អ្នក​មាន​វិជ្ជាជីវៈ​សុខាភិបាល​ មិនត្រឹមតែមានចំណេះជំនាញ​ ត្រូវមានគុណធម៌ មេត្តានិងករុណា

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល​ បាន​អះអាងថា អ្នកមាន​វិជ្ជាជីវៈ​សុខាភិបាល មិនត្រឹមតែ​មាន​ចំណេះជំនាញប៉ុណ្ណោះទេ ប៉ុន្តែត្រូវមានគុណធម៌ មេត្តា​និង​ករុណា​ផងដែរ ដើម្បីធ្វើយ៉ាងណាឱ្យអ្នកជំងឺមានក្តីសង្ឃឹម និងជឿជាក់ព្រមទាំងធ្វើឱ្យ​ចេញ​ជា​លទ្ធផលវិជ្ជមានផងដែរ។

ថ្លែង​នៅ​ក្នុងពិធីបើកវគ្គសិក្សា ស្តីពីក្រមសីលធម៌ និងភាពជាអ្នកមានវិជ្ជាជីវៈ ដែល​ដឹក​នាំ​បង្រៀន​ដោយ លោកសាស្ត្រាចារ្យ ឆែម គាតរិទ្ធី ទេសរដ្ឋមន្ត្រី ប្រធានក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ ទីប្រឹក្សា និងជាសាស្ត្រាចារ្យ បង្រៀនមុខវិជ្ជា ក្រមសីលធម៌វិជ្ជាជីវៈសុខាភិបាល នៅសាកលវិទ្យាល័យវិទ្យាសាស្ត្រសុខាភិបាលនៅព្រឹកថ្ងៃទី២១កក្តដានេះ លោករដ្ឋមន្ត្រី​បាន​បន្ត​ថា «បើចង់ពូកែ ត្រូវតែពូកែទាំងបច្ចេកទេស និងក្រមសីលធម៌វិជ្ជាជីវៈ ព្រោះនេះ គឺជាចលនានៃបេះដូងកន្ត្រាក់របស់អ្នកវិជ្ជាជីវៈវេជ្ជសាស្ត្រ»។

យ៉ាងណាក៏ដោយលោករដ្ឋមន្ត្រីបានទទួលស្គាល់ថា ក្នុងវិស័យសុខាភិបាលនាពេលបច្ចុប្បន្ន​នៅ​មាន​ការ​ខ្វះនូវធនធានមនុស្ស​ដែលមានក្រមសីលធម៌វិជ្ជាជីវៈ ទាំងចំនួន និងគុណភាព ហើយការខ្វះខាតនេះ គឺធ្វើឱ្យមានភាពខ្សោយនៃការគិតគូពិចារណាក្នុងវិជ្ជាជីវៈវេជ្ជសាស្ត្រ។ ដូច្នេះ សាកលវិទ្យាល័យ​វិទ្យាសាស្ត្រសុខាភិបាល ត្រូវ​តែ​ពង្រឹង​ក្នុង​ការ​លើកម្ពស់នូវគុណភាព នៃ​ក្រម​សីលធម៌​វិជ្ជាជីវៈ​វេជ្ជសាស្ត្រនេះ ឱ្យ​បាន​ប្រសើរ​ឡើង និង​ឆាប់​រហ័ស​និង​បាន​ណែនាំ​ឱ្យ​រៀប​ចំ​វគ្គសិក្សានេះប្រកប ដោយគុណភាពនិងមាននិរន្តភាពមានភាពប្រសើរជាងមុន។

លោករដ្ឋមន្ត្រីបានថ្លែងអំណរគុណ លោកទេសរដ្ឋមន្ត្រី ឆែម គាតរិទ្ធី ដែលបានលះបង់ពេលវេលា និងការច្នៃប្រឌិតខ្ពស់ ក្នុងការលើកកម្ពស់ការបណ្តុះបណ្តាលនិស្សិត នៅមហាវិទ្យាល័យវេជ្ជសាស្ត្រ នៃសាកលវិទ្យាល័យវិទ្យាសាស្ត្រសុខាភិបាល ឱ្យមានគុណភាពកាន់តែប្រសើរឡើង ជាពិសេសការពង្រឹងគុណភាពក្រមសីលធម៌វិជ្ជាសុខាភិបាល។

នៅក្នុងឱកាសនោះដែរ លោកទេសរដ្ឋមន្ត្រី ឆែម គាតរិទ្ធី បានលើកឡើងអំពីមេរៀនគុណតម្លៃនៃអ្នកមានវិជ្ជាជីវៈវេជ្ជសាស្ត្រ ដោយត្រូវមានឥរិយាបថល្អ ក្រមសីលធម៌ ទទួលខុសត្រូវ ឧត្តមគតិ ស្រឡាញ់វិជ្ជាជីវៈ ព្រហ្មវិហាធម៌ និងគោរពអ្នកជំងឺ៕

អត្ថបទ ៖ សំអឿន