ក្រុមហ៊ុន កូកា-កូឡា តាំងចិត្តស្វែងរកដៃគូផ្គត់ផ្គង់វត្ថុធាតុដើមនៅកម្ពុជា

ក្រុមហ៊ុនភេសជ្ជៈកម្ពុជា (កូកា-កូឡា) បានបង្ហាញការតាំងចិត្តខ្ពស់ក្នុងការស្វែងរកដៃគូផ្គត់ផ្គង់វត្ថុធាតុដើមក្នុងស្រុក ដែលមានគុណភាព និងកម្លាំង​ផលិតភាព​ស្របទៅ​តាម​តម្រូវការ​ផលិតកម្មរបស់ក្រុមហ៊ុន។

ការប្ដេជ្ញាបែបនេះ បានធ្វើឡើង ក្នុងជំនួបរវាងលោក ស៊ុន ចាន់​ថុល អនុប្រធាន​ទី១ ក្រុម​ប្រឹក្សា​អភិវឌ្ឍន៍​កម្ពុជា ជាមួយលោក Paulo Gaspar Rodrigues នាយកប្រតិបត្តិក្រុមហ៊ុន​ភេសជ្ជៈកម្ពុជា (កូកា-កូឡា) នៅថ្ងៃទី ២៤ ខែមិថុនា ឆ្នាំ ២០២៥។

លោក Paulo Gaspar Rodrigues បាន​បង្ហាញ​ពីការតាំង​ចិត្តខ្ពស់​របស់​ខ្លួន ក្នុងការស្វែងរកដៃគូផ្គត់ផ្គង់វត្ថុធាតុដើមនៅក្នុងស្រុក ដែលមានគុណភាព និងកម្លាំង​ផលិតភាព​ស្របទៅ​តាម​តម្រូវការ​ផលិតកម្មរបស់ក្រុមហ៊ុន។

ជាមួយគ្នានេះ ក្រុមហ៊ុនភេសជ្ជៈកម្ពុជា (កូកា-កូឡា) ក៏បានបង្ហាញនូវការប្តេជ្ញាចិត្តខ្ពស់ក្នុងការបន្តពង្រឹង និងពង្រីកប្រតិបត្តិការវិនិយោគរបស់ខ្លួននៅកម្ពុជា សំដៅជា​ចំណែក​ដល់​ការ​ចូលរួម​អភិវឌ្ឍ​សេដ្ឋកិច្ចជាតិផងដែរ។

លោក​ឧបនាយករដ្ឋមន្ត្រី ស៊ុន ចាន់ថុល បាន​លើក​ឡើង​ថា ក្រុមប្រឹក្សាអភិវឌ្ឍន៍កម្ពុជា ក្នុងនាម​សេនាធិការ​ច្រកចេញ​ចូល​តែ​មួយ​របស់​រាជរដ្ឋាភិបាល ដែល​ទទួលខុសត្រូវក្នុងការត្រួតពិនិត្យ និងគ្រប់គ្រង​កិច្ច​សហ​ប្រតិបត្តិការ​អភិវឌ្ឍន៍ ការ​វិនិយោគ​ឯកជន និងតំបន់សេដ្ឋកិច្ចពិសេស តែងតែ​ផ្តល់ការ​យកចិត្ត​ទុកដាក់​ខ្ពស់លើ​កិច្ច​ថែទាំ​គាំទ្រ​ការវិនិយោគ​ឯកជន​ដែលកំពុងដំណើរការនៅកម្ពុជា។

មិន​តែ​ប៉ុណ្ណោះ​ រាជរដ្ឋាភិបាល​កម្ពុជា​បាន​ចាត់​ទុក​ការ​វិនិយោគ​ផ្ទាល់​ពី​បរទេស (FDI) ជាកត្តា​ដ៏សំខាន់​នៃ​កំណើន​សេដ្ឋកិច្ចជាតិ ជា​មួយ​គ្នានេះ​ដែរ ការទិញធាតុចូល ឬប្រើប្រាស់វត្ថុធាតុដើមនៅក្នុងស្រុក វិនិយោគិន​នឹង​ទទួល​បាន​ការលើកចិត្តបន្ថែម ដែលនេះគឺ​ជាការ​លើកទឹក​ចិត្តមួយ​ក្នុងចំណោម​យន្តការ​លើក​ទឹកចិត្ត​ជាច្រើន​ដែល​រាជរដ្ឋាភិបា​លបានដាក់ចេញ ដើម្បីទាក់ទាញ និងជំរុញការវិនិយោគប្រកបដោយគុណភាព ប្រសិទ្ធភាព និង​ចីរភាព។

សូម​ជម្រាប​ថា ជំនួប​នេះត្រូវបាន​រៀបចំ​ឡើងក្នុង​គោលបំណង​ដើម្បី​ពិភាក្សា​អំពី​បច្ចុប្បន្នភាព​នៃដំណើរការ​វិនិយោគ​របស់​ក្រុមហ៊ុន​នៅ​កម្ពុជា និង​ចំណុច​គន្លឹះ​ពាក់ព័ន្ធនានា សំដៅលើកកម្ពស់ កិច្ចសហការ​ឱ្យកាន់​តែ​រឹងមាំ​ថែមមួយ​កម្រិតទៀត រវាងផ្នែករដ្ឋ និងក្រុមហ៊ុនផ្ទាល់៕