ផ្ទុះរោងចក្រផលិតដែកក្នុងរដ្ឋ Pennsylvania សហរដ្ឋអាមេរិក ស្លាប់និងរបួសកម្មករជាច្រើននាក់

យោងតាមការចេញផ្សាយរបស់ទីភ្នាក់ងារព័ត៌មាន AP ហេតុការណ៍ផ្ទុះនៅរោងចក្រដែកថែប Clairton របស់សហរដ្ឋអាមេរិក នៅជិតទីក្រុង Pittsburgh រដ្ឋPennsylvania កាលពីថ្ងៃចន្ទ បានសម្លាប់កម្មករពីរនាក់ និងរបួសកម្មករយ៉ាងហោចណាស់១០នាក់។

ការ​ផ្ទុះ​នេះ​បាន​អង្រួន​ផ្ទះ​អ្នក​នៅ​ក្បែរ​នោះ បញ្ចេញ​ផ្សែង​ខ្មៅ​យ៉ាង​ក្រាស់​ទៅ​លើ​មេឃ និង​ខូចខាត​ផ្នែក​ខ្លះ​នៃ​រោងចក្រ។ ក្រុមមន្ត្រីបានប្រាប់ប្រជាជនឱ្យនៅឆ្ងាយ ខណៈដែលក្រុមសង្គ្រោះបន្ទាន់បានឆ្លើយតបយ៉ាងសកម្ម។ មូលហេតុនៃការផ្ទុះកំពុងស្ថិតក្រោមការស៊ើបអង្កេតនៅឡើយ ហើយរោងចក្រដែកថែបរបស់សហរដ្ឋអាមេរិកដែលឥឡូវនេះគ្រប់គ្រងដោយ ក្រុមហ៊ុនNippon Steel របស់ប្រទេសជប៉ុនបាននិយាយថា ខ្លួននឹងពិនិត្យមើលឡើងវិញនូវអ្វីដែលបានកើតឡើង។

សូមបញ្ជាក់ថារោងចក្រ Clairton ជារោងចក្រផលិតដែកធំជាងគេនៅអាមេរិកខាងជើង ក៏ធ្លាប់មានប្រវត្តិគ្រោះថ្នាក់ និងបញ្ហាបំពុលបរិយាកាសយូរមកហើយ។ នៅឆ្នាំ ២០១៨ អគ្គីភ័យដ៏ធំមួយបានបណ្តាលឱ្យមានខ្យល់អាកាសមិនល្អជាច្រើនសប្តាហ៍ ហើយក្រុមហ៊ុនបានបង់ប្រាក់ពិន័យរាប់លាន និងធ្វើឱ្យក្រុមហ៊ុនប្រសើរឡើងចាប់តាំងពីពេលនោះមក។

ទោះយ៉ាងណាក្រុមបរិស្ថាន និងអ្នកជំនាញសុខភាពមានការព្រួយបារម្ភអំពីសុវត្ថិភាពនៅក្នុងរោងចក្រ ហើយចង់ឱ្យមានការស៊ើបអង្កេតមួយដើម្បីសម្រេចថាតើវាគួរបន្តដំណើរការដែរឬទេ។ ខណៈការផ្ទុះនេះកាន់តែបង្កើនការព្រួយបារម្ភអំពីសុវត្ថិភាពជាថ្មីម្ដងទៀតសម្រាប់សហគមន៍ ដែលពឹងផ្អែកលើឧស្សាហកម្មដែកដើម្បីធ្វើការ៕

អត្ថបទ៖ ប៊ុន សុភាព