Ronaldo ចង់សម្រេចគោលដៅធំមួយ ទើប​បន្ត​នៅជា​មួយ​ក្លិប Al-Nassr ទៀត

ខ្សែប្រយុទ្ធឆ្នើម Cristiano Ronaldo បានទម្លាយមូលហេតុពិត នៅពីក្រោយការសម្រេចចិត្តរបស់ខ្លួន ក្នុងការបន្តកិច្ចសន្យាថ្មីជាមួយក្លិប Al-Nassr បន្តទៀត។

កាលពីពលថ្មីៗនេះ ក្លិប Al-Nassr បានប្រកាសជាផ្លូវការ​ ដោយ Ronaldo បានយល់ព្រមបន្តកិច្ចសន្យាថ្មី ក្នុងការស្នាក់នៅទឹកដី Al-Awwal Park រយៈពេល ២ រដូវកាលបន្ថែមទៀត។ យោងតាមប្រភពពី Transfer Market បានឱ្យដឹងថា ខ្សែប្រយុទ្ធវ័យ ៤០ ឆ្នាំនឹងក្លាយជាកីឡាករ ដែលមានប្រាក់ពលកម្មថ្លៃបំផុតលើភពផែនដី បន្ទាប់ពីការបន្តកិច្ចសន្យាថ្មីនេះ ដោយមួយខែទទួលបាន ១៧.៥ លានដុល្លារអាមេរិក ដែលស្មើនឹង ២១៦.៦ លានដុល្លារអាមេរិកក្នុងមួយឆ្នាំ ក្រោយពីការបង់ពន្ធរួច។

ក្រោយ Ronaldo បន្តកិច្ចសន្យាថ្មីរួចរាល់ មានការលើកឡើងថា មូលហេតុ ដែល​រូប​គេ​មិនទៅណាចោលក្លិប Al-Nassr គឺដោយសាររឿងលុយ ប៉ុន្តែ​ប្រធានក្រុម​ជម្រើស​ជាតិ​ ព័រទុយហ្គាល់ បានអះអាងថា មូលហេតុពិត ដែលគាត់សម្រេចចិត្តដាក់ប៊ិចចុះកិច្ចសន្យាថ្មីជាមួយ Al-Nassr ២ រដូវកាលទៀត គឺ​មានគោលដៅចង់ឈ្នះពានជាមួយក្លិបមួយនេះ។

ដកស្រង់ពាក្យសម្តីដើម Ronaldo បាននិយាយថា៖ «គោលដៅរបស់ខ្ញុំ គឺតែងតែចង់ឈ្នះពានឱ្យ Al-Nassr។ ពិតណាស់ ខ្ញុំនៅតែជឿជាក់បែបនោះ។ នេះគឺជាមូលហេតុ ដែលខ្ញុំបានបន្តកិច្ចសន្យាថ្មី ២ ឆ្នាំបន្ថែមទៀត ពីព្រោះខ្ញុំជឿជាក់ថា ខ្ញុំនឹងឈ្នះពានក្នុងប្រទេស អារ៉ាប៊ីសាអ៊ូឌីត»។

គួរបញ្ជាក់ថា Ronaldo បានចូលរួមជាមួយ Al-Nassr កាលពីខែ មករា ឆ្នាំ ២០២៣។ ក្នុងនោះ គាត់រកបានគ្រាប់បាល់ស៊ុតបញ្ចូលទីចំនួន ៩៩ គ្រាប់ក្នុងចំណោមការបង្ហាញខ្លួន ១១១ ប្រកួត។ យ៉ាងណា រឿងដ៏សោកស្តាយមួយ គឺក្នុងរយៈពេល ២ ឆ្នាំកន្លះមកនេះ គាត់មិនទាន់បានឈ្នះពានផ្លូវការណាមួយឡើយ ជាមួយក្រុមអ្នកមានប្រចាំប្រទេស អារ៉ាប៊ីសាអ៊ូឌីត៕

អត្ថបទ៖ កុសល