កុដិទ្រុឌទ្រោមក្នុងវត្តមួយ មានអាយុជាង ២០០ ឆ្នាំ ទទួលបានការ​ចាប់អារម្មណ៍ ​ពី​សិស្ស​ចុះមក​សិក្សា​ស្វែង​យល់

កុដិមួយខ្នងមានជញ្ជាំងធ្វើពីដីបូកបាយអរ ដែលបានកសាងឡើងអស់រយះពេលជាង ២០០ ឆ្នាំមកហើយនេះ បានទទួលការ​ចាប់អារម្មពីភ្ញៀវជាតិនិងអន្តរជាតិ និងសិស្សនិសិត្ស ក្នុងការសិក្សាស្រាវជ្រាវ។

អាជ្ញាធរមូលដ្ឋានប្រាប់ថា កុដិនេះស្ថិតក្នុងវត្តដ៏ចំណាស់មួយដែលមានសភាពទ្រុឌទ្រោម មានទីតាំងស្ថិតនៅ ភូមិភ្នំសំពៅកើត ឃុំភ្នំសំពៅ ស្រុកបាណន់ ខេត្តបាត់ដំបង។

ព្រះសង្ឃ ១ អង្គដែលបានបួសតាំងពីវ័យក្មេង និងមានស្រុកកំណើតនៅក្នុងឃុំភ្នំសំពៅផងនោះបានមានសង្ឃដីកាប្រាប់កម្ពុជាថ្មីថា កុដិបុរាណមួយខ្នងនៅក្នុងវត្ត “សុវណ្ណគិរីភេត្រារាម”ហៅវត្តភ្នំសំពៅ” កសាងអំឡុង ឆ្នាំ១៨១៤ មានអាយុកាល​ជាង ២១០ ឆ្នាំហើយ មានសភាពទ្រុឌទ្រោមខ្លាំង។

ព្រះអង្គ យក់ សឺន បន្តថា ព្រះអង្គក៏ធ្លាប់បានជួយថែរក្សាកុដិនេះដែរ បើគិតពីវត្តភ្នំសំពៅ មានចម្ងាយ៤០គីឡូម៉ែត្រ អ្នកស្រុកតែងទម្លាប់ហៅថា វត្តភ្នំសំពៅខាងកើត និងវត្តភ្នំសំពៅខាងជើង។

បើតាមព្រះអង្គ យក់ សឺន ដោយសាតែកុដិនោះមានសភាពទ្រុឌទ្រោមផ្នែកជញ្ជាំងបាយអរ បានខូចខាតផ្នែកខាងក្រោយខ្លះ ហើយនៅក្នុងឆ្នាំ១៩៩៨ ព្រះអង្គបានជួសជុលបូកដីនិងលាបប៉ាតបាយអរ ក្នុងការរក្សាធាតុដើម ដើម្បីទុកឲ្យក្មេងៗក៏ដូចជា យុវជនជំនាន់ក្រោយបានសិក្សានិងស្វែងយល់ពីស្នាដៃទំនៀមទម្លាប់របស់ដូនតាខ្មែរ ហើយក៏មានភ្ញៀវបរទេស​មកទស្សនាស្វែងយល់ពីប្រពៃណីខ្មែរ ជាបន្តបន្ទាប់ផងដែរ ខណះបច្ចុប្បន្នវត្តនេះ មានព្រសង្ឃតែ ៣ អង្គប៉ុណ្ណោះ​នៅ​ថែរក្សានិងគោរពប្រតិបត្តិ ជាមួយពុទ្ធបរិស័ទជាអ្នកភូមិស្រុក។

លោក ហម អរុណ អនុប្រធាន និងជាអ្នកនាំពាក្យនៃមន្ទីរទេសចរណ៍ខេត្តបាត់ដំបង​បានឲ្យដឹងថា “វត្តសុវណ្ណគិរីភេត្រារាម” ហៅ វត្តភ្នំសំពៅកើត ត្រូវបានដាក់ក្នុងបញ្ជីជាវត្តទេសចរណ៍រួចហើយ។ វត្តនេះ ក៏មានភ្ញៀវទេសចរក្រៅស្រុក បានមកទស្សនាកម្សាន្ត ដើម្បីសិក្សាស្វែងយល់អំំពីទំនៀមទម្លាប់ប្រពៃណីខ្មែរជាបន្តបន្ទាប់ ក្នុងនោះគេឃើញមានសិស្សនិសិត្សទាំងក្នុងនិងក្រៅស្រុកមកទស្សនា ជាពិសេសពួកគេផ្តោតអារម្ភលើជញ្ជាំងបាយអរកុដិ៕

អត្ថបទ÷សៅ សារិទ្ធ