​កម្ពុជា​រំពឹង​បាន​ប្រាក់ចំណូល​ជាង ​១ ​ពាន់លានដុល្លារ ​ពី​ពាណិជ្ជកម្ម​តាម​ប្រព័ន្ធ​អេឡិក​ត្រូនិក​

រដ្ឋមន្រ្តីក្រសួងពាណិជ្ជកម្ម លោកស្រី ចម និម្មល មានប្រសាសន៍ថា​ ពាណិជ្ជកម្ម​តាមប្រព័ន្ធ​អេឡិក​ត្រូនិក​បានចូលរួម​ចំណែក​យ៉ាងសំខាន់​សម្រាប់​កំណើន​សេដ្ឋកិច្ច​ និង​បង្កើត​នូវការកែច្នៃ​ និង​ជាវេទិកាសម្រាប់តភ្ជាប់​កម្ពុជា​ជាមួយទីផ្សារ​ពិភពលោក​។

​លោកស្រី ចម និម្មល ​បានលើកឡើងនៅក្នុង​វេទិកាពាណិជ្ជកម្មឌីជីថលកម្ពុជា​ និងពិព័រណ៌​អន​ឡាញ​លើកទី ២ នៅថ្ងៃទី ​១២ ខែកញ្ញា ឆ្នាំ ​២០២៥។

​លោកស្រី ចម និម្មល បានថ្លែងបញ្ជាក់ថា៖ «​វិស័យពាណិជ្ជកម្ម​តាមប្រព័ន្ធអេឡិកត្រូនិកនៅកម្ពុជា​ បានបង្ហាញ​នូវភាព​ធន់ ភាពប៉ិនប្រសប់របស់ប្រជាជនកម្ពុជា ដោយការព្យាករណ៍នៅចុងឆ្នាំនេះ ​ចំណូលពីពាណិជ្ជកម្មតាមប្រព័ន្ធអេឡិក​ត្រូនិក​ នឹងឈានដល់ ១,១ ​ពាន់លានដុល្លារ ហើយនៅឆ្នាំ ២០២៩ នឹងឈានដល់​ ១,៨ ​ពាន់លានដុល្លារ»។

​តួលេខនេះ ឆ្លុះបញ្ចាំង​ពីភាពរស់រវើកនៃវិស័យ​ ដែលពាក់ព័ន្ធ ​គ្រប់ទិដ្ឋភាពនៃសង្គម ​និងគ្រប់​ទិដ្ឋ​ភាព​របស់កសិករ​តាមជនបទ ដែលលក់ផលិតផលតាមអ៊ិនធើណិត ទៅអាជីវកម្មដែលបានចូល​ទៅកាន់​ទីផ្សារ​​ពិភព​លោក។​

​ពាណិជ្ជកម្មតាមប្រព័ន្ធអេឡិកត្រូវនិក កំពុងផ្លាស់ប្ដូររបៀបធ្វើការ ធ្វើពាណិជ្ជកម្ម និងការរស់​នៅ​របស់​យើង វាបានក្លាយជាខ្សែជីវិតសម្រាប់មនុស្សជាច្រើន​ ជាពិសេស​បន្ទាប់ពីជំងឺរាតត្បាត​នៅពេល​ដែល​បណ្ដាញឌីជីថលបានបង្ហាញនូវភាពមិនអាចខ្វះបាន​ ដើម្បី​រក្សា​បាន​នូវ​អាជីវកម្ម​របស់ខ្លួន។

​ប្រជាជនកម្ពុជា​មាន​ចំនួនជាង ១៧,២៨ លាននាក់ ក្នុងនោះអ្នកប្រើប្រាស់បណ្ដាញសង្គម មានចំនួន​ប្រមាណ ១៣ លាន​នាក់ ស្មើនឹង ៧៤,៦% នៃប្រជាជនសរុប។

ទីផ្សារឌីជីថលនៅកម្ពុជា មានការរីកចម្រើនខ្លាំង ដោយមានសេវាកម្មដូចជា foodpanda, NHAM24, Grab, E-gets, WowNow, និង L192 ដែលមានផ្តល់ជូននូវផលិតផលប្រើប្រាស់ អាហារ និងសម្លៀកបំពាក់ និងការបញ្ជាកក់សេវាដឹកជញ្ជូន។

សរុបមកដើម្បីជំរុញសម្ទុះទីផ្សារឌីជីថល និងទំនុកចិត្ត របស់អ្នកប្រើប្រាស់ត្រូវមានការធានាគុណភាពផលិតផល ការទូទាត់តាមប្រព័ន្ធអនឡាញដែលមានសុវត្ថិភាព និងប្រព័ន្ធផ្សព្វផ្សាយដែលមានភាពច្នៃប្រឌិតតាមបណ្ដាញសង្គម៕

អត្ថបទ៖ ឡេង ដេត