សេដ្ឋកិច្ច

ក្រុមហ៊ុនអាកាសចរណ៍ជាតិ បើកជើងហោះហើរថ្មី ពីខេត្តសៀមរាប ទៅចិន

បានផុស

១១ ខែ មុន

នៅ

ថ្ងៃចន្ទ ៣០ មិថុនា ២០២៥

ដោយ

ក្រុមហ៊ុនអាកាសចរណ៍ជាតិកម្ពុជា (AIR) នឹងចាប់ផ្ដើមហោះហើរទៅកាន់ទៅដៅថ្មីពីខេត្តសៀមរាប ទៅទីក្រុងសិនជិន ប្រទេសចិន នៅថ្ងៃទី ១៧ ខែកក្កដា ឆ្នាំ ២០២៥ ដើម្បីឆ្លើយតបទៅនឹងកំណើននៃតម្រូវការភ្ញៀវទេសចរណ៍ចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត Zhan David នាយកប្រតិបត្តិ នៃក្រុមហ៊ុនអាកាសចរណ៍ជាតិកម្ពុជា មានប្រសាសន៍កាលពីពេលថ្មីៗនេះថា ក្រុមហ៊ុនអាកាសចរណ៍ជាតិកម្ពុជាប្ដេជ្ញាបំពេញបេសកម្មក្នុងនាមជាអាកាសចរណ៍ជាតិ តាំងពីការបង្កើមក ដោយមានមោនភាពក្នុងការបម្រើប្រជាជនកម្ពុជា។ លោក Zhan David បញ្ជាក់ថា ក្រុមហ៊ុន តែងតែផ្ដល់សេវាកម្មអាកាសចរណ៍ប្រកបដោយសុវត្ថិភាព និងមានភាពងាយស្រួល។

ក្រុមហ៊ុនអាកាសចរណ៍ជាតិបានបញ្ជាទិញយន្តហោះថ្មី ATR 72-600 ចំនួន ៣ គ្រឿងនៅឆ្នាំ ២០២៥ បន្ទាប់ពីយន្តហោះទី១ មកដល់កាលពីដំណាច់ខែឧសភា ហើយយន្តហោះទី២ និងទី៣ នឹងមកដល់នៅខែតុលា និងខែវិច្ឆិកាដំណាច់ឆ្នាំ ២០២៥។

ក្រុមហ៊ុនអាកាសចរណ៍ជាតិកំពុងរៀបចំផែនការពង្រីកបណ្ដាញផ្លូវហោះហើរទៅកាន់ទីផ្សារ ដែលមានសក្ដានុពល រួមមានអាស៊ី ឦសាន ប្រទេសចិន អាស៊ីខាងត្បូង និងអូស្ត្រាលី ដើម្បីបំពេញតម្រូវការកើនឡើងនៃការធ្វើដំណើរអន្តរជាតិ។ ក្រុមហ៊ុនមានគម្រោងបង្កើនយន្តហោះ ៣៣ គ្រឿង សម្រាប់គាំទ្រដល់កំណើនអនាគត និងពង្រីកជើងហោះហើរអន្តរជាតិ។

យោងតាមអាកាសចរស៊ីវិល គិតចាប់ពីខែមករា ដល់ខែ ឧសភា ឆ្នាំ ២០២៥ កម្ពុជាទទួលបានអ្នកដំណើរចេញ-ចូលចំនួនជាង ៣ លាននាក់ (៣០៤២៥៤៨) កើន ១៨% ធៀបនឹងរយៈពេលដូចគ្នា កាលពីឆ្នាំមុន។ ក្នុងនោះជើងហោះហើរចេញ-ចូល មានជាង ២ ម៉ឺន ៧ ពាន់ជើង កើនឡើង ១៤%។

នៅក្នុងឆ្នាំ ២០២៤ អាកាសយានដ្ឋានទាំង ៣ របស់កម្ពុជារួមមាន ភ្នំពេញ-សៀមរាបអង្គរ-ព្រះសីហនុ ទទួលបានជើងហោះហើរជិត ៦ ម៉ឺនជើង (៥៨,៣៥៤) កើនឡើង ១៤% ក្នុងនោះមានអ្នកដំណើរចេញ-ចូល (ទ្វេទិស) ចំនួន ៦ ២៤១ ៨៤២ នាក់ កើនឡើង ២២% ធៀបនឹងរយៈពេលដូចគ្នាក្នុងឆ្នាំ ២០២៣។

វិស័យដឹកជញ្ជូនតាមផ្លូវអាកាស ទើបតែងើបវិញជាលំដាប់បានប្រមាណជាង ៦៨% នៅឆ្នាំ២០២៤ តែប៉ុណ្ណោះ បើធៀបទៅនឹងស្ថានភាពមុនវិបត្តិជំងឺកូវីដ-១៩។

នៅក្នុងឆ្នាំ២០២៤ កម្ពុជាទទួលបានភ្ញៀវទេសចរណ៍អន្តរជាតិជាង ៦,៧ លាននាក់ កើនឡើងជិត ២៣ ភាគរយ បើធៀបនឹងឆ្នាំ ២០២៣ ដែលមានចំនួន ៥,៤៥ លាននាក់។ នេះបើយោងតាមក្រសួងទេសចរណ៍។

ក្នុងចំណោមភ្ញៀវទេសចរជាង ៦,៧ លាននាក់ ទេសចរណ៍ថៃឈរនៅលំដាប់លេខរៀងទី ១ មានចំនួន ២,១៤ លាននាក់ កើនជិត ១៨% វៀតណាមចំនួន ១,៣៤ លាននាក់ កើន ៣១,៥% ចិនជាង ៨៤ ម៉ឺននាក់ កើន ៥៥% ភ្ញៀវទេសចរឡាវចំនួនជាង ៣៣ ម៉ឺននាក់ ធ្លាក់ចុះ ១០% និងភ្ញៀវទេសចរអាមេរិកជាង ២១ ម៉ឺននាក់ កើនឡើង ១៦%៕

អត្ថបទ៖ ឡេង ដេត