Boonsin Padklang ប្រកាសជាសាធារណៈថា ខ្លួននឹងធ្វើជាទីប្រឹក្សាកងទ័ពថៃ ក្រោយចូលនិវត្តន៍ 

មេភូមិភាគ២ថៃ Boonsin Padklang បានប្រកាសជាសាធារណៈថា ក្រោយចូលនិវត្តន៍ លោកនឹងធ្វើជាទីប្រឹក្សាកងទ័ពជើងគោកថៃ តាមការតែងតាំងរបស់មេទ័ពជើងគោក Pana Klaewplodthuk។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅការិយាល័យប្រឆាំងគ្រឿងញៀនក្នុងទីក្រុងបាងកក កាលពីថ្ងៃអង្គារទី២ខែកញ្ញាឆ្នាំ២០២៥ Boonsin និយាយថា ខ្លួននឹងធ្វើជាទីប្រឹក្សាទទួលបន្ទុកផ្នែកទំនាក់ទំនងសាធារណៈ ក្រោយការចូលនិវត្តន៍នៅបំណាច់ខែនេះ។ ខ្លួននឹងបន្តធ្វើការដោយទំនួលខុសត្រូវ បន្ទាប់ពីចូលនិវត្តន៍ ហើយមិនលូកលាន់នយោបាយទេ។ 

មុននេះដែរ ថ្លែងនៅឯសាកលវិទ្យាល័យ Thammasat មេភូមិភាគ២ ក៏បញ្ជាក់យ៉ាងច្បាស់រួចហើយដែរថា យោធានឹងមិនធ្វើរដ្ឋប្រហារឡើយ ក្រោយមានពាក្យចចាមអារ៉ាមអំពីការធ្វើរដ្ឋប្រហារក្នុងប្រទេសថៃស្របពេលនយោបាយកំពុងច្របូកច្របល់។

លោកអះអាងថា កងទ័ពនឹងមិនធ្វើរដ្ឋប្រហារទេ ដោយទុកឲ្យយន្តការនយោបាយជាអ្នកគ្រប់គ្រងចុះ ​ហើយខ្លួនសុំមិនជ្រៀតជ្រែកក្នុងនិន្នាការនយោបាយឡើយ កងទ័ពនៅតែរក្សាជំហរជាទាហានអាជីព។

​​​​បុរសម្នាក់នេះហើយ គឺជា​ជន​​​ទីមួយដែល​បង្ក​ឲ្យ​​មាន​​​​​ភាព​តាន​តឹងជាសាធារណៈ​​​ជាមួយកម្ពុជា និង​បង្កើន​ការ​​គំរាម​កំហែង​បញ្ឆេះ​កំហឹង​ រហូត​ដល់​បង្ក​ឲ្យ​មាន​ការ​ផ្ទុះ​អាវុធ​​​ទ្រង់ទ្រាយធំ​ ​ឈាន​ទៅ​​​​​សម្លាប់​ប្រជាពលរដ្ឋ​ស្លូតត្រង់​រាប់សិបនាក់និង​​​​ការបំផ្លិច​បំផ្លាញ​សម្បតិ្តវប្បធម៌​ ទីអារាម ផ្ទះសម្បែង​ប្រជាជន និង ហេដ្ឋារចនាសម្ព័ន្ធស៊ីវិល​។

បុរសម្នាក់នេះធ្លាប់លើកឡើងថា ក្រោយពេលចូលនិវត្តន៍ពីមុខតំណែងជាមេភូមិភាគ២ រូបគេនឹងមិនទទួលមុខតំណែងនយោបាយណាមួយឡើយ ដោយសុំធ្វើត្រឹមជាទាហានបម្រុងនិងពលរដ្ឋល្អម្នាក់ ប៉ុណ្ណោះ។

ទោះបីជាយ៉ាងណាក៏ដោយ សម្តីរបស់បុរសម្នាក់នេះមិនអាចយកជាការបានឡើយ ព្រោះតែរូបគេជាមនុស្សក្រឡិចក្រឡុច និយាយឲ្យតែរួចពីមាត់និងជាជនល្មោភសង្គ្រាមមិនខ្វល់ទុក្ខសោកពលរដ្ឋខ្លួន៕

អត្ថបទ៖ សុខ សុវណ្ណ

ចុចអាន៖ Boonsin Padklang៖ យោធាមិនធ្វើរដ្ឋប្រហារឡើយ ព្រោះកងទ័ពជាទាហានអាជីព មិនលូកលាន់នយោបាយ