ព័ត៌មានអន្ដរជាតិ

សុខភាពម្ដាយទ្រុឌទ្រោមខ្លាំង កូនប្រុសលោកស្រី ស៊ូជី ស្រែកអំពាវសុំឲ្យដោះលែងបន្ទាន់

បានផុស

៩ ខែ មុន

នៅ

ថ្ងៃសៅរ៍ ១៣ កញ្ញា ២០២៥

ដោយ

កូនប្រុសទីពីររបស់អតីតមេដឹកនាំគាំទ្រលទ្ធិប្រជាធិបតេយ្យ នៅថ្ងៃទី១៣ ខែកញ្ញា បានស្រែកអំពាវនាវដល់សហគមន៍អន្តរជាតិ សូមជួយដល់ម្ដាយរបស់លោក ជាពិសេសដើម្បីធានាដល់ការដោះលែងកាន់តែលឿន។ បន្ទាប់ពីសុខភាពរបស់លោកស្រី អ៊ុងសាន ស៊ូជី កាន់តែទ្រុឌទ្រោមខ្លាំងទៅៗនៅក្នុងមន្ទីរឃុំឃាំងអស់រយៈពេលជាង៣ឆ្នាំ។

**កូនប្រុសទី២ របស់លោកស្រី អ៊ុងសាន ស៊ូជី**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Kim Aris បច្ចុប្បន្នរស់នៅប្រទេសអង់គ្លេស បាននិយាយទៅកាន់សារព័ត៌មាន NHK ថា ខ្លួនបានទទួលសំបុត្រពីម្តាយកាលពីជាង ២ ឆ្នាំមុន គឺជាសំបុត្រតែមួយគត់ដែលបានទទួលពីគាត់ ចាប់តាំងពីយោធាបានដណ្តើមអំណាចនៅឆ្នាំ ២០២១មកម៉្លេះ។

កូនប្រុសទី២របស់អតីតមេដឹកនាំគាំទ្រលទ្ធិប្រជាធិបតេយ្យវ័យ៨០ឆ្នាំ បានបញ្ចាក់បន្ថែមទៀតថា ចាប់តាំងពីម្ដាយត្រូវយោធាឃុំឃាំង គ្មានសមាជិកគ្រួសារ ឬមេធាវីផ្ទាល់ខ្លួន ត្រូវបានអនុញ្ញាតឲ្យជួបលោកស្រីនោះទេ។

ដូច្នេះហើយ ក្នុងនាមលោកជាកូនប្រុស សូមអំពាវនាវឲ្យដោះលែងម្តាយជាបន្ទាន់ ដោយមិនភ្លេចសង្កត់ធ្ងន់ថា គាត់មានជំងឺបេះដូងប្រចាំកាយ ហើយស្ថានភាពរបស់គាត់ អាចនឹងកាន់តែអាក្រក់ទៅៗនាពេលខាងមុខ។ ជាងនេះទៅទៀត ពន្ធនាគារដែលម្តាយជាប់ឃុំឃាំង បានរងការខូចខាតពីគ្រោះរញ្ជួយដីដ៏ខ្លាំងមួយ ដែលបានវាយប្រហារប្រទេសមីយ៉ាន់ម៉ា កាលពីខែមីនា។

លោក Aris បាននិយាយថា គាត់ចង់ឲ្យសហគមន៍អន្តរជាតិធ្វើវាបន្ថែមទៀត សម្រាប់ការដោះលែងលោកស្រី អ៊ុងសាន ស៊ូជី ។ នៅក្នុងនោះ លោកបានដាក់ឈ្មោះប្រទេសចិន ឥណ្ឌា និងសមាគមប្រជាជាតិអាស៊ីអាគ្នេយ៍ បច្ចុប្បន្នជាប្រធានម៉ាឡេស៊ី ជាប្រទេសដែលអាចជួយម្ដាយរបស់លោកបាននាពេលនេះ។

ទោះជាយ៉ាងណាក៏ដោយ ផ្ទុយពីការអះអាងរបស់កូនប្រុស អ្នកនាំពាក្យយោធាមីយ៉ាន់ម៉ា បាននិយាយកាលពីសប្តាហ៍មុនថា លោកស្រី អ៊ុងសាន ស៊ូជី នៅតែមានសុខភាពល្អដដែល ហើយក៏គ្មានបញ្ហាអី្វដូចការលើកឡើងរបស់កូនប្រុសលោកស្រីនោះទេ៕