចុះ នៅថ្ងៃនេះ

តម្លៃហាងឆេងមាសបន្តធ្លាក់ចុះនៅថ្ងៃពុធនេះ ដោយបានបើកផ្សារនៅតម្លៃ ៤០០៣ ដុល្លារ ក្នុងមួយតម្លឹង បន្ទាប់ពីអ៊ីស្រាអ៊ែល និងអ៊ីរ៉ង់យល់ព្រមបទឈប់បាញ់។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities បានប្រាប់​​ឱ្យ​ដឹង​ថា តម្លៃ​ហាងឆេងមាសមានទំនោរធ្លាក់ចុះ បន្ទាប់ពីមានការឯកភាពគ្នាលើបទឈប់បាញ់រវាងអ៊ីស្រាអែល និងអ៊ីរ៉ង់ ដែលអ៊ីរ៉ង់បង្ហាញ​ជំ​ហរសុំចរចារជាមួយអ៊ីស្រាអែល និងអាមេរិកដើម្បីបញ្ចប់សង្គ្រាម។

លោក ឡុង សំណាង បន្ថែមថា តម្លៃហាងឆេងមាសអាចនឹងធ្លាក់ចុះក្រោម ៤ ពាន់ដុល្លារ ក្នុងមួយតម្លឹង នៅក្នុងសប្ដាហ៍នេះ ពាក់ព័ន្ធនឹងការបន្ទន់ជំហរចរចារបស់អ៊ីរ៉ង់។

គិតត្រឹមម៉ោង ៩ ព្រឹកថ្ងៃទី ២៥ ខែមិថុនា ឆ្នាំ ២០២៥ តម្លៃហាងឆេងមាសកំពុងជួញដូរក្នុងតម្លៃ ៤ ០១៤ ដុល្លារក្នុងមួយតម្លឹង។ សម្រាប់​តម្លៃមាសនៅក្នុងរាជធានីភ្នំពេញ លក់ចេញក្នុងតម្លៃ ៤០៤ ដុល្លារ ក្នុង​មួយជី៕